Jailer 2 Box Office Collection: ભારતીય સિનેમાના સુપરસ્ટાર રજનીકાંતની બહુચર્ચિત ફિલ્મ ‘જેલર 2’ હાલ બોક્સ ઓફિસ પર કમાલનું પ્રદર્શન કરી રહી છે. રિલીઝના પહેલા દિવસથી જ દર્શકો તરફથી મળી રહેલા અદ્ભુત પ્રતિસાદના કારણે આ ફિલ્મ રોજ નવા રેકોર્ડ સર્જી રહી છે. થિયેટરોમાં ચાહકોનો ઉત્સાહ જોતાં એવું લાગી રહ્યું છે કે તેની સામે અન્ય કોઈ ફિલ્મ ટકી શકે તેમ નથી. તમિલનાડુ અને સમગ્ર દક્ષિણ ભારતમાં પોતાની સફળતાનો ઝંડો લહેરાવ્યા બાદ હવે આ ફિલ્મે કર્ણાટકના બોક્સ ઓફિસ પર પણ એક નવો ઈતિહાસ રચી દીધો છે. કર્ણાટકના સિનેમાઘરોમાં રજનીકાંતના ચાહકો આ ફિલ્મને ખૂબ જ પ્રેમ આપી રહ્યા છે, જેના કારણે કલેક્શનનો આંકડો ઝડપથી વધી રહ્યો છે.
15 દિવસમાં દેશ અને દુનિયાભરમાં કરી અધધ કમાણી
ફિલ્મની કમાણીની વાત કરીએ તો ‘જેલર 2’એ ભારતીય બોક્સ ઓફિસ પર પ્રથમ દિવસે જ રૂ. 59.70 કરોડની ધમાકેદાર ઓપનિંગ કરી હતી. ત્યારબાદ ફિલ્મે તેના પ્રથમ અઠવાડિયે રૂ. 334.35 કરોડ અને બીજા અઠવાડિયે રૂ. 95.20 કરોડનો શાનદાર બિઝનેસ કર્યો હતો. આ સાથે જ માત્ર 15 દિવસની અંદર આ ફિલ્મે ભારતમાં કુલ રૂ. 429.55 કરોડનું નેટ કલેક્શન કરી લીધું છે. એટલું જ નહીં, વર્લ્ડવાઈડ માર્કેટમાં પણ રજનીકાંતનો જાદુ ચાલ્યો છે. 15 દિવસમાં વિશ્વભરમાંથી આ ફિલ્મે રૂ. 766.65 કરોડની કમાણી કરી લીધી છે, જેમાં વિદેશી માર્કેટ (ઓવરસીઝ) માંથી મળેલો રૂ. 264 કરોડનો ગ્રોસ આંકડો પણ સામેલ છે.
ધુરંધર અને RRR જેવી મોટી ફિલ્મોને આપી પછાડ
કર્ણાટક બોક્સ ઓફિસ પર નોન-કન્નડ ફિલ્મોની યાદીમાં ‘જેલર 2’એ ધમાકેદાર એન્ટ્રી કરીને ઘણી મોટી મેગા-બજેટ ફિલ્મોને પાછળ છોડી દીધી છે. ટ્રેડ રિપોર્ટ્સ અનુસાર, આ ફિલ્મે કર્ણાટકમાં માત્ર 14 દિવસમાં રૂ. 85.2 કરોડનો બિઝનેસ કરી લીધો છે. આ કમાણી સાથે જ તે કર્ણાટકમાં સૌથી વધુ કમાણી કરનારી નોન-કન્નડ ફિલ્મોની યાદીમાં ચોથા સ્થાને પહોંચી ગઈ છે. આ કલેક્શન સાથે રજનીકાંતની આ ફિલ્મે 'બાહુબલી 1' (રૂ. 85 કરોડ), 'ધુરંધર' (રૂ. 82 કરોડ) અને 'RRR' (રૂ. 81 કરોડ) જેવી સુપરહિટ ફિલ્મોના રેકોર્ડ તોડી નાખ્યા છે.
કર્ણાટકમાં સૌથી વધુ કમાણી કરનારી ટોપ નોન-કન્નડ ફિલ્મો
કર્ણાટકના બોક્સ ઓફિસ પર જે નોન-કન્નડ ફિલ્મોએ સૌથી વધુ બિઝનેસ કર્યો છે તેમાં હવે ‘જેલર 2’ આગવું સ્થાન ધરાવે છે. પ્રથમ સ્થાને 'ધુરંધર 2' રૂ. 134 કરોડ સાથે અને બીજા સ્થાને 'બાહુબલી 2' રૂ. 130 કરોડ સાથે છે. ત્યારપછી 'પુષ્પા 2' રૂ. 95.3 કરોડ સાથે ત્રીજા ક્રમે છે, જ્યારે રૂ. 85.2 કરોડ સાથે 'જેલર 2' ચોથા ક્રમે આવી ગઈ છે. ટ્રેડ એનાલિસ્ટ્સનું માનવું છે કે જે રીતે ફિલ્મની કમાણીની રફતાર જળવાઈ રહી છે, તે જોતાં આ ફિલ્મ ટૂંક સમયમાં કર્ણાટકમાં રૂ. 100 કરોડના ક્લબમાં પણ સ્થાન મેળવી લેશે.
રજનીકાંતના કરિયરની અને તમિલ સિનેમાની સૌથી મોટી સફળતા
વર્ષ 2023માં આવેલી બ્લોકબસ્ટર ફિલ્મ ‘જેલર’ની આ સિક્વલે સફળતાના તમામ જૂના માપદંડો બદલી નાખ્યા છે. આ ફિલ્મે રજનીકાંતની જ પોતાની અગાઉની સૌથી વધુ કમાણી કરનારી ફિલ્મ '2.0'નો રેકોર્ડ પણ તોડી નાખ્યો છે. આ સાથે જ ‘જેલર 2’ હવે સુપરસ્ટાર રજનીકાંતના સમગ્ર કરિયરની સાથે સાથે તમિલ સિનેમા ઇન્ડસ્ટ્રીની પણ સૌથી વધુ કમાણી કરનારી ફિલ્મ બની ગઈ છે. ચાહકો અને સમીક્ષકો તરફથી મળી રહેલા અપાર પ્રેમના કારણે ફિલ્મ બોક્સ ઓફિસ પર સતત નવા કીર્તિમાન સ્થાપિત કરી રહી છે.
