Bigg Boss 20 Salman Khan Scolds Scout OP: રિયાલિટી શો ‘બિગ બોસ 20’ના ‘વીકેન્ડ કા વાર’ એપિસોડમાં સલમાન ખાનનો આકરો અંદાજ જોવા મળ્યો હતો. આ વખતે તેમના નિશાના પર યુટ્યુબર અને ગેમર સ્કાઉટ ઓપી એટલે કે તન્મય સિંહ રહ્યો હતો. પંજાબી અભિનેત્રી લવ ગિલ સાથેના તેના સંબંધો, ‘ભાઈ-બહેન’ જેવી મિત્રતાના દાવા અને ‘મસાજ’ વિવાદને લઈને સલમાને તેને કડક શબ્દોમાં ઠપકો આપ્યો હતો. સલમાને સવાલ કર્યો કે જો સ્કાઉટ લવને બહેન સમાન મિત્ર ગણાવતો હતો, તો પછી તેની ગર્લફ્રેન્ડ સામે તેનો બચાવ કેમ ન કરી શક્યો?
‘તું કોઈનો વફાદાર નથી!’ સલમાને સ્કાઉટને સંભળાવ્યું
‘વીકેન્ડ કા વાર’ દરમિયાન સલમાને સ્કાઉટને કઠેડામાં ઊભો રાખીને તેના વર્તન અંગે સવાલો કર્યા હતા. સલમાને કહ્યું હતું કે આ શોમાં જાણે ‘બહેન’ શબ્દ જ શ્રાપ બની ગયો છે. તેણે સ્કાઉટને કહ્યું કે તે જેને બહેન સમાન મિત્ર ગણાવે છે, તેનો બચાવ પણ ગર્લફ્રેન્ડ સામે કરી શક્યો નથી. સલમાને સ્કાઉટને સવાલ કર્યો કે જ્યારે તેને કહેવામાં આવ્યું કે લવે તેને ભાવનાત્મક રીતે ફસાવ્યો છે, ત્યારે તેણે પોતાની સમજથી પરિસ્થિતિને કેમ ન સમજી? તેમણે એમ પણ કહ્યું કે દરેક વખતે પોતાની ભૂલનો દોષ બીજા પર ઢોળવો યોગ્ય નથી.
‘ખોટા વાયદા કર્યા હોય તો તારાથી ખરાબ કોઈ નહીં’
સલમાન ખાને સ્કાઉટ અને લવ વચ્ચેના સંબંધમાં ઊભા થયેલા વિવાદ પર પણ વાત કરી હતી. તેમણે કહ્યું કે જ્યારે સ્કાઉટને લવથી દૂર રહેવાનું કહેવામાં આવ્યું, ત્યારે પણ તે તેની નજીક રહ્યો હતો. આ સંબંધમાં ‘મસાજ’ જેવી બાબતો પણ ચર્ચામાં આવી હતી. સલમાને આકરા શબ્દોમાં કહ્યું કે જો સ્કાઉટે માત્ર લવને રિઝવવા માટે ખોટા વાયદા કર્યા હોય, તો તે ખૂબ જ ખોટું છે. આ મુદ્દો અગાઉના ‘વીકેન્ડ કા વાર’માં દિગ્દર્શક રોહિત શેટ્ટી અને કાશવી દ્વારા પણ ઉઠાવવામાં આવ્યો હતો.
સ્કાઉટની ગર્લફ્રેન્ડ કાશવીએ પણ લવ ગિલ પર લગાવ્યા હતા આરોપ
આ વિવાદની શરૂઆત ગયા અઠવાડિયે થઈ હતી, જ્યારે સલમાન ખાનની ગેરહાજરીમાં રોહિત શેટ્ટીએ ‘વીકેન્ડ કા વાર’ હોસ્ટ કર્યો હતો. આ દરમિયાન રોહિતે સ્કાઉટ અને લવ ગિલ વચ્ચેની નિકટતા અંગે સવાલો ઉઠાવ્યા હતા. ખાસ કરીને ‘બ્લેન્કેટ મસાજ’ અને બંને વચ્ચેના વર્તનનો ઉલ્લેખ કરતાં રોહિતે સવાલ કર્યો હતો કે ભાઈ-બહેન જેવા સંબંધનો દાવો કરવામાં આવતો હોય તો આવું વર્તન કેટલું યોગ્ય છે? તેમણે કહ્યું હતું કે રાષ્ટ્રીય ટેલિવિઝન પર આવું વર્તન દર્શકો સુધી ખોટો સંદેશ પહોંચાડી શકે છે. આ એપિસોડમાં સ્કાઉટની ગર્લફ્રેન્ડ કાશવી હીરાનંદાની પણ ખાસ મહેમાન તરીકે આવી હતી. કાશવીએ લવ પર સ્કાઉટને ગેરમાર્ગે દોરવાનો આરોપ લગાવ્યો હતો અને તેને લવથી દૂર રહેવાની સલાહ આપી હતી. આ દરમિયાન લવ ગિલ ભાવુક થઈ ગઈ હતી. પોતાના ચારિત્ર્ય અંગે ઉઠાવવામાં આવેલા સવાલોના જવાબ આપતી વખતે તે રડી પડી હતી. બીજી તરફ, સ્કાઉટ પોતાની મિત્રના પક્ષમાં યોગ્ય રીતે ઊભો ન રહ્યો હોવાની ચર્ચા પણ થઈ હતી.
સલમાને સ્કાઉટને પોતાની જવાબદારી સમજાવી
આ અઠવાડિયે સલમાન ખાને સમગ્ર મામલે સ્કાઉટને જવાબદાર ઠેરવ્યો હતો. તેમણે સ્પષ્ટ કર્યું કે પોતાની જાતને નિર્દોષ ગણાવીને તમામ દોષ લવ પર નાખવો યોગ્ય નથી. સલમાનના મતે, સંબંધમાં બંને પક્ષોની જવાબદારી હોય છે. જો સ્કાઉટે પોતાની મર્યાદાઓ ઓળંગી હોય અથવા ખોટા વાયદા કર્યા હોય, તો તેની જવાબદારી પણ તેણે સ્વીકારવી જોઈએ. પોતાના બચાવ માટે અન્ય વ્યક્તિના ચારિત્ર્ય પર સવાલ ઉઠાવવા યોગ્ય નથી. આ ટકોર બાદ બિગ બોસના ઘરમાં સ્કાઉટ અને લવ વચ્ચેના સંબંધો અંગેની ચર્ચા ફરી તેજ બની છે. હવે આગામી એપિસોડમાં સ્કાઉટ આ મુદ્દે શું વલણ અપનાવે છે તેના પર દર્શકોની નજર રહેશે.
