Ameesha Patel Lashes Out At Rumours Of Dating Hardik Pandya: અભિનેત્રી અમીષા પટેલ અને ક્રિકેટર હાર્દિક પંડ્યાની એક મુલાકાતનો વીડિયો સોશિયલ મીડિયા પર વાયરલ થયા બાદ બંનેના ડેટિંગની અટકળોએ જોર પકડ્યું હતું. હવે આ અફવાઓને લઈને અમીષા પટેલે એક સોશિયલ મીડિયા યુઝરને જડબાતોડ જવાબ આપ્યો છે. એક X યુઝરે હાર્દિકના ખભા પર હાથ મૂકવાની અમીષાની તસવીરને તેમના સંબંધો સાથે જોડવાનો પ્રયાસ કર્યો હતો, જેના પર અભિનેત્રીએ કટાક્ષભર્યો જવાબ આપ્યો છે.
અમીષા અને હાર્દિકનો વીડિયો થયો વાયરલ
તાજેતરમાં અમીષા પટેલ અને હાર્દિક પંડ્યા મુંબઈની તાજમહેલ પેલેસમાં એકસાથે જોવા મળ્યા હતા. આ દરમિયાન અમીષા હાર્દિકની ઓળખાણ પોતાના કેટલાક મિત્રો સાથે કરાવતી જોવા મળી હતી. બંને વચ્ચેની આ મુલાકાતનો વીડિયો સોશિયલ મીડિયા પર વાયરલ થયો હતો. વીડિયો સામે આવ્યા બાદ કેટલાક યુઝર્સે તેમની મિત્રતાને અલગ જ રંગ આપીને બંને વચ્ચે રિલેશનશિપ હોવાની અટકળો શરૂ કરી દીધી હતી.
X યુઝરે શું લખ્યું?
વીડિયો વાયરલ થયા બાદ એક X યુઝરે તેનો સ્ક્રીનશોટ શેર કર્યો હતો. પોસ્ટમાં દાવો કરવામાં આવ્યો હતો કે બેંગલુરુની એક હોટેલમાં પાર્ટી દરમિયાન અમીષા પટેલે હાર્દિક પંડ્યાના ખભા પર જે રીતે હાથ મૂક્યો હતો, તેનાથી Reddit પર ચાલી રહેલી બંનેના ડેટિંગની અફવાઓ સાચી હોવાનું લાગી રહ્યું છે. આ પોસ્ટ અમીષા પટેલની નજરે પડતાં અભિનેત્રીએ તેને પોતાની ઈન્સ્ટાગ્રામ સ્ટોરી પર શેર કરીને સીધો જવાબ આપ્યો હતો.
‘અરે ભગવાન, તમે સાચા છો...’
અમીષાએ કટાક્ષભર્યા અંદાજમાં લખ્યું હતું કે, ‘તે ક્ષણ રોમેન્ટિક હતી. બિલકુલ સાચું કહ્યું. અરે ભગવાન, તમે સાચા છો… ખરેખર, જે રીતે મારો હાથ તેમના પર હતો, તે ખરેખર રોમેન્ટિક હતું.’ આગળ તેણે યુઝરને સંભળાવતા કહ્યું કે, ‘હું તમને નથી ઓળખતી, પણ ચોક્કસ તમારી પાસે કોઈ છોકરી નથી, અહીં સુધી કે કોઈ ગર્લફ્રેન્ડ પણ નથી. આવી બાબતો પર પોસ્ટ કરતા પહેલા તમારે કોઈ છોકરીને મિત્ર બનાવવી જોઈએ.’ અમીષાના આ જવાબ બાદ સોશિયલ મીડિયા પર પણ ચર્ચા શરૂ થઈ ગઈ છે. અભિનેત્રીએ સ્પષ્ટ સંકેત આપ્યો કે માત્ર કોઈની સાથે સામાન્ય રીતે વાતચીત કરવી કે મિત્રતાપૂર્વક વર્તવું તેને રોમેન્ટિક સંબંધ સાથે જોડવાનું કારણ બની શકે નહીં.
હાર્દિક સાથે ડેટિંગની અફવાઓ પર અમીષાએ આપ્યો જવાબ
અમીષા પટેલ અને હાર્દિક પંડ્યા વચ્ચેના સંબંધોને લઈને અટકળો બંને એકસાથે જોવા મળ્યા બાદ શરૂ થઈ હતી. જોકે, અમીષાના તાજેતરના જવાબમાં તેણે આ પ્રકારની અટકળોને મજાકિયા અને કટાક્ષભર્યા અંદાજમાં ફગાવી દીધી છે. બીજી તરફ, હાર્દિક પંડ્યાની અંગત જિંદગી પણ અગાઉથી ચર્ચામાં રહી છે. તે પહેલાં તેના લગ્ન અભિનેત્રી નતાશા સ્ટેનકોવિક સાથે થયા હતા. હવે અમીષા સાથેની મુલાકાતને લઈને સોશિયલ મીડિયા પર ચાલી રહેલી ચર્ચા વચ્ચે અભિનેત્રીના જવાબે આ અફવાઓને ફરી ચર્ચામાં લાવી છે.
