Diljit Dosanjh Indore Concert Song Restrictions: મશહૂર પંજાબી ગાયક અને અભિનેતા દિલજીત દોસાંઝનો 'ઓરા ઈન્ડિયા ટૂર' કોન્સર્ટ આગામી 15 નવેમ્બરે મધ્યપ્રદેશના ઈન્દોર શહેરમાં યોજાવા જઈ રહ્યો છે. આ મ્યુઝિક શોને લઈને ચાહકોમાં ભારે ઉત્સાહ જોવા મળી રહ્યો છે, પરંતુ તે પહેલાં જ એક મોટા વિવાદ અને વહીવટી કાર્યવાહી સામે આવી છે. સ્થાનિક જિલ્લા બાળ સુરક્ષા અધિકારી અને તંત્ર દ્વારા દિલજીતના 4 સૌથી લોકપ્રિય ગીતો સ્ટેજ પર ગાવા સામે કડક પ્રતિબંધ લાદવામાં આવ્યો છે.
કયા 4 ગીતો પર મુકાયો બેન અને શા માટે?
તંત્ર દ્વારા જે 4 ગીતો પર પ્રતિબંધ મૂકવામાં આવ્યો છે તેમાં 'પટિયાલા પેગ', '5 તારા ઠેકે', 'કેસ (જેબ વિ ચોં અફીમ)' અને 'જટ્ટ ફાયર કરદા'નો સમાવેશ થાય છે. આ ગીતોના લિરિક્સમાં દારૂ, નશીલા પદાર્થો અને ગન કલ્ચર (હિંસા)નો ઉલ્લેખ હોવાથી તંત્રએ આ આદેશ આપ્યો છે. આ કાર્યક્રમમાં 5 વર્ષ કે તેથી વધુ વયના બાળકો પણ ભાગ લઈ રહ્યા હોવાથી, આ પ્રકારના બોલ બાળકોની માનસિકતા પર નકારાત્મક અસર પાડી શકે છે તેવો તર્ક રજૂ કરવામાં આવ્યો છે.
ચંડીગઢના પ્રોફેસરની ફરિયાદ બાદ લેવાયો નિર્ણય
આ સમગ્ર મામલે કાર્યવાહી ચંડીગઢના આસિસ્ટન્ટ પ્રોફેસર ડૉ. પંડિતરાવ ધરેણવરની લેખિત ફરિયાદ બાદ કરવામાં આવી છે. તેમણે પંજાબ-હરિયાણા હાઈકોર્ટના જૂના ચૂકાદાનો હવાલો આપીને બાળકોને સ્ટેજ પર ન બોલાવવા અને ગાયકના કારતૂસવાળા પટ્ટા પહેરવા સામે પણ વાંધો ઉઠાવ્યો હતો. તંત્રએ આદેશ આપ્યો છે કે ગીતોના બોલ (લિરિક્સ) બદલીને કે મોડિફાય કરીને પણ આ 4 ગીતો સ્ટેજ પર રજૂ કરી શકાશે નહીં.
ચાહકોની ઉત્સુકતા વચ્ચે દિલજીતે આપી સ્પષ્ટતા
સુરક્ષાની આશંકાઓ અને વિવાદો વચ્ચે ગાયક દિલજીત દોસાંઝે સોશિયલ મીડિયા પર ચાહકોને આશ્વાસન આપ્યું છે કે તેનો આ કાર્યક્રમ નક્કી કરેલા સમયે 15 નવેમ્બરે જ યોજાશે. તેણે ઈન્દોરના ચાહકોને મળવાની અને ત્યાંના પ્રખ્યાત પોહા ખાવાની ઈચ્છા પણ વ્યક્ત કરી હતી. અગાઉ દિલ્હીના શોની જેમ અહીં પણ ચુસ્ત પોલીસ બંદોબસ્ત ગોઠવવામાં આવ્યો છે. દેશભરમાં યોજાઈ રહેલી આ સંગીત યાત્રાને લઈને શ્રોતાઓમાં ભારે ક્રેઝ જોવા મળી રહ્યો છે.
