Iranian Actress Agni Agyari: અબાલ-વૃદ્ધ સૌના દિલ જીતી લેનારી ફિલ્મ 'હનુમાન અંશ'માં કામ કરનારા લગભગ તમામ કલાકારોની ફેન ફોલોઈંગ અને લોકપ્રિયતામાં મોટો ઉછાળો આવ્યો છે. આ ફિલ્મમાં માત્ર નાનો રોલ કે એકાદ ગીતમાં સ્પેશિયલ અપીયરન્સ આપનારા કલાકારો પણ લોકોના દિલમાં વસી ગયા છે. આવી જ એક ખાસ ચમક ઈરાનમાં જન્મેલી અને ભારતીય મનોરંજન જગતમાં સક્રિય બોલિવૂડ એક્ટ્રેસ અગ્નિ અગ્યારીની જોવા મળી છે. ફિલ્મ 'હનુમાન અંશ'ના સુપરહિટ ગીત 'પાર્વતી'માં તેની નાની એવી ઝલકે યુટ્યુબ અને સોશિયલ મીડિયા પર ધૂમ મચાવી દીધી છે.
માત્ર પર્ફોર્મન્સથી જીત્યા મિલિયન્સ ફેન્સના દિલ
અગ્નિ અગ્યારીની આ સફળતા અને વાયરલ થવાની સૌથી રસપ્રદ વાત એ છે કે તેણે આ ગીતમાં પોતાનો અવાજ આપ્યો નથી, પરંતુ માત્ર પોતાની શાનદાર સ્ક્રીન પ્રેઝન્સ અને મ્યુઝિકલ એક્સપ્રેસન્સથી પર્ફોર્મ કર્યું છે. ગીત રિલીઝ થતા જ સિનેપ્રેમીઓનું ધ્યાન તેના પર કેન્દ્રિત થઈ ગયું હતું. લોકો તેના ભૂતકાળના કામ અને શોર્ટ રોલ્સને પણ ઓનલાઈન સર્ચ કરવા લાગ્યા છે. પોતાની આ અણધારી અને અદભુત સફળતાથી ગદગદ થયેલી અગ્નિએ તાજેતરમાં આપેલા એક ઈન્ટરવ્યુમાં અનહદ ખુશી વ્યક્ત કરી હતી.
ગીતમાં કાસ્ટ થવા પાછળનું મ્યુઝિકલ કનેક્શન
ઈન્ટરવ્યુ દરમિયાન અગ્નિએ ખુલાસો કર્યો હતો કે આ ગીતમાં તેની પસંદગી માત્ર તેની એક્ટિંગ કે ગ્લેમરના કારણે નહીં, પરંતુ તેના સંગીત પ્રત્યેના જ્ઞાનને લીધે થઈ હતી. તે જાણીતા વાજિંત્રો જેવા કે 'હેન્ડપેન' અને 'કાહૂન' (ક્લેપ બોક્સ) વગાડવામાં ખૂબ નિપુણ છે. ગીતના મેકર્સને એક એવી કલાકાર જોઈતી હતી જે સ્ક્રીન પર સંગીતના સાધનોને યોગ્ય અને કુદરતી રીતે પર્ફોર્મ કરી શકે. તેના આ મ્યુઝિકલ ટેલેન્ટે તેને આ વાયરલ ગીતમાં લીડ રોલ મેળવવામાં મદદ કરી.
બાળપણથી જ ભારતીય સંસ્કૃતિ અને ભજનો પ્રત્યે રહ્યો છે વિશેષ લગાવ
ઈરાનમાં જન્મેલી હોવા છતાં અગ્નિ અગ્યારીનો ભારતીય સંસ્કૃતિ અને આધ્યાત્મિકતા સાથે ખૂબ જ ઊંડો અને જૂનો સંબંધ રહ્યો છે. અગ્નિએ પોતે શેર કર્યું હતું કે જ્યારે તે નાની હતી અને તેને હિન્દી કે સંસ્કૃત ભાષા આવડતી નહોતી, ત્યારે પણ તે હિન્દુ ભજનો સાંભળીને તેને પોતાની માતૃભાષા પર્શિયનમાં લખી લેતી હતી અને ગણગણતી હતી. આ ભારતીય સંગીત અને સંસ્કૃતિ પ્રત્યેનો તેનો પ્રેમ જ હતો જે તેને ઈરાનથી ભારત તરફ ખેંચી લાવ્યો.
બોલિવૂડના કિંગ ખાન અને કરીના કપૂર સાથે કરી ચૂકી છે કામ
ભારતમાં છેલ્લા ચાર વર્ષથી સતત એક્ટિંગ અને મોડેલિંગ ક્ષેત્રે સક્રિય રહેલી અગ્નિ અગ્યારી માટે આ ઈન્ડસ્ટ્રી તદ્દન નવી નથી. ફિલ્મ 'હનુમાન અંશ' પહેલા પણ તે ભારતીય એડવર્ટાઇઝિંગ ઈન્ડસ્ટ્રીમાં સારું એવું નામ કમાઈ ચૂકી છે. તેણે બોલિવૂડના સુપરસ્ટાર શાહરૂખ ખાન અને ગ્લેમરસ એક્ટ્રેસ કરીના કપૂર ખાન જેવા ટોચના કલાકારો સાથે ઘણી મોટી બ્રાન્ડ્સની કમર્શિયલ એડ્સમાં કામ કર્યું છે. જોકે, 'પાર્વતી' ગીતે તેને ઘરે-ઘરે જાણીતી બનાવી દીધી છે.








