Ankit Baliyan Murder Case: હરિયાણવી ગાયક અંકિત બાલિયાનની હત્યા બાદ પરિવારજનોમાં ભારે રોષ જોવા મળી રહ્યો છે. અંકિતની પત્ની સીમાએ પોલીસ અને સરકારની કામગીરી સામે ગંભીર સવાલો ઉઠાવી આરોપીઓની તાત્કાલિક ધરપકડની માંગ કરી છે. વાયરલ થયેલા એક વીડિયોમાં સીમાએ પોલીસ પ્રશાસનને 48 કલાકનું અલ્ટીમેટમ આપ્યું છે અને કહ્યું છે, કે જો હત્યારાઓ સામે કડક કાર્યવાહી નહીં થાય તો તે મુખ્યમંત્રીના નિવાસસ્થાન બહાર આત્મહત્યા કરશે.
‘મારી આખી દુનિયા બરબાદ થઈ ગઈ’
અંકિતની પત્ની સીમા દિલ્હીમાં સરકારી શિક્ષિકા છે. પતિની હત્યા બાદ દુઃખ વ્યક્ત કરતાં તેમણે કહ્યું કે અંકિતની ગોળી મારીને હત્યા થતાં તેમની આખી દુનિયા બરબાદ થઈ ગઈ છે. તેમણે પોતાની તબિયતનો ઉલ્લેખ કરતાં કહ્યું, કે તેઓ દવાઓના સહારે સમય પસાર કરી રહ્યા છે. સીમાએ પોલીસ અને સરકારને સવાલ કર્યો, કે જો દિવસ દરમિયાન ચાર લોકો હથિયારો સાથે આવીને હત્યા કરીને ફરાર થઈ શકે છે, તો સામાન્ય નાગરિક કેવી રીતે સુરક્ષિત અનુભવી શકે?
‘48 કલાકમાં આરોપીઓ સામે કાર્યવાહી કરો’
સીમાએ પોલીસ પ્રશાસનને કડક ચેતવણી આપતા કહ્યું, કે અંકિતના હત્યારાઓ સામે આગામી એકથી બે દિવસમાં એન્કાઉન્ટર સહિત કડક કાર્યવાહી કરવામાં નહીં આવે તો તેઓ મુખ્યમંત્રીના નિવાસસ્થાનની બહાર આત્મહત્યા કરશે. તેમણે સવાલ ઉઠાવ્યો, કે અંકિતની હત્યાને 24 કલાકથી વધુ સમય વીતી ગયો હોવા છતાં આરોપીઓ હજુ પોલીસની પકડથી બહાર કેમ છે.
‘હત્યાના દિવસે અંકિત કોઈ તણાવમાં નહોતો’
સીમાના જણાવ્યા અનુસાર, તેમણે બુધવારે સાંજે લગભગ 4:30 વાગ્યે અંકિત સાથે છેલ્લી વખત વાત કરી હતી. અંકિત તે સમયે પોતાના નવા ગીત પર કામ કરી રહ્યો હતો અને તેમની વાતચીત પણ સામાન્ય હતી. સીમાએ કહ્યું, કે અંકિતને અગાઉ વર્ષ 2023માં ફોન પર બે વખત ધમકીઓ મળી હતી. જો, કે હત્યાના દિવસે તે કોઈ તણાવમાં હોવાનું તેમને જણાયું નહોતું. તેમણે એમ પણ કહ્યું, કે અંકિતનો હાલમાં કોઈની સાથે વિવાદ ચાલતો નહોતો.
‘હરિયાણાના શૂટર્સ શામલી સુધી કેવી રીતે પહોંચ્યા?’
અંકિતની પત્નીએ આરોપીઓની હિલચાલ અને પોલીસની સુરક્ષા વ્યવસ્થા અંગે પણ સવાલો ઉઠાવ્યા છે. તેમણે પૂછ્યું કે જો આરોપીઓ હરિયાણાથી હથિયારો સાથે શામલી સુધી પહોંચ્યા હતા, તો હરિયાણા સરહદથી લઈને શામલી સુધીની પોલીસને તેની જાણ કેમ ન થઈ? તેમણે પોલીસ પાસે આરોપીઓને ઝડપી પાડીને હત્યાનું કારણ જાહેર કરવાની માંગ કરી છે.
કાકીએ પણ પોલીસની કામગીરી પર સવાલ ઉઠાવ્યા
અંકિતની હત્યા બાદ તેમના પરિવારના એક સભ્યએ પણ પોલીસની કામગીરી સામે નારાજગી વ્યક્ત કરી છે. વાતચીતમાં તેમણે અગાઉની એક ઘટનાનો ઉલ્લેખ કર્યો હતો. તેમના જણાવ્યા મુજબ, આશરે આઠ મહિના પહેલાં અંકિતની કારમાં પેટ્રોલ ભરાવતો વીડિયો સામે આવ્યા બાદ પોલીસની અનેક ગાડીઓ તેની શોધમાં પહોંચી ગઈ હતી અને તેને ઝડપી લેવામાં આવ્યો હતો. કાકીએ સવાલ કર્યો કે જ્યારે અંકિતની ધોળા દિવસે ગોળી મારીને હત્યા કરવામાં આવી છે, ત્યારે હવે આરોપીઓ પોલીસની પકડથી બહાર કેવી રીતે છે? તેમણે પોલીસને અગાઉ જેવી જ તત્પરતા સાથે હત્યારાઓને શોધી કાઢવાની માંગ કરી છે.
હત્યાકાંડની તપાસમાં પોલીસ સામે મોટો પડકાર
અંકિત બાલિયાનની હત્યા બાદ પોલીસ સીસીટીવી ફૂટેજ સહિતના પુરાવાના આધારે આરોપીઓની શોધખોળ કરી રહી છે. બીજી તરફ, પરિવારજનોની નારાજગી અને આરોપીઓની વહેલી ધરપકડની માંગને કારણે પોલીસ પર પણ ઝડપી કાર્યવાહીનું દબાણ વધી રહ્યું છે. હાલ હત્યાનું ચોક્કસ કારણ શું હતું અને આ હુમલા પાછળ કોણ છે તે અંગે તપાસ ચાલી રહી છે. આરોપીઓની ધરપકડ બાદ જ સમગ્ર હત્યાકાંડની કડી સ્પષ્ટ થવાની શક્યતા છે.
