Koffee With Karan Season 9: બોલિવૂડના ચર્ચિત અને લોકપ્રિય ચેટ શો 'કોફી વિથ કરણ' ની ૯મી અને આખરી સિઝનનું પ્રીમિયર ધમાકેદાર રીતે થઈ ચૂક્યું છે. આ ગ્રાન્ડ ઓપનિંગ એપિસોડમાં સુપરસ્ટાર સલમાન ખાને ખાસ હાજરી આપી હતી, જ્યારે તેમની સાથે કરિશ્મા કપૂર (લોલો) પણ સ્પેશિયલ ગેસ્ટ તરીકે જોડાયા હતા. શો દરમિયાન પોતાની પર્સનલ અને પ્રોફેશનલ લાઈફ વિશે ખુલીને વાત કરતી વખતે સલમાને પોતાની સંભવિત બાયોપિક વિશે એક એવો સનસનાટીભર્યો ખુલાસો કર્યો, જેણે સોશિયલ મીડિયા પર અને ચાહકો વચ્ચે ભારે ચર્ચા જગાવી છે.
બાયોપિક માટે સલમાને પસંદ કર્યા બોલિવૂડના 4 દિગ્દર્શકો
શોના જાણીતા 'રેપિડ-ફાયર' રાઉન્ડ દરમિયાન કરિશ્મા કપૂરે સલમાનને સવાલ પૂછ્યો હતો કે જો ભવિષ્યમાં તેમના જીવન પર આધારિત ફિલ્મ કે બાયોપિક બનાવવામાં આવે, તો તેઓ કયા બોલિવૂડ ડિરેક્ટરની પસંદગી કરશે. સલમાને પણ પોતાની સહજ શૈલીમાં જવાબ આપતા કહ્યું કે વાર્તાના પ્રકાર અને તેના ઝોનર પર આધાર રાખીને અલગ-અલગ નિર્દેશકો કામ કરી શકે છે:
ડેવિડ ધવન: જો તેમના જીવનમાં બનેલી ઘટનાઓને હળવી અને કોમેડી શૈલીમાં રજૂ કરવી હોય.
સંજય લીલા ભણસાલી: જો એક પરંપરાગત, ઈમોશનલ અને કરુણ પ્રેમકથા દર્શાવવી હોય.
સૂરજ બડજાત્યા: જો જીવનમાં આવેલી પારિવારિક તેમજ સુંદર લવ સ્ટોરીઓની શ્રેણી રજૂ કરવી હોય.
કબીર ખાન: જો જીવનના ઉતાર-ચઢાવથી ભરેલી એક્શન-પેક્ડ લવ સ્ટોરી બનાવવી હોય.
'મારા રહસ્યો મારી કબર સુધી જશે' – ભાઈજાને કેમ લીધો આવો નિર્ણય?
ચાર પ્રખ્યાત ડિરેક્ટર્સના નામ આપ્યા પછી સલમાન ખાને સ્પષ્ટ શબ્દોમાં એક એવું નિવેદન આપ્યું કે જેણે તમામ ચાહકોની આશાઓ પર પાણી ફેરવી દીધું. સલમાને ભારપૂર્વક કહ્યું, "પરંતુ મારા જીવન પર ક્યારેય કોઈ બાયોપિક નહીં બને. મારું જીવન અને મારા રાઝ મારી કબર સુધી મારી સાથે જશે." સલમાને ઉમેર્યું કે જૂની વાતો અને જૂના ભૂતકાળને ફરીથી ઉખેળવાથી માત્ર જૂના ઘાવ જ લીલા થાય છે. પોતાના અંગત સંબંધો, વિવાદો, સફળતાઓ અને નિષ્ફળતાઓ વિશે દુનિયા સમક્ષ સાર્વજનિક રીતે ખુલાસો કરવા માટે તેઓ બિલકુલ તૈયાર નથી.
22 વર્ષના ઇતિહાસ પછી 'કોફી વિથ કરણ' ની આખરી સિઝન
ઉલ્લેખનીય છે કે કરણ જોહરનો આ આઇકોનિક ચેટ શો 2004થી દર્શકોનું મનોરંજન કરી રહ્યો છે અને આ 9મી સિઝન આ શોની છેલ્લી સિઝન છે. આ પ્રીમિયર એપિસોડમાં સલમાન ખાન અને કરિશ્મા કપૂરની જુની ઓન-સ્ક્રીન કેમેસ્ટ્રીએ દર્શકોને 90ના દાયકાની યાદ અપાવી દીધી હતી. અહેવાલો મુજબ, આ અંતિમ સિઝનમાં શાહરૂખ ખાન, આલિયા ભટ્ટ, સૈફ અલી ખાન, કરીના કપૂર ખાન, તેમજ સિદ્ધાર્થ મલ્હોત્રા અને કિયારા અડવાણી જેવા બોલિવૂડના દિગ્ગજ સિતારાઓ પણ જોવા મળશે.
બાયોપિકના નિર્ણયથી ચાહકો અને ફિલ્મ ઈન્ડસ્ટ્રીમાં ઉત્સુકતા
સલમાન ખાનનું આ નિવેદન સામે આવ્યા બાદ બોલિવૂડ વર્તુળો અને સોશિયલ મીડિયા પર અલગ-અલગ પ્રતિક્રિયાઓ જોવા મળી રહી છે. એકતરફ જ્યાં મોટાભાગના ચાહકો તેમના સુપરસ્ટારના અંગત નિર્ણયનો સ્વીકાર કરી રહ્યા છે, તો બીજી તરફ ફિલ્મ રસિકોનું માનવું છે કે સલમાનનું જીવન એટલું રોચક રહ્યું છે કે તેના પર બનનારી ફિલ્મ બોક્સ ઓફિસ પર ધમાકો કરી શકે તેમ હતી. જોકે, ભાઈજાનના આ મક્કમ વલણ બાદ હવે કોઈ ફિલ્મ નિર્માતા તેમની સંમતિ વિના તેમના પર ફિલ્મ બનાવશે કે નહીં તે જોવું રસપ્રદ રહેશે.
