Kangana Ranaut Baba Ramdev Row: ભાજપ સાંસદ અને અભિનેત્રી કંગના રણૌત તથા યોગગુરુ બાબા રામદેવ વચ્ચેનો શાબ્દિક વિવાદ વધુ ઉગ્ર બન્યો છે. Gen Z અંગે કંગનાના નિવેદનથી શરૂ થયેલી આ ટકરાવની વચ્ચે હવે અભિનેત્રીએ બાબા રામદેવના વ્યવસાય અને તેમના નિવેદનોને લઈને ફરી સવાલો ઉઠાવ્યા છે. એક ન્યૂઝ ચેનલ સાથેની વાતચીતમાં કંગનાએ બાબા રામદેવ પર આકરા પ્રહારો કર્યા હતા.
'યોગ-આયુર્વેદથી શરૂઆત કરી, હવે અન્ડરગાર્મેન્ટ્સ વેચે છે'
બાબા રામદેવ પર નિશાન સાધતા કંગનાએ તેમના સ્વદેશી અભિયાન અને વ્યવસાયના વિસ્તરણનો ઉલ્લેખ કર્યો હતો. તેમણે કહ્યું હતું કે શરૂઆત યોગ અને આયુર્વેદથી થઈ હતી, પરંતુ સમય જતાં તેમનો વ્યવસાય અનેક ક્ષેત્રોમાં ફેલાયો છે. કંગનાના જણાવ્યા મુજબ, બાબા રામદેવ હવે બનિયાન અને અન્ડરગાર્મેન્ટ્સ સહિત વિવિધ પ્રોડક્ટ્સના વ્યવસાય સાથે જોડાયેલા છે. તેમણે આ સંદર્ભમાં સનાતન વિચારધારા અને મૂડીવાદ વચ્ચેના સંબંધને લઈને પણ પોતાની વાત રજૂ કરી હતી.
કંગનાનો વધુ એક સવાલઃ 'મારી જવાનીમાં એવું શું જોયું?'
કંગનાએ બાબા રામદેવના અગાઉના નિવેદનનો ઉલ્લેખ કરતાં વળતો સવાલ પણ કર્યો હતો. તેમણે કટાક્ષભર્યા અંદાજમાં પૂછ્યું હતું કે બાબા રામદેવ તેમની જવાની અને ભૂતકાળ વિશે આ પ્રકારની વાતો કયા આધાર પર કરી રહ્યા છે. કંગનાએ એવો પણ સવાલ ઉઠાવ્યો કે શું બાબા રામદેવ તેમની અંગત જિંદગી વિશે આટલી ચોક્કસ રીતે જાણે છે? તેમના આ નિવેદન બાદ બંને વચ્ચેનો વિવાદ ફરી ચર્ચામાં આવ્યો છે.
ક્યાંથી શરૂ થયો હતો સમગ્ર વિવાદ?
આ વિવાદની શરૂઆત કંગના રણૌતના Gen Z અંગેના નિવેદનથી થઈ હતી. CJP પ્રોટેસ્ટ દરમિયાન કંગનાએ કેટલાક પ્રદર્શનકારીઓ માટે 'ગટર જનરેશન' જેવા શબ્દોનો ઉપયોગ કર્યો હતો. વિવાદ વધ્યા બાદ કંગનાએ સ્પષ્ટતા કરી હતી કે તેમનો ઈરાદો સમગ્ર Gen Z પેઢીને નિશાન બનાવવાનો નહોતો, પરંતુ અભદ્ર ભાષાનો ઉપયોગ કરનારા કેટલાક પ્રદર્શનકારીઓ અંગે તેઓ બોલી રહ્યા હતા.
બાબા રામદેવે પણ કંગના પર કર્યો હતો પ્રહાર
કંગનાના નિવેદન બાદ બાબા રામદેવે પણ અભિનેત્રી પર વળતો પ્રહાર કર્યો હતો. તેમણે કંગનાના બાળપણ, જવાની અને ભૂતકાળ અંગે ટિપ્પણી કરતા કહ્યું હતું કે આવા લોકોની માનસિકતા અંગે વાત કરવાની તેઓ ઈચ્છા રાખતા નથી. તેમણે કંગનાની પાર્ટીએ પણ આવા નિવેદનોની ગંભીરતાથી નોંધ લેવી જોઈએ તેવી ટિપ્પણી કરી હતી.
ઈન્સ્ટાગ્રામ સ્ટોરીથી કંગનાનો પલટવાર
બાબા રામદેવના નિવેદન બાદ કંગનાએ સોશિયલ મીડિયા પર પણ જવાબ આપ્યો હતો. ઈન્સ્ટાગ્રામ સ્ટોરીમાં તેમણે બાબા રામદેવને પોતાની જવાની અને અંગત જીવન અંગે ટિપ્પણી ન કરવાની સલાહ આપી હતી. સાથે જ કંગનાએ બાબા રામદેવ સાથે જોડાયેલા અગાઉના કાનૂની વિવાદોનો ઉલ્લેખ કરીને તેમના દાવાઓ સામે પણ સવાલો ઉઠાવ્યા હતા.
બાબા રામદેવઃ હવે વધુ ટિપ્પણી નહીં કરું
કંગનાના પલટવાર બાદ બાબા રામદેવે પણ પ્રતિક્રિયા આપી હતી. તેમણે કહ્યું હતું કે તેઓ આવા ક્ષુલ્લક અને નીચા સ્તરના લોકો અંગે વધુ કોઈ ટિપ્પણી કરવા માંગતા નથી. આ રીતે એક નિવેદનથી શરૂ થયેલો કંગના રણૌત અને બાબા રામદેવ વચ્ચેનો વિવાદ હવે સોશિયલ મીડિયા, રાજકારણ અને જાહેર મંચ સુધી પહોંચી ગયો છે. બંને તરફથી થઈ રહેલી ટિપ્પણીઓને કારણે આ મામલો સતત ચર્ચામાં છે.
