Rajkummar Rao Recalls Struggle Days on KBC 18: ટેલિવિઝનનો સૌથી લોકપ્રિય ક્વિઝ શૉ 'કૌન બનેગા કરોડપતિ 18' (KBC 18) માત્ર જ્ઞાન અને કરોડો રૂપિયા જીતવા પૂરતો સીમિત નથી, પરંતુ અહીં અવારનવાર કલાકારોના દિલને સ્પર્શી જાય તેવા વણકહેલા કિસ્સાઓ પણ સામે આવે છે. તાજેતરના એક વિશેષ એપિસોડમાં બોલીવુડના દમદાર અભિનેતા રાજકુમાર રાવ તેમની આગામી ફિલ્મ 'પ્રહાર'ના પ્રમોશન માટે હોટસીટ પર પહોંચ્યા હતા. તેમની સાથે અભિનેત્રી વામિકા ગબ્બી અને જાણીતા વકીલ ઉજ્જવલ નિકમ પણ હાજર હતા. આ શૉ દરમિયાન જ્યારે સદીના મહાનાયક અમિતાભ બચ્ચન અને રાજકુમાર રાવ વચ્ચે વાતોનો દોર શરૂ થયો, ત્યારે માયાનગરી મુંબઈમાં પોતાના સપના પૂરા કરવા આવેલા એક સામાન્ય યુવાનના સંઘર્ષની કહાની સામે આવી હતી.
શાહરૂખ ખાનમાંથી મળેલી પ્રેરણા
વાતચીત દરમિયાન જ્યારે બિગ બીએ રાજકુમાર રાવ સાથે શાહરૂખ ખાન અંગે ચર્ચા કરી, ત્યારે રાજકુમાર રાવ પોતાના ભૂતકાળની યાદોમાં ખોવાઈ ગયા હતા. તેમણે જણાવ્યું કે દિલ્હીના એક સામાન્ય મધ્યમવર્ગીય પરિવારમાંથી આવીને સફળતાના શિખરે પહોંચેલા શાહરૂખ ખાન તેમના માટે હંમેશા મોટા પ્રેરણાસ્ત્રોત રહ્યા છે. રાજકુમારે કહ્યું કે, "સર, મેં પણ ખૂબ નાની ઉંમરમાં નક્કી કરી લીધું હતું કે મારે એક્ટિંગ જ કરવી છે. શાહરૂખ સર જે રીતે દિલ્હીથી નીકળીને થિયેટર અને ટીવી શૉઝ દ્વારા આજે આટલા મોટા કિંગ સબિત થયા છે, તેમની આ સફળતાની સફર મને હંમેશા હિંમત આપતી હતી."
રિજેક્શન બાદ 'મન્નત' અને 'જલસા' બહાર વિતાવેલા કલાકો
પોતાના શરૂઆતના દિવસોનો એક દિલચસ્પ કિસ્સો શેર કરતા રાજકુમાર રાવે કહ્યું કે, "જ્યારે હું પહેલીવાર એક શૉના ઓડિશન માટે મુંબઈ આવ્યો હતો, ત્યારે મારું સિલેક્શન થયું નહોતું. પણ તે રિજેક્શન પછી હું હિંમત હારવાને બદલે મુંબઈની શેરીઓમાં ભટકતો હતો. હું અવારનવાર અમિતાભ સરના 'જલસા' અને શાહરૂખ સરના 'મન્નત' બંગલા બહાર જઈને કલાકો સુધી ઊભો રહેતો હતો." રાજકુમારે વધુમાં ઉમેર્યું કે તેમના માતાના રૂમમાં પણ હંમેશાં અમિતાભ બચ્ચનનું પોસ્ટર રહેતું હતું. આજે ભલે તેઓ ઇન્ડસ્ટ્રીના ટોચના અભિનેતાઓમાં ગણાય છે, પરંતુ એક સમયે તેઓ પણ ફેન્સની એ જ ભીડનો હિસ્સો હતા.
અમિતાભ બચ્ચને કરી શાહરૂખ ખાનના ગુણની પ્રશંસા
રાજકુમાર રાવની આ ભાવુક વાતો સાંભળીને શોના હોસ્ટ અમિતાભ બચ્ચન પણ મુસ્કુરાયા વિના રહી શક્યા નહોતા. તેમણે શાહરૂખ ખાન સાથે 'કભી ખુશી કભી ગમ' અને 'મોહબ્બતેં' જેવી ફિલ્મોમાં કામ કરવાનો પોતાનો અંગત અનુભવ શેર કર્યો હતો. બિગ બીએ એસઆરકેના જુસ્સાની પ્રશંસા કરતા કહ્યું કે, "મેં તેમની સાથે કામ કર્યું છે અને તેઓ એક એવા ઇન્સાન છે જે કોઈ પણ પરિસ્થિતિમાં ક્યારેય હાર નથી માનતા. મુશ્કેલી ભલે ગમે તેટલી મોટી હોય, તેઓ માત્ર પોતાની વાતોથી જ સામે વાળી વ્યક્તિનો આત્મવિશ્વાસ બમણો કરી દેવાની અદ્ભુત ક્ષમતા ધરાવે છે."
આગામી ફિલ્મ 'પ્રહાર' અને રાજકુમાર રાવનો નવો અંદાજ
કેબીસીના આ મંચ પર રાજકુમાર રાવે પોતાની મોસ્ટ અવેટેડ ફિલ્મ 'પ્રહાર' વિશે પણ ખાસ ચર્ચા કરી હતી. આ ફિલ્મ જાણીતા સરકારી વકીલ ઉજ્જવલ નિકમના જીવન અને તેમના કરિયરના મહત્વના કેસો પર આધારિત છે, જેમાં 26/11 મુંબઈ આતંકી હુમલાના દોષી અજમલ કસાબના ટ્રાયલની ઘટનાને મુખ્ય રીતે વણી લેવામાં આવી છે. રાજકુમાર રાવ, વામિકા ગબ્બી અને જયદીપ અહલાવત અભિનીત આ ફિલ્મ આગામી 16 ઓક્ટોબરે સિનેમાઘરોમાં રિલીઝ થવા જઈ રહી છે. KBC 18નો આ એપિસોડ દર્શકો માટે માત્ર મનોરંજન જ નહીં, પરંતુ સપના પૂરા કરવાની પ્રેરણા આપનારો સાબિત થયો છે.
