'તું મેરી મેં તેરા' ની નિષ્ફળતાની કાર્તિક આર્યને કરી ભરપાઈ ! કરણ જોહર સાથે બગડ્યા સંબંધો?

Tu Meri Main Tera box office failure: કાર્તિક આર્યનની ફિલ્મ 'તું મેરી મેં તેરા, મેં તેરા તું મેરી' બોક્સ ઓફિસ પર ખાસ ચાલી નહીં. અનન્યા પાંડે અને કાર્તિક આર્યનનો રોમાન્સ દર્શકોને ખાસ એન્ટરટેનિંગ લાગ્યો નહીં. આ વચ્ચે કાર્તિક અને કરણ જોહર વચ્ચેના સંબંધો ખરાબ થવાની ખબર પણ સામે આવી છે, પરંતુ આ તમામ વિવાદો વચ્ચે હવે એક નવું અપડેટ સામે આવ્યું છે. ઇન્ડસ્ટ્રીના સૂત્રો મુજબ, કાર્તિકે પોતાની ફીનો મોટો હિસ્સો છોડ્યો છે, જેથી ફિલ્મના ફ્લોપ થવામાં ફિલ્મમેકર્સને સપોર્ટ કરી શકાય.

કાર્તિકે ફીમાં કર્યો ઘટાડો?
સૂત્રોના હવાલે રિપોર્ટમાં જાણવા મળ્યું છે કે, કાર્તિકે ધર્મા પ્રોડક્શન્સની આ ફિલ્મ રિલીઝ થયા બાદ તરત જ પોતાની નક્કી થયેલી ફીમાંથી 15 કરોડ રૂપિયા ઓછા કરી દીધા હતા. અભિનેતાનો આ નિર્ણય એવા સમયે આવ્યો છે જ્યારે ઘણી હિન્દી ફિલ્મો થિયેટરમાં સંઘર્ષ કરી રહી છે. આવી સ્થિતિમાં કાર્તિકે ઇન્ડસ્ટ્રીને સપોર્ટ કરતાં પોતાની ફીમાં કાપ કર્યો છે. ઇન્ડસ્ટ્રીના લોકો તેમના આ નિર્ણયની પ્રશંસા કરી રહ્યા છે અને તેને પરિપક્વ નિર્ણય ગણાવી રહ્યા છે.

કાર્તિકના આ નિર્ણયની પ્રશંસા થઈ
સૂત્રોના કહેવા મુજબ, કાર્તિકના આ નિર્ણયને જવાબદાર અને સમજદારીભર્યો માનવામાં આવી રહ્યો છે, ખાસ કરીને ત્યારે જ્યારે બોક્સ ઓફિસ પર નિષ્ફળતા સામાન્ય વાત બની ગઈ છે. સફળતામાં જ્યાં કલાકારો ઉજવણી કરે છે, ત્યાં નિષ્ફળતામાં ભાર વહેંચવાનું કામ ખૂબ ઓછા લોકો કરે છે. ટ્રેડ સર્કલમાં કાર્તિકના આ નિર્ણયની પ્રશંસા થઈ રહી છે. ઘણા લોકોનું માનવું છે કે આ આજના સમયની જરૂરિયાત છે.

કાર્તિકે ફિલ્મ અને પ્રોડ્યૂસર્સનો પૂરો સાથ આપ્યો
ઇનસાઇડર્સ કહે છે કે, કાર્તિકે ફિલ્મ અને પ્રોડ્યૂસર્સનો પૂરો સાથ આપ્યો છે. તેમના આ પગલાને લીડિંગ મેન કરતાં પણ પાર્ટનર જેવું માનવામાં આવી રહ્યું છે, જે બતાવે છે કે ઇન્ડસ્ટ્રીમાં લાંબા સંબંધો ફક્ત હિટ ફિલ્મોથી નહીં, પરંતુ નિષ્ફળતાને કેવી રીતે હેન્ડલ કરવામાં આવે છે તેના પરથી પણ બને છે. વાસ્તવમાં, આ પહેલી વાર નથી જ્યારે કાર્તિકે ફિલ્મના હિતમાં આવો નિર્ણય લીધો હોય. ફિલ્મ 'શહઝાદા' ફ્લોપ થયા બાદ પણ તેમણે પ્રોડ્યૂસર્સ પરનું દબાણ ઓછું કરવા માટે પોતાની ફીનો થોડો ભાગ છોડ્યો હતો. ઇન્ડસ્ટ્રીના લોકોનું માનવું છે કે, કાર્તિકની પેઢીના ખૂબ ઓછા અભિનેતાઓ આવું જોખમ લેવાની હિંમત કરી શકે છે.

કાર્તિક અને કરણ જોહર વચ્ચે ઝગડાની વાતો
આ વચ્ચે, કાર્તિક અને કરણ જોહર વચ્ચે ઝગડાની વાતો પણ વાયરલ થઈ રહી છે, પરંતુ કરણ જોહરની ટેલેન્ટ એજન્સી DCAA અને કાર્તિક અલગ થઈ રહ્યા છે તેવી ખબરને પણ બિનઆધારભૂત ગણાવવામાં આવી છે. ધર્મા પ્રોડક્શન્સ સાથે જોડાયેલા લોકોએ જણાવ્યું છે કે, આ અફવાઓમાં કોઈ સત્ય નથી, કારણ કે કાર્તિક હાલ ધર્મા પ્રોડક્શન્સની કો-પ્રોડ્યૂસડ ફિલ્મ 'નાગઝિલ્લા' ના શૂટિંગમાં વ્યસ્ત છે. સૂત્રો તે પણ જણાવે છે કે, કાર્તિક અને કરણ વચ્ચે ત્રીજી ફિલ્મને લઈને વાતચીત ચાલી રહી છે.