Gujarati Movie Damru Screen Controversy: ગુજરાતી ફિલ્મ ‘ડમરુ’ને દર્શકો તરફથી સારો પ્રતિસાદ મળી રહ્યો હોવા છતાં પૂરતી સ્ક્રીન અને શો ન મળતાં વિવાદ ઊભો થયો છે. ગુજોત્સવ પ્રોડક્શન્સ અને વ્રજ ફિલ્મ્સના બેનર હેઠળ બનેલી તથા હાર્દિક પરીખ દ્વારા નિર્દેશિત આ કૉમેડી-ડ્રામા ફિલ્મના કેટલાક શો હાઉસફુલ જઈ રહ્યા હોવાનો દાવો ટીમે કર્યો છે. તેમ છતાં તહેવારોની મોસમમાં હિન્દી અને અન્ય ભાષાની મોટી ફિલ્મોના દબાણ વચ્ચે ‘ડમરુ’ને પૂરતા શો ન મળતાં ફિલ્મની ટીમે રાજ્ય સરકાર, મુખ્યમંત્રી, ગૃહમંત્રી અને સિનેમા માલિકોને રજૂઆત કરી છે. ટીમની માગ છે કે ગુજરાતી ફિલ્મને પણ દર્શકોની માંગ પ્રમાણે યોગ્ય સ્ક્રીન અને ઓછામાં ઓછા એકથી બે શો ફાળવવામાં આવે.
દર્શકોનો પ્રેમ મળ્યો, છતાં ‘ડમરુ’ને પૂરતી સ્ક્રીન નહીં
‘ડમરુ’ ફિલ્મમાં સંજય ગોરડિયા, નક્ષરાજ, મૌલિક ચૌહાણ અને મકરેન્દ શુક્લા સહિતના કલાકારો જોવા મળે છે. ફિલ્મ રિલીઝ થયા બાદ દર્શકો તરફથી સારો પ્રતિસાદ મળી રહ્યો હોવાનું નિર્માતાઓનું કહેવું છે. કેટલાક શો હાઉસફુલ થવા છતાં ફિલ્મને પૂરતી સ્ક્રીન અને અનુકૂળ સમયના શો આપવામાં આવતા નથી તેવી ફરિયાદ ટીમે કરી છે. ફિલ્મની ટીમના જણાવ્યા અનુસાર, તહેવારો દરમિયાન મોટી હિન્દી અને અન્ય ભાષાની ફિલ્મો રિલીઝ થવાથી મલ્ટિપ્લેક્સ અને થિયેટરોમાં સ્ક્રીન ફાળવણીને લઈને દબાણ રહે છે. તેના કારણે સ્થાનિક દર્શકોમાં માંગ હોવા છતાં ગુજરાતી ફિલ્મોના શો ઘટાડી દેવામાં આવે છે અથવા ઓછા અનુકૂળ સમયે રાખવામાં આવે છે.
મોટી ફિલ્મોના દબાણ વચ્ચે ગુજરાતી સિનેમાની મુશ્કેલી
તહેવારોની મોસમમાં મોટા બજેટની ફિલ્મો સિનેમાઘરોમાં રિલીઝ થાય છે. આવી ફિલ્મોના વિતરણ અને સ્ક્રીન ફાળવણી અંગેની શરતોને કારણે સ્થાનિક ભાષાની ફિલ્મોને પૂરતી જગ્યા મળતી નથી તેવી રજૂઆત ‘ડમરુ’ની ટીમે કરી છે. ટીમનું કહેવું છે કે આ પરિસ્થિતિની અસર માત્ર ફિલ્મના બોક્સ ઓફિસ કલેક્શન પૂરતી મર્યાદિત નથી. ગુજરાતી ફિલ્મ ઉદ્યોગ સાથે જોડાયેલા કેમેરામેન, લાઇટમેન, સ્પોટબોય અને અન્ય કલાકારો તથા ટેક્નિકલ કર્મચારીઓની રોજગારી પર પણ તેની અસર પડી શકે છે.
મધ્યમ વર્ગ માટે પોસાય તેવું મનોરંજન ક્યાં?
‘ડમરુ’ની ટીમે ટિકિટના ભાવનો મુદ્દો પણ ઉઠાવ્યો છે. તેમના જણાવ્યા મુજબ, તહેવારો દરમિયાન કેટલીક મોટી ફિલ્મોની ટિકિટના ભાવ રૂ. 1,500થી રૂ. 2,000 સુધી પહોંચે છે, જે સામાન્ય અને મધ્યમ વર્ગના પરિવારો માટે મોંઘા સાબિત થઈ શકે છે. બીજી તરફ, ગુજરાતી ફિલ્મોની ટિકિટ સામાન્ય રીતે રૂ. 100થી રૂ. 200ની આસપાસ હોવાથી સ્થાનિક દર્શકોને પોસાય તેવું મનોરંજન મળી શકે છે. ટીમનો સવાલ છે કે જો માતૃભાષાની ફિલ્મોને પૂરતા શો જ નહીં મળે, તો ગુજરાતી દર્શકો પોતાની ભાષાની ફિલ્મ જોવાની તકથી વંચિત રહી જશે. ટીમે સ્પષ્ટ કર્યું છે કે તેઓ અન્ય ભાષાની મોટી ફિલ્મોના વિરોધમાં નથી. તેમની માત્ર એટલી માગ છે કે ગુજરાતી ફિલ્મને પણ દરેક સિનેમાઘરમાં ઓછામાં ઓછા એકથી બે શો આપવામાં આવે.
મુખ્યમંત્રી અને ગૃહમંત્રી સમક્ષ ટીમ ‘ડમરુ’ની રજૂઆત
આ પરિસ્થિતિને ધ્યાનમાં રાખીને ફિલ્મના નિર્માતાઓ અને ટીમે ગુજરાતના મુખ્યમંત્રી, ગૃહમંત્રી, રાજ્ય સરકાર, સિનેમા માલિકો અને ડિસ્ટ્રિબ્યુટર્સને અપીલ કરી છે.
ટીમની મુખ્ય માગણીઓ આ પ્રમાણે છે:
દરેક મલ્ટિપ્લેક્સ અને થિયેટરમાં ‘ડમરુ’ને યોગ્ય સ્ક્રીન ફાળવવામાં આવે.
દર્શકોની માંગને ધ્યાનમાં રાખીને ઓછામાં ઓછા એકથી બે શો રાખવામાં આવે.
ગુજરાતી ફિલ્મોને અનુકૂળ સમયના શો મળે.
પ્રાદેશિક ભાષાની ફિલ્મોને પણ સિનેમાઘરોમાં યોગ્ય સ્થાન મળે.
ગુજરાતી ફિલ્મ ઉદ્યોગના ભવિષ્યનો સવાલ
‘ડમરુ’ને લઈને ઊભો થયેલો આ વિવાદ ગુજરાતી ફિલ્મ ઉદ્યોગ માટે સ્ક્રીન ફાળવણીનો મોટો મુદ્દો ફરી ચર્ચામાં લાવ્યો છે. સ્થાનિક ભાષાની ફિલ્મોને દર્શકોનો પ્રતિસાદ મળ્યા પછી પણ પૂરતા શો ન મળે તો તેમની કમાણી અને આગળના પ્રદર્શન પર અસર થઈ શકે છે. હવે રાજ્ય સરકાર, સિનેમા માલિકો અને ડિસ્ટ્રિબ્યુટર્સ આ રજૂઆતને કેટલી ગંભીરતાથી લે છે અને ‘ડમરુ’ને વધુ સ્ક્રીન તથા શો મળે છે કે નહીં તેના પર સૌની નજર રહેશે.
