Kangana Ranaut Gen Alpha: ભાજપ સાંસદ અને અભિનેત્રી કંગના રનૌત ફરી એકવાર પોતાના નિવેદનને કારણે ચર્ચામાં આવી છે. સોશિયલ મીડિયા પર એક પોસ્ટ શેર કરીને કંગનાએ પોતાને Gen-Alpha ગણાવી છે. તેમનું આ નિવેદન એવા સમયે આવ્યું છે, જ્યારે Gen-Zને લઈને તેમના અગાઉના ‘ગટર જનરેશન’વાળા નિવેદનની હજુ પણ ચર્ચા ચાલી રહી છે. કંગના રનૌત સોશિયલ મીડિયા પર દરેક મુદ્દે ખુલ્લેઆમ પોતાના વિચારો વ્યક્ત કરવા માટે જાણીતી છે. જોકે, તેમના કેટલાક નિવેદનો વિવાદનું કારણ પણ બન્યા છે.
Gen-Zને 'ગટર જનરેશન' કહીને સર્જ્યો હતો વિવાદ
થોડા સમય પહેલાં NEET પેપર લીક મામલે Gen-Z વિદ્યાર્થીઓના વિરોધ પ્રદર્શનને લઈને કંગના રનૌતે ટિપ્પણી કરી હતી. જંતર-મંતર પર વિરોધ અને સંસદ માર્ચ દરમિયાન કેટલાક વિદ્યાર્થીઓ દ્વારા વડાપ્રધાન નરેન્દ્ર મોદી વિરુદ્ધ અપશબ્દોનો ઉપયોગ કરવામાં આવ્યો હોવાનો ઉલ્લેખ કરતા કંગનાએ Gen-Z માટે ‘ગટર જનરેશન’ જેવા શબ્દોનો ઉપયોગ કર્યો હતો. તેમના આ નિવેદન બાદ સોશિયલ મીડિયા પર ભારે ટીકા થઈ હતી. અનેક લોકો અને સેલિબ્રિટીઝે કંગનાના નિવેદન સામે વાંધો વ્યક્ત કર્યો હતો.
હવે કંગનાએ પોતાને Gen-Alpha ગણાવી
આ વિવાદ વચ્ચે કંગનાએ પોતાની Instagram Story પર એક યુવા મહિલા ઇન્ફ્લુએન્સરનો વીડિયો શેર કર્યો હતો. આ વીડિયોમાં ઇન્ફ્લુએન્સર Gen-Zને લઈને પોતાની વાત રજૂ કરતી જોવા મળી રહી હતી. વીડિયો શેર કરતા કંગનાએ લખ્યું કે હવે તે સત્તાવાર રીતે પોતાને Gen-Alpha માને છે. તેમણે Gen-Alphaનો અર્થ સમજાવતા કહ્યું કે સીધા મુદ્દા પર આવવું અને બિનજરૂરી વાતો ન કરવી. કંગનાની આ પોસ્ટ ફરી સોશિયલ મીડિયા પર ચર્ચાનો વિષય બની છે.
Gen-Z પર નિવેદન બાદ પણ કંગનાની ટીકા ચાલુ
કંગનાએ અગાઉ Gen-Z માટે આકરા શબ્દોનો ઉપયોગ કર્યો હતો, જોકે બાદમાં તેમણે આ પેઢીને દેશની તાકાત અને સંપત્તિ પણ ગણાવી હતી. તેમ છતાં, તેમના અગાઉના નિવેદનને લઈને વિવાદ સંપૂર્ણપણે શાંત થયો નથી. બોલિવૂડની કેટલીક હસ્તીઓ ઉપરાંત યોગગુરુ સ્વામી રામદેવે પણ કંગનાના નિવેદનની ટીકા કરી હતી. ત્યારબાદ કંગનાએ પણ રામદેવ પર વળતો પ્રહાર કર્યો હતો. હવે કંગનાના નવા Gen-Alpha નિવેદનને લોકો કેવી રીતે લે છે અને Gen-Z સાથે ચાલી રહેલો તેમનો આ સોશિયલ મીડિયા વિવાદ ક્યાં સુધી પહોંચે છે તે જોવું રસપ્રદ રહેશે.
કંગનાના વર્કફ્રન્ટની વાત કરીએ તો...
કંગના રનૌત ટૂંક સમયમાં 'ક્વીન 2'માં જોવા મળશે. ફિલ્મનું શૂટિંગ પૂર્ણ થઈ ચૂક્યું છે. આ પહેલાં તેઓ ‘ભારત ભાગ્ય વિધાતા’ ફિલ્મમાં જોવા મળ્યા હતા, જે હાલમાં ZEE5 પર સ્ટ્રીમ થઈ રહી છે.
