Huma Qureshi Praises Kiara Advani’s Dedication at Toxic Event: ફિલ્મ ‘ટોક્સિક’ની રિલીઝ તારીખ જેમ-જેમ નજીક આવી રહી છે, તેમ-તેમ ચાહકોમાં તેનો ક્રેઝ ચરમસીમાએ પહોંચી રહ્યો છે. એડવાન્સ બુકિંગમાં રેકોર્ડ તોડી રહેલી આ મચ-અવેટેડ ફિલ્મ ટૂંક સમયમાં જ સિનેમાઘરોમાં ધૂમ મચાવવા માટે તૈયાર છે. તાજેતરમાં ચેન્નાઈ ખાતે યોજાયેલી એક ગ્રાન્ડ પ્રી-રિલીઝ ઇવેન્ટ દરમિયાન બોલિવૂડ અભિનેત્રી હુમા કુરેશીએ કિયારા અડવાણીના કામ અને તેના વ્યાવસાયિક ડેડિકેશનના મુક્ત મને વખાણ કર્યા હતા, જેણે સૌનું ધ્યાન ખેંચ્યું છે.
કિયારાના સખત ડેડિકેશનથી પ્રભાવિત થઈ હુમા કુરેશી
પ્રી-રિલીઝ ઇવેન્ટમાં પોતાના અનુભવો શેર કરતા હુમા કુરેશીએ એક રસપ્રદ કિસ્સો કહ્યો હતો. હુમાએ જણાવ્યું કે, શૂટિંગ દરમિયાન એક સીનમાં ભારે વરસાદ વચ્ચે કામ કરવાનું હતું અને આ આખી રેન સીક્વન્સ અત્યંત થકવી દે તેવી હતી. કલાકો સુધી ચાલતા શૂટિંગના કારણે મારા માથામાં અસહ્ય દુખાવો થઈ રહ્યો હતો અને હું આ અંગે ટીમ સમક્ષ ફરિયાદ કરવાની જ હતી. પરંતુ તે જ સમયે મારી નજર કિયારા અડવાણી પર પડી. કિયારા તે સમયે ૬ મહિનાની ગર્ભવતી હોવા છતાં, કોઈ પણ જાતની ફરિયાદ કે નખરા કર્યા વિના શાંતિથી પોતાની જગ્યા પર ઊભી હતી અને તે મુશ્કેલ સીન શૂટ કરી રહી હતી. આ દ્રશ્ય જોઈને હું ખૂબ જ પ્રભાવિત થઈ હતી અને મે ફરિયાદ કરવાનો વિચાર માંડી વાળ્યો હતો. હુમાએ ઉમેર્યું હતું કે આ ફિલ્મ દ્વારા કિયારાને દર્શકો તરફથી અઢળક પ્રેમ મળવાનો છે.
બોક્સ ઓફિસ પર તહેવારનો મોટો ધમાકો
ચેન્નાઈની આ ભવ્ય ઇવેન્ટમાં ફિલ્મના મુખ્ય કલાકાર યશ, કિયારા અડવાણી, નયનતારા, રુકમણી વસંત અને હુમા કુરેશી સહિત સમગ્ર કાસ્ટ અને ક્રૂ ઉપસ્થિત રહ્યા હતા. ગીતુ મોહનદાસ દ્વારા ડિરેક્ટ કરવામાં આવેલી આ ફિલ્મ 26 ઓગસ્ટના રોજ વિશ્વભરના સિનેમાઘરોમાં રિલીઝ થવા જઈ રહી છે. તહેવારોની રજાઓનો સિંહફાળો આ ફિલ્મને મળવાની પૂરેપૂરી શક્યતા વ્યક્ત કરવામાં આવી રહી છે. ખાસ કરીને ફિલ્મમાં સાઉથ સુપરસ્ટાર યશ ડબલ રોલમાં જોવા મળશે. ટીઝરમાં યશ અને કિયારાની બ્રેથટેકિંગ રોમેન્ટિક કેમિસ્ટ્રીએ દર્શકોને મંત્રમુગ્ધ કરી દીધા છે.
વિવાદો વચ્ચે કિયારાએ ટ્રોલર્સને આપ્યો ચૂપચાપ જવાબ
ટ્રેલર અને ટીઝરમાં દર્શાવાયેલા કેટલાક ઇન્ટિમેટ સીન્સને કારણે સોશિયલ મીડિયા પર ફિલ્મને ટ્રોલિંગનો સામનો પણ કરવો પડ્યો છે. ખાસ કરીને પરિણીત અને એક બાળકની માતા હોવા છતાં કિયારાના આવા સીન્સ કરવા સામે કેટલાક યુઝર્સે નારાજગી વ્યક્ત કરી હતી. જોકે, કિયારા અડવાણીએ આવી તમામ નેગેટિવિટીથી અંતર જાળવી રાખ્યું છે. તે આ ટ્રોલિંગથી સહેજ પણ વિચલિત થયા વિના સંપૂર્ણ ધ્યાન ફિલ્મની સફળ રિલીઝ અને પ્રોમોશન પર કેન્દ્રિત કરી રહી છે.
બોક્સ ઓફિસ પર કમાણીની સુનામી સાથે યશનું કમબેક
સુપરહિટ ફ્રેન્ચાઇઝ ‘KGF 2’ની ભવ્ય સફળતાના ચાર વર્ષ બાદ સુપરસ્ટાર યશ આ ફિલ્મ દ્વારા મોટા પડદે વાપસી કરી રહ્યો છે. આ ડાર્ક ગેંગસ્ટર ડ્રામા ફિલ્મમાં યશનો માસ-એક્શન અવતાર દર્શકોને ખૂબ પસંદ આવી રહ્યો છે. રિલીઝ પહેલા જ ફિલ્મે એડવાન્સ બુકિંગ અને પ્રી-ટિકિટ સેલ્સમાં કરોડોની કમાણી કરીને નવો ઇતિહાસ રચ્યો છે. વર્ષ 2026ની સૌથી વધુ એડવાન્સ બુકિંગ કરનારી બીજી મોટી ફિલ્મ બનીને તે હવે ‘ધુરંધર ૨’ના ₹56 કરોડના પ્રી-સેલ્સ રેકોર્ડને તોડવાની દિશામાં આગળ વધી રહી છે, જ્યારે ‘ટોક્સિક’ અત્યાર સુધીમાં બ્લોક સીટ્સ સાથે ₹41.36 કરોડનો આંકડો વટાવી ચૂકી છે.
