Ambani family Lalbaugcha Raja darshan: ગણેશોત્સવના સમાપન અને ગણેશ વિસર્જનની પૂર્વ સંધ્યાએ દેશના અગ્રણી ઉદ્યોગપતિ મુકેશ અંબાણી પોતાના સમગ્ર પરિવાર સાથે મુંબઈના સુપ્રસિદ્ધ લાલબાગચા રાજાના ચરણોમાં આશીર્વાદ લેવા પહોંચ્યા હતા. તેમની સાથે પત્ની નીતા અંબાણી, પુત્ર અનંત અંબાણી તેમજ દીકરી ઈશા અંબાણીના જોડિયા સંતાનો—દોહિત્રી આદિયા અને દોહિત્ર ક્રિષ્ના ઉપસ્થિત રહ્યા હતા. અત્યંત ચુસ્ત સુરક્ષા વ્યવસ્થા વચ્ચે અંબાણી પરિવારે બાપ્પાના ચરણ સ્પર્શ કરી પૂજા-અર્ચના કરી હતી. આ ધાર્મિક મુલાકાત દરમિયાન પરિવારની ભક્તિભાવ ઉપરાંત નીતા અંબાણીનો પરંપરાગત ગુજરાતી પહેરવેશ અને બાળકો સાથેની તેમની રમતિયાળ ક્ષણો પંડાલમાં ઉપસ્થિત તમામ ભક્તો અને કેમેરા માટે આકર્ષણનું કેન્દ્ર બની રહી હતી.
પાટણના પટોળામાં નીતા અંબાણીનો રોયલ ગુજરાતી ઠાઠ
ગણપતિ બાપ્પાના દર્શન વેળાએ નીતા અંબાણીએ ગુજરાતના સમૃદ્ધ સાંસ્કૃતિક વારસાને ઉજાગર કરતા લાલ અને ઘેરા કેસરી રંગના ‘ડબલ ઇક્કત’ પાટણના પટોળાની સાડી ધારણ કરી હતી. ગુજરાતી સીધા પલ્લુની શૈલીમાં સજ્જ આ સાડી સાથે તેમણે ઘેરા લાલ રંગનું મેચિંગ બ્લાઉઝ પસંદ કર્યું હતું, જે તેમના વ્યક્તિત્વને એક ભવ્ય અને રાજવી લુક પ્રદાન કરતું હતું. આ શાહી પરિધાનની સાથે તેમણે ખાસ ડિઝાઈન કરાવેલો હીરાજડિત નેકલેસ પહેર્યો હતો, જેમાં ગણપતિ બાપ્પાની મનોહર આકૃતિ કંડારાયેલી હતી. કાનમાં મેચિંગ ડાયમંડ ઇયરરિંગ્સ, હાથમાં પરંપરાગત લાલ કાચની બંગડીઓ અને આંગળીમાં કિંમતી પન્નાની વીંટી સાથે માથામાં તાજા ફૂલોથી ગૂંથેલો અંબોડો તેમની ભારતીય નારી તરીકેની શોભામાં ચાર ચાંદ લગાવતો હતો.
નાની અને મામા સાથે ભાણેજોની રમતિયાળ પળો
પંડાલમાં દર્શન દરમિયાન નીતા અંબાણીનું દોહિત્ર-દોહિત્રી સાથેનું અતૂટ અને પ્રેમાળ બોન્ડિંગ જોવા મળ્યું હતું. નીતા અંબાણીએ દોહિત્રી આદિયાને પ્રેમથી તેડીને ગણેશજીની પ્રતિમા સમક્ષ પ્રણામ કરાવ્યા હતા, જ્યાં નાનકડી આદિયા સતત પોતાના નાની સાથે વાતો અને મસ્તી કરતી નજરે પડી હતી. ત્યારબાદ તેમણે દોહિત્ર ક્રિષ્નાને ખોળામાં બેસાડી બાપ્પાના વાહન મૂષકરાજ પાસે લઈ જઈને બાળપણની વાર્તાઓ સંભળાવી ધાર્મિક સંસ્કારો આપ્યા હતા. બીજી તરફ, મામા અનંત અંબાણી અને ભાણેજો વચ્ચેની મીઠી ક્ષણો પણ સોશિયલ મીડિયા પર ખૂબ જ વાયરલ થઈ રહી છે. અનંત અંબાણીએ ભાણેજ ક્રિષ્નાને ખોળામાં બેસાડી વહાલથી તિલક કર્યું હતું, પરંતુ ભાણી આદિયાને તિલક લગાવવા માટે તેમણે ઘણી મથામણ કરવી પડી હતી કારણ કે તે સતત રમત કરતી મામાના હાથમાંથી સરકી જતી હતી.
ટ્રેડિશનલ લહેરિયા લુકમાં ચમક્યા આદિયા અને ક્રિષ્ના
નાની નીતા અંબાણીની જેમ જ ઈશા અંબાણીના બંને જોડિયા બાળકો પણ મનમોહક ટ્રેડિશનલ પોશાકમાં સજ્જ જોવા મળ્યા હતા. નાનકડી આદિયાએ ગુલાબી રંગનો લહેરિયા પ્રિન્ટ ધરાવતો સુંદર કો-ઓર્ડ સેટ પહેર્યો હતો અને તેના સાગર ચોટલામાં ગુલાબી ફૂલોની સજાવટ કરવામાં આવી હતી. જ્યારે નાનકડો ક્રિષ્ના સ્કાય બ્લુ રંગના લહેરિયા પ્રિન્ટવાળા કુર્તા અને પાયજામામાં અત્યંત ક્યૂટ લાગતો હતો. બંને બાળકોની માસૂમિયત અને ભારતીય પરિધાનોએ સમગ્ર પંડાલમાં ઉપસ્થિત લોકોનું દિલ જીતી લીધું હતું.
એન્ટિલિયામાં ધામધૂમથી ગણેશ સ્થાપના
દર વર્ષની પરંપરા મુજબ આ વર્ષે પણ અંબાણી પરિવારે પોતાના મુંબઈ સ્થિત નિવાસસ્થાન ‘એન્ટિલિયા’ ખાતે ગણપતિ બાપ્પાની ભવ્ય સ્થાપના કરી હતી. ઉત્સવ દરમિયાન એન્ટિલિયાને હજારો ગલગોટાના પીળા-કેસરી ફૂલો, આકર્ષક રોશની અને પરંપરાગત ડેકોરેશનથી શણગારવામાં આવ્યું હતું. સ્થાપના સમયે મુકેશ અંબાણી, નીતા અંબાણી, પુત્ર અનંત અને પુત્રવધૂ રાધિકા મર્ચન્ટે સાથે મળીને પૂરા વૈદિક મંત્રોચ્ચાર સાથે બાપ્પાનું સ્વાગત કર્યું હતું, જેમાં દેશ-વિદેશના અનેક અગ્રણી મહાનુભાવોએ પણ દર્શનનો લાભ લીધો હતો.
લાલબાગચા રાજા સાથે અંબાણી પરિવારનો અતૂટ નાતો
અંબાણી પરિવારનો લાલબાગચા રાજા મંડળ સાથે વર્ષો જૂનો આસ્થા અને સેવાનો નાતો રહ્યો છે. અનંત અંબાણી છેલ્લા દોઢ દાયકાથી વધુ સમયથી આ ગણેશોત્સવ સમિતિ સાથે સક્રિય રીતે જોડાયેલા છે અને સમિતિના એક્ઝિક્યુટિવ એડવાઇઝર તરીકે પણ સેવા આપે છે. રિલાયન્સ ફાઉન્ડેશન મારફતે લાલબાગ વિસ્તારમાં આરોગ્યલક્ષી સુવિધાઓ અને દર્દી સહાય ભંડોળમાં અંબાણી પરિવાર દ્વારા નિયમિત યોગદાન આપવામાં આવે છે. બાપ્પા પ્રત્યેની અનન્ય શ્રદ્ધાના ભાગરૂપે ગણેશ ચતુર્થી નિમિત્તે અંબાણી પરિવાર તરફથી લાલબાગચા રાજાને આશરે 15 કરોડ રૂપિયાની કિંમતનો અને 20 કિલો વજન ધરાવતો ભવ્ય સુવર્ણ મુગટ અર્પણ કરવામાં આવ્યો હતો, જે આ વર્ષે બાપ્પાની મૂર્તિની વિશેષ શોભા વધારી રહ્યો છે.
