Ajay Devgn new horror thriller: બોલિવૂડ સુપરસ્ટાર અજય દેવગન ફરી એકવાર દર્શકોને હોરર, રહસ્ય અને સસ્પેન્સથી ભરેલી દુનિયામાં લઈ જવા માટે તૈયાર છે. ‘દ્રશ્યમ’ અને ‘શૈતાન’ જેવી ફિલ્મો બાદ હવે તેની નવી હોરર-થ્રિલર ફિલ્મને લઈને ચર્ચા તેજ બની છે. રોહિત જુગરાજના નિર્દેશનમાં બની રહેલી આ ફિલ્મનું નામ ‘સૂર્યસ્પર્શ’ હોવાનું જણાવાઈ રહ્યું છે. અગાઉ આ ફિલ્મ ‘ગૃહ પ્રવેશ’ નામથી ચર્ચામાં હતી, પરંતુ હવે તેનું નવું નામ સામે આવ્યું છે.
‘ગરુડ પુરાણ’થી પ્રેરિત હોવાનું કહેવાઈ રહ્યું છે
ખાસ વાત એ છે કે, અહેવાલો અનુસાર ફિલ્મની વાર્તા પ્રાચીન ગ્રંથ ‘ગરુડ પુરાણ’થી પ્રેરિત હોવાનું કહેવાઈ રહ્યું છે. ગરુડ પુરાણમાં ભગવાન વિષ્ણુ અને ગરુડ વચ્ચેના સંવાદ સાથે જીવન, મૃત્યુ અને મૃત્યુ પછીની માન્યતાઓ સહિત અનેક વિષયોનું વર્ણન જોવા મળે છે. આવી પૃષ્ઠભૂમિને હોરર અને રહસ્ય સાથે જોડીને ફિલ્મની વાર્તા તૈયાર કરવામાં આવી હોવાનું જણાવાઈ રહ્યું છે, જેના કારણે અજય દેવગનની આ ફિલ્મને લઈને દર્શકોમાં ઉત્સુકતા વધી છે.
શૂટિંગ નવેમ્બર સુધી ચાલવાની શક્યતા
ફિલ્મનું શૂટિંગ 2 સપ્ટેમ્બરથી શરૂ થઈ ચૂક્યું હોવાનું જણાવાઈ રહ્યું છે અને તેનું શૂટિંગ નવેમ્બર સુધી ચાલવાની શક્યતા છે. મેકર્સ ફિલ્મને વર્ષ 2027ના બીજા છમાસિક ગાળામાં સિનેમાઘરોમાં રિલીઝ કરવાની તૈયારી કરી રહ્યા છે. પેનોરમા સ્ટુડિયોઝના કુમાર મંગત અને અભિષેક પાઠક, અજય દેવગન ફિલ્મ્સ સાથે મળીને ફિલ્મનું નિર્માણ કરી રહ્યા છે. અજય દેવગન અને પેનોરમા સ્ટુડિયોઝ અગાઉ ‘દ્રશ્યમ’, ‘રેડ’ અને ‘શૈતાન’ જેવી ફિલ્મોમાં સાથે કામ કરી ચૂક્યા છે.
‘દ્રશ્યમ: ધ કન્ક્લૂઝન’ને લઈને પણ ચર્ચા ચાલી રહી છે
દરમિયાન અજય દેવગનની બીજી મોટી ફિલ્મ ‘દ્રશ્યમ: ધ કન્ક્લૂઝન’ને લઈને પણ ચર્ચા ચાલી રહી છે. ફિલ્મમાં અજય ફરી એકવાર વિજય સાલગાંવકરની ભૂમિકામાં જોવા મળશે અને તેમાં તબ્બુ, શ્રિયા સરન તથા રજત કપૂર પોતાની જૂની ભૂમિકાઓમાં પરત ફરશે. બીજી તરફ પ્રકાશ રાજ અને જયદીપ અહલાવત નવા પાત્રોમાં જોવા મળશે. ફિલ્મ 2 ઓક્ટોબર 2026ના રોજ સિનેમાઘરોમાં રિલીઝ થવાની છે, ત્યારે હવે ‘સૂર્યસ્પર્શ’માં અજય દેવગન કયા પ્રકારના હોરર અને રહસ્ય સાથે દર્શકોને ચોંકાવશે તેના પર નજર રહેશે.
