'અમે નેપાળની આવી ઓળખ નથી ઈચ્છતા'! મનીષા કોઈરાલાની ભારત-ચીનને ભાવુક અપીલ

Manisha Koirala on Nepal Landslides: નેપાળમાં ભયાનક પૂર અને ભૂસ્ખલનથી ભારે તબાહી સર્જાઈ છે. મોટી સંખ્યામાં લોકોનાં મોત અને હજારો લોકો ગુમ હોવાના અહેવાલો વચ્ચે બોલિવૂડ અભિનેત્રી મનીષા કોઈરાલાએ ભારત, ચીન અને સમગ્ર આંતરરાષ્ટ્રીય સમુદાયને મદદ માટે આગળ આવવાની અપીલ કરી છે. 30 ઓગસ્ટ, 2026ના રોજ સદગુરુના નેતૃત્વમાં યોજાયેલા 'નેપાળ સાથે એકજૂથતા' કાર્યક્રમમાં મનીષાએ આ કુદરતી આફતનો સામનો કરવા પાડોશી દેશોને સાથે મળીને કામ કરવાની અપીલ કરી હતી. અભિનેત્રીએ ખાસ ભાર મૂક્યો કે કુદરતી હોનારતના કારણે નેપાળની વૈશ્વિક ઓળખ માત્ર પૂર અને વિનાશ સાથે જોડાઈ ન જવી જોઈએ. નેપાળના પ્રવાસન ક્ષેત્રને ફરી મજબૂત બનાવવા માટે પણ આંતરરાષ્ટ્રીય સહયોગ જરૂરી છે.

હવામાન પરિવર્તન સામે સાથે મળીને લડવાની અપીલ
કાઠમંડુમાં જન્મેલી મનીષા કોઈરાલાએ આ આપત્તિને માત્ર નેપાળ પૂરતી મર્યાદિત ન ગણાવી. તેણે ગ્લોબલ વોર્મિંગ અને ક્લાઇમેટ ચેન્જને ગંભીર વૈશ્વિક પડકાર ગણાવ્યો. તેણીના મતે હિમાલય ક્ષેત્રના દેશો એકબીજા સાથે જોડાયેલા હોવાથી કુદરતી આફતોનો સામનો કરવા માટે સંયુક્ત પ્રયાસ જરૂરી છે. ભારત, ચીન અને નેપાળે સરહદોથી ઉપર ઉઠીને સાથે મળીને લાંબા ગાળાના ઉકેલો શોધવા જોઈએ તેવી અપીલ તેમણે કરી.

'નેપાળની ઓળખ માત્ર આપત્તિગ્રસ્ત દેશ તરીકે ન બને'
મનીષા કોઈરાલાએ આંતરરાષ્ટ્રીય સમુદાયને નેપાળ માટે પોતાનો પ્રેમ અને સહયોગ જાળવી રાખવાની ભાવુક અપીલ કરી હતી. તેમણે કહ્યું કે નેપાળની ઓળખ માત્ર કુદરતી આફતોનો સામનો કરી રહેલા દેશ તરીકે ન થવી જોઈએ. ટૂરિઝમ નેપાળની અર્થવ્યવસ્થાની મહત્વપૂર્ણ જીવાદોરી છે, તેથી પૂર અને ભૂસ્ખલનથી અસરગ્રસ્ત વિસ્તારો સિવાય દેશના અન્ય ભાગોમાં પ્રવાસન પ્રવૃત્તિ ચાલુ રહે તે જરૂરી છે. વિદેશી પ્રવાસીઓએ નેપાળની મુલાકાત લેવાનું ચાલુ રાખવું જોઈએ, જેથી દેશની અર્થવ્યવસ્થાને ફરીથી મજબૂત કરવામાં મદદ મળી શકે તેવી અપીલ પણ તેમણે કરી હતી.

પૂર અને ભૂસ્ખલનથી ભારે તારાજી
નેપાળ-તિબેટ સરહદ નજીક ગ્લેશિયર તૂટ્યા બાદ આવેલા જળપ્રલયથી ઉત્તરી અને મધ્ય નેપાળમાં ભારે નુકસાન થયું હોવાના અહેવાલો છે. કાદવ, માટી અને પાણીના ધસમસતા પ્રવાહે અનેક વિસ્તારોને પોતાની ઝપેટમાં લીધા છે. અનેક ગામડાંઓમાં ભારે નુકસાન થયું છે, જ્યારે હાઇડ્રોઇલેક્ટ્રિક પાવર પ્રોજેક્ટ્સને પણ અસર પહોંચી છે. આપત્તિમાં મોટી સંખ્યામાં લોકોનાં મોત થયા છે અને હજારો લોકો ગુમ હોવાની માહિતી સામે આવી છે.

રાહત અને બચાવ માટે વિશ્વને અપીલ
આ મુશ્કેલ સમયમાં નેપાળી નાગરિકોની મદદ માટે વિશ્વભરના લોકોને આગળ આવવાની અપીલ મનીષા કોઈરાલાએ કરી છે. તેમણે રાહત સામગ્રી મોકલવા અને અસરગ્રસ્ત લોકોની મદદ કરવા માટે આંતરરાષ્ટ્રીય સમુદાયને અપીલ કરી હતી. મનીષાના સંદેશનો મુખ્ય ભાર એ રહ્યો કે નેપાળને માત્ર આપત્તિમાંથી બહાર કાઢવાનો પ્રયાસ નહીં, પરંતુ તેની પ્રવાસન, અર્થવ્યવસ્થા અને વૈશ્વિક ઓળખને ફરી મજબૂત બનાવવાનો પ્રયાસ પણ સાથે થવો જોઈએ.