Kartik Aaryan National Award: ફિલ્મ ‘ચંદુ ચેમ્પિયન’ માટે શ્રેષ્ઠ અભિનેતાનો રાષ્ટ્રીય પુરસ્કાર જીત્યા બાદ કાર્તિક આર્યન સીધો મુંબઈના લાલબાગચા રાજાના દર્શન કરવા પહોંચ્યો હતો. ગુજરાતના એકતા નગરમાં યોજાયેલા રાષ્ટ્રીય ફિલ્મ પુરસ્કાર સમારોહમાં રાષ્ટ્રપતિ દ્રૌપદી મુર્મુના હસ્તે કાર્તિકને આ સન્માન મળ્યું હતું. આ તેનો પ્રથમ રાષ્ટ્રીય પુરસ્કાર છે. અવોર્ડ મળ્યા બાદ કાર્તિકે બાપ્પાના ચરણોમાં ટ્રોફી મૂકી આશીર્વાદ લીધા હતા.
બાપ્પાના ચરણોમાં મૂકી નેશનલ અવોર્ડની ટ્રોફી
નેશનલ અવોર્ડ લઈને કાર્તિક સીધો લાલબાગચા રાજાના દર્શન કરવા પહોંચ્યો હતો. અહીં તેણે બાપ્પાની પૂજા કરી અને પોતાના રાષ્ટ્રીય પુરસ્કારની ટ્રોફી ગણપતિ બાપ્પાના ચરણોમાં મૂકી આશીર્વાદ લીધા. કાર્તિકના આ ખાસ ક્ષણના વીડિયો અને તસવીરો સોશિયલ મીડિયા પર સામે આવ્યા છે.
‘નાના શહેરના છોકરાનું સપનું પૂરું થયું’
રાષ્ટ્રીય પુરસ્કાર મળ્યા બાદ કાર્તિકે સોશિયલ મીડિયા પર ભાવુક પોસ્ટ શેર કરી હતી. તેણે ગ્વાલિયરમાંથી પોતાની સફરને યાદ કરતાં લખ્યું કે એક એવા વાતાવરણમાં અભિનેતા બનવાનું સપનું જોવાની હિંમત કરી હતી, જ્યાં લોકો ઘણીવાર આવા સપનાઓની મજાક ઉડાવે છે. તેણે કહ્યું કે જે ક્ષણનું તેણે સપનું જોયું હતું, તે હવે તેની આંખો સામે હતી અને આજે પણ તેને આ સન્માન પર વિશ્વાસ થઈ રહ્યો નથી. કાર્તિકે લખ્યું કે નાના શહેરના એક છોકરાનું સપનું હતું કે તેને રાષ્ટ્રીય ફિલ્મ પુરસ્કારમાં શ્રેષ્ઠ અભિનેતાનું સન્માન મળે. ‘ચંદુ ચેમ્પિયન’માં મુરલીકાંત પેટકરની ભૂમિકા ભજવવાની તક આપવા બદલ તેણે દિગ્દર્શક કબીર ખાન અને નિર્માતા સાજિદ નડિયાદવાલાનો આભાર માન્યો. કાર્તિકે આ સફરને મુશ્કેલ અને પીડાદાયક ગણાવી હતી, પરંતુ તેના પરિણામને ખૂબ જ ખાસ ગણાવ્યું.
માતા-પિતા અને ટીમનો માન્યો આભાર
કાર્તિકે પોતાની સફળતાનો શ્રેય પોતાના પરના વિશ્વાસ ઉપરાંત માતા-પિતાના આશીર્વાદ, બિનશરતી પ્રેમ અને મિત્રો તથા સમગ્ર ટીમના સહયોગને આપ્યો હતો. તેણે કહ્યું કે જ્યારે તે પોતે આશા ગુમાવવા લાગ્યો હતો ત્યારે મિત્રોએ તેનો ઉત્સાહ જાળવી રાખ્યો હતો. સાથે જ પોતાની પ્રોફેશનલ જિંદગી સરળ બનાવવા માટે સતત મહેનત કરતી ટીમનો પણ આભાર માન્યો હતો.
‘આ તો માત્ર શરૂઆત છે’
કાર્તિકે પોતાનું આ સન્માન દેશના દરેક પેરાલિમ્પિયન અને અશક્ય સપનાં જોવાની હિંમત કરનારા લોકો સાથે શેર કર્યું હતું. તેણે કહ્યું કે જે લોકો પોતાના સપના સાકાર કરવા માટે હાર માનતા નથી, તેમને આ સન્માન સમર્પિત છે. રાષ્ટ્રીય પુરસ્કાર માટે જ્યુરી, માહિતી અને પ્રસારણ મંત્રાલય તથા રાષ્ટ્રપતિનો આભાર માનતા કાર્તિકે અંતે કહ્યું કે આ તો માત્ર શરૂઆત છે અને આવનારા સમયમાં આવા અનેક મુકામ હાંસલ કરવાની આશા છે.
