Kangana Ranaut Supports Trisha Krishnan: બોલિવૂડની નીડર અભિનેત્રી અને મંડીથી ભારતીય જનતા પાર્ટીના સાંસદ કંગના રનૌત હંમેશા પોતાના સ્પષ્ટ વિચારો માટે જાણીતી છે. દેશનો કોઈ રાજકીય મુદ્દો હોય કે મનોરંજન જગતની ઘટના, કંગના દરેક વિષય પર પોતાનો પક્ષ રજૂ કરતી હોય છે. હાલમાં જ દક્ષિણ ભારતીય સિનેમાની જાણીતી અભિનેત્રી તૃષા કૃષ્ણન અને અભિનેતા તથા તમિલનાડુ વેટ્રી કઝગમ (TVK) પાર્ટીના વડા થલપતિ વિજય વચ્ચેના અફવાભર્યા સંબંધોને લઈને મોટો વિવાદ ઊભો થયો છે. આ વિવાદમાં સોશિયલ મીડિયાથી લઈને રાજકીય મંચ સુધી તૃષાને નિશાન બનાવવામાં આવી રહી છે. ત્યારે હવે કંગના રનૌત તૃષાના સમર્થનમાં આગળ આવી છે અને તેનો બચાવ કરતા વિરોધીઓને આકરો જવાબ આપ્યો છે.
મહિલાઓને જ કેમ બનાવવામાં આવે છે નિશાન?
કંગના રનૌતે દક્ષિણ ભારતમાં ચાલી રહેલા આ વિવાદ પર પ્રતિક્રિયા આપતા મહિલાઓ સામે થતા મૌખિક દુર્વ્યવહાર અને ચરિત્રહનન સામે આક્રોશ વ્યક્ત કર્યો છે. તેણે કોઈનું સીધું નામ લીધા વિના જણાવ્યું હતું કે, તમે જોયું હશે કે તમિલનાડુમાં શું ઘટના બની છે. જેમાં એક ખૂબ જ આદરણીય અને સફળ અભિનેત્રી સામેલ છે. જ્યારે બે વ્યક્તિઓ વચ્ચે કોઈ બાબત કે સંબંધ ચર્ચામાં આવે છે, ત્યારે તેની અસર બંને પક્ષો પર પડતી હોય છે. પરંતુ અફસોસની વાત એ છે કે જ્યારે વ્યક્તિગત ટીકા કરવાની કે ચરિત્ર પર સવાલો ઉઠાવવાની વાત આવે છે, ત્યારે હંમેશા પુરુષોને બદલે માત્ર મહિલાઓને જ નિશાન બનાવવામાં આવે છે.
વિશ્વભરમાં સફળ મહિલાઓ સામેનું મનોવલણ
પોતાના નિવેદનને વધુ સ્પષ્ટ કરતા કંગના રનૌતે કહ્યું કે, આ માનસિકતા માત્ર ભારત કે કોઈ એક રાજ્ય પૂરતી સીમિત નથી, પરંતુ સમગ્ર વિશ્વમાં આવું જ જોવા મળે છે. સમાજમાં જ્યારે પણ કોઈ મહિલા પોતાના દમ પર સફળ થાય છે, ત્યારે તેને નીચે પાડવાનો પ્રયાસ કરવામાં આવે છે. પછી તે કામ કરતી સામાન્ય મહિલા હોય, ફિલ્મ અભિનેત્રી હોય, રાજકારણી હોય કે પછી કોઈ ઉચ્ચ હોદ્દા પર બેઠેલી સત્તાધીશ મહિલા હોય, વિરોધીઓ તેમની ક્ષમતા કે કામ પર વાત કરવાના બદલે સૌથી પહેલા તેમના નૈતિક ચરિત્ર પર જ આંગળી ઉઠાવે છે. આ એક અત્યંત ચિંતાજનક અને દુઃખદ બાબત છે.
રાજકીય મંચ પરથી વિવાદિત ટિપ્પણીનો મામલો
આ સમગ્ર વિવાદની શરૂઆત તંજાવુરમાં આયોજિત એક રાજકીય પ્રદર્શન દરમિયાન થઈ હતી. કાવેરી જળ વિવાદ અને મેકેદાતુ પ્રોજેક્ટના વિરોધમાં ડીએમકે (DMK) ના નેતા ઉદયનિધિ સ્ટાલિન એક જનસભાને સંબોધિત કરી રહ્યા હતા. આ ભાષણ દરમિયાન તેમણે અભિનેતા અને રાજકારણી વિજય પર આકરા પ્રહારો કર્યા હતા. જોકે, ભાષણ દરમિયાન જ્યારે ભીડમાંથી કેટલાક લોકોએ અભિનેત્રી તૃષાનું નામ બોલવાનું શરૂ કર્યું, ત્યારે ઉદયનિધિએ તમિલ ભાષામાં એક દ્વિઅર્થી ટિપ્પણી કરી હતી, જેનો આશરે અર્થ એવો થતો હતો કે "પાણી બીજે ક્યાંયથી આવે કે ન આવે, પાણી ત્યાં જ વહેવું જોઈએ."જોકે તેમણે તરત જ સ્પષ્ટતા કરી કે તેમની ટિપ્પણી કાવેરી પાણીના મુદ્દાનો ઉલ્લેખ કરે છે.
ટિપ્પણી બાદ મોટો બબાલ અને ધરપકડ
ઉદયનિધિ સ્ટાલિનની આ વિવાદિત ટિપ્પણીનો વીડિયો વાયરલ થતાં જ ભારે વિરોધ શરૂ થયો હતો. જાહેર મંચ પરથી એક પ્રતિષ્ઠિત અભિનેત્રી વિશે આવી આક્ષેપપાત્ર અને વાંધાજનક ટિપ્પણી કરવા બદલ શાસક અને વિરોધ પક્ષો તરફથી પણ તેમની આકરી ટીકા કરવામાં આવી હતી. વિવાદ વકરતાં અને કાનૂની કાર્યવાહી થતાં 4 ઓગસ્ટના રોજ ચેન્નાઈ સ્થિત નિવાસસ્થાનેથી તેમની ધરપકડ કરવામાં આવી હતી. તેમની સામે મહિલા સન્માનને ઠેસ પહોંચાડવા બદલ કેસ નોંધવામાં આવ્યો હતો, જોકે બાદમાં તેમને જામીન મળી ગયા હતા. કંગનાના આ નિવેદન બાદ હવે સિનેમા અને રાજકારણ ક્ષેત્રે મહિલાઓના સન્માનનો મુદ્દો ફરી એકવાર જોરશોરથી ચર્ચામાં આવ્યો છે.
