Pakistani actress Vaneeza Sattar: ભૂતપૂર્વ પાકિસ્તાની ક્રિકેટર શોએબ મલિક ઘણીવાર પોતાના વ્યક્તિગત જીવન અને લગ્ન સંબંધિત ચર્ચાઓને કારણે હેડલાઇન્સમાં રહેતા હોય છે. તાજેતરમાં સોશિયલ મીડિયા અને કેટલાક મીડિયા અહેવાલોમાં એવી અફવા ફેલાઈ હતી કે તેઓ ચોથા લગ્ન કરવાની તૈયારીમાં છે. અહેવાલોમાં દાવો કરવામાં આવ્યો હતો કે તેઓ પાકિસ્તાની અભિનેત્રી વનેઝા સત્તાર સાથે સંબંધમાં છે અને તેમની સાથે લગ્ન કરી શકે છે. આ અફવાઓ સામે હવે વનીઝા સત્તારે ખુદ પ્રતિક્રિયા આપી છે. તેમણે એક ટીવી શોમાં હોસ્ટ અને અભિનેત્રી નિદા યાસીર સાથે વાતચીત દરમિયાન આ મુદ્દે ખુલાસો કર્યો.
શોએબ મલિકનું નામ બીજી એક યુવતી સાથે જોડવામાં આવ્યું
વનીઝાએ જણાવ્યું કે એક દિવસ તેઓ સવારે ઉઠ્યા અને ઇન્સ્ટાગ્રામ પર નજર કરતા તેમને પોતાના અને શોએબ મલિકના લગ્ન અંગેની અફવાઓ જોવા મળી. શરૂઆતમાં તેમને લાગ્યું કે આ માત્ર સોશિયલ મીડિયા પરની સામાન્ય અફવા હશે અને થોડા સમયમાં પોતે જ બંધ થઈ જશે. તેમણે કહ્યું કે શરૂઆતમાં તેઓએ આ વાતને હળવાશથી લીધી હતી, પરંતુ સમય જતાં આ ચર્ચા વધુ ગંભીર બની ગઈ. વનીઝાએ જણાવ્યું કે પહેલા શોએબ મલિકનું નામ બીજી એક યુવતી સાથે જોડવામાં આવ્યું હતું, પરંતુ જ્યારે લોકોને ખબર પડી કે તે યુવતી પહેલેથી જ પરિણીત છે, ત્યારે કેટલાક લોકોએ તેમનું નામ તેમની સાથે જોડવાનું શરૂ કર્યું. અભિનેત્રીએ જણાવ્યું કે આવી અફવાઓ ફેલાવવાથી વ્યક્તિગત જીવન પર મોટી અસર પડે છે. તેમના જણાવ્યા અનુસાર, ખોટી ચર્ચાઓના કારણે કોઈના લગ્નજીવન પર પણ અસર પડી શકે છે. વનીઝાએ જણાવ્યું કે આ અફવાઓને કારણે તેમના પરિવારજનોને પણ મુશ્કેલીનો સામનો કરવો પડ્યો.
પાકિસ્તાની મનોરંજન જગતમાં એક ઉભરતી અભિનેત્રી
વનીઝા સત્તારે ખુલાસો કર્યો કે આ અફવાઓ ફેલાતાં તેમની માતાને ઘણા ફોન આવવા લાગ્યા હતા. લોકો સતત પૂછતા હતા કે શું તેઓ ખરેખર શોએબ મલિક સાથે લગ્ન કરવા જઈ રહ્યા છે. શરૂઆતમાં તેમણે આ બાબતને મજાક તરીકે જવાબ આપ્યો હતો, પરંતુ બાદમાં પરિસ્થિતિ ગંભીર બનતી ગઈ. તેમણે સ્પષ્ટ કર્યું કે વાસ્તવિક જીવનમાં તેઓ ક્યારેય શોએબ મલિકને મળ્યા પણ નથી અને તેમની સાથે કોઈ પ્રકારની વાતચીત પણ થઈ નથી. તેમના કહેવા મુજબ તેમને ખબર નથી કે આ અહેવાલો ક્યાંથી શરૂ થયા. વનીઝા સત્તાર પાકિસ્તાની મનોરંજન જગતમાં એક ઉભરતી અભિનેત્રી અને મોડેલ તરીકે ઓળખાય છે. તેઓએ 'લાડલી' નામના શો દ્વારા લોકપ્રિયતા મેળવી છે અને ધીમે ધીમે પાકિસ્તાની ફિલ્મ અને ટીવી ઉદ્યોગમાં પોતાનું સ્થાન બનાવી રહી છે.
ભારતીય ટેનિસ સ્ટાર સાનિયા મિર્ઝા સાથે લગ્ન કર્યા
બીજી તરફ શોએબ મલિકે પણ થોડા દિવસો પહેલા એક નિવેદન જાહેર કરીને પોતાના ચોથા લગ્ન અંગે ચાલી રહેલી ચર્ચાઓને સંપૂર્ણપણે ખોટી અને આધારવિહોણી ગણાવી હતી. શોએબ મલિકના વ્યક્તિગત જીવનની વાત કરીએ તો તેમના પહેલા લગ્ન 2002માં આયેશા સિદ્દીકી સાથે થયા હતા, પરંતુ 2010માં બંને વચ્ચે છૂટાછેડા થઈ ગયા હતા. ત્યારબાદ 2010માં તેમણે ભારતીય ટેનિસ સ્ટાર સાનિયા મિર્ઝા સાથે લગ્ન કર્યા હતા. આ લગ્નજીવનમાંથી તેમને એક પુત્ર છે, જે હાલ સાનિયા મિર્ઝા સાથે રહે છે. પછી 2024માં શોએબ મલિકે ત્રીજી વખત પાકિસ્તાની અભિનેત્રી સના જાવેદ સાથે લગ્ન કર્યા હતા. હાલમાં ફરીથી તેમના ચોથા લગ્ન અંગેની અફવાઓ ચર્ચામાં આવી હતી, પરંતુ હવે બંને પક્ષે આ દાવાઓને નકારી દીધા છે.
