Aishwarya Rai Bachchan Paris Fashion Week: બોલિવૂડની ગ્લોબલ આઇકોન ઐશ્વર્યા રાય બચ્ચન હાલમાં પેરિસ ફેશન વીકમાં પોતાના અદભુત અંદાજથી વિશ્વભરમાં ચર્ચા જગાવ્યા બાદ મુંબઈ પરત ફરી છે. ભારતમાં પગ મૂક્યાના ગણતરીના કલાકોમાં જ અભિનેત્રીએ સોશિયલ મીડિયા પર પેરિસ ટૂરની ખાસ બેકસ્ટેજ તસવીરો શેર કરી છે. આ તસવીરોમાં રન-વે પર ઉતરતા પહેલાંની તૈયારીઓ, હેર સ્ટાઇલિંગ અને શો પછીનો તેનો મહારાણી જેવો અંદાજ જોવા મળી રહ્યો છે.
બેકસ્ટેજની ગ્લેમરસ ઝલક
ઐશ્વર્યાએ ઇન્સ્ટાગ્રામ પર પોસ્ટ કરેલી તસવીરોમાં તેના બેકસ્ટેજ સ્ટાઇલિંગ રૂટિનની રસપ્રદ ઝલક જોવા મળે છે. એક તસવીરમાં તે બ્લેક સિલ્ક ડ્રેસિંગ ગાઉનમાં નજરે પડે છે, જ્યાં હેર ટીમ તેના ડીપ બર્ગન્ડી રંગના વાળને કર્લિંગ આયર્નથી સેટ કરી રહી છે. તેના હાથમાં સફેદ રંગનો પંખો છે, જેના પર લૉરિયલ પેરિસની પ્રખ્યાત ટેગલાઇન "I'm Worth It" લખેલી છે. કેમેરા સામે તેનો સહજ પોઝ અને નવો બર્ગન્ડી હેર શેડ તેના ગ્લેમરમાં વધારો કરી રહ્યા છે.
એફિલ ટાવર સામે ક્વીન જેવો રોયલ અંદાજ
આ પોસ્ટમાં સૌથી વધુ આકર્ષણ એફિલ ટાવર સામે લેવાયેલી તસવીરે જમાવ્યું છે. રાત્રિના અંધકારમાં રોશનીથી ઝળહળતા એફિલ ટાવરની પૃષ્ઠભૂમિમાં ઐશ્વર્યા અતિ આકર્ષક લાગી રહી છે. તેણે બ્લેક વેલ્વેટ ગાઉન સાથે પર્લ એમ્બ્રોઇડરીવાળું કેપ ધારણ કર્યું હતું. માથા પર પહેરેલો રત્નજડિત તિયારા (તાજ) તેના લુકને સંપૂર્ણપણે શાહી ઓપ આપી રહ્યો હતો. આ તસવીરો સાથે તેણે #dfil2026 હેશટેગનો ઉપયોગ કર્યો હતો.
સીરિયન ડિઝાઇનરના આઉટફિટમાં રેમ્પ વોક
ઐશ્વર્યા રાયે એફિલ ટાવર સામે સ્થિત ઐતિહાસિક ઇકોલ મિલિટેર ખાતે આયોજિત લૉરિયલના વાર્ષિક બ્યૂટી શોમાં ભાગ લીધો હતો. આ શો માટે તેણે સીરિયન ફેશન લેબલ 'યારા શોમેકર' દ્વારા ડિઝાઇન કરાયેલ બ્લેક વેલ્વેટ આઉટફિટ પહેર્યો હતો. ડીપ V-નેકલાઇન અને સ્ટ્રક્ચર્ડ ફિશટેલ કટ ધરાવતા આ ગાઉનમાં જ્યારે ઐશ્વર્યા રેમ્પ પર આવી ત્યારે તેના આત્મવિશ્વાસ અને ગ્રેસ સામે સૌ કોઈ નતમસ્તક થઈ ગયા હતા.
સેલિન ડિયોન અને હોલિવૂડ સિતારાઓ સાથે મુલાકાત
રિહર્સલ દરમિયાન ઐશ્વર્યાએ સ્ટેજ પર પરફોર્મ કરી રહેલી લિજેન્ડરી સિંગર સેલિન ડિયોન સાથે મુલાકાત કરી હતી. આ ઉપરાંત, પોતાની વર્ષો જૂની મિત્ર અને હોલિવૂડ એક્ટ્રેસ ઇવા લોંગોરિયા સાથે પણ તેણે સમય વિતાવ્યો હતો. આ ફેશન શોમાં વાયોલા ડેવિસ, જેન ફોન્ડા, કારા ડેલેવિન્જ, કેન્ડલ જેનર અને એન્ડી મેકડોવેલ જેવી વિશ્વવિખ્યાત હસ્તીઓએ પણ એકસાથે મંચ શેર કર્યો હતો.
પેરિસમાં દીકરી આરાધ્યાનો મજબૂત સાથ
આ સમગ્ર ટૂર દરમિયાન ઐશ્વર્યાની સાથે તેની દીકરી આરાધ્યા બચ્ચન પણ સતત પડછાયાની જેમ સાથે રહી હતી. એરપોર્ટથી માંડીને ઇવેન્ટ સુધી આરાધ્યા પોતાની માતાને ચીયર કરતી જોવા મળી હતી. માતા-પુત્રીની આ બોન્ડિંગ સોશિયલ મીડિયા પર હંમેશા પ્રશંસા મેળવે છે અને આ વખતે પણ ફેન્સે આ જોડીના ખૂબ વખાણ કર્યા હતા.
કાન્સ પછી વર્ષનું બીજું મોટું ઇન્ટરનેશનલ અપિયરન્સ
મે મહિનામાં કાન્સ ફિલ્મ ફેસ્ટિવલના રેડ કાર્પેટ પર હાજરી આપ્યા બાદ આ વર્ષે પેરિસ ફેશન વીકમાં ઐશ્વર્યાની ઉપસ્થિતિ તેનું બીજું મોટું આંતરરાષ્ટ્રીય પ્લેટફોર્મ બન્યું છે. છેલ્લા બે દાયકાથી વધુ સમયથી ગ્લોબલ બ્રાન્ડ એમ્બેસેડર તરીકે ઐશ્વર્યા વૈશ્વિક મંચ પર ભારતનું પ્રતિનિધિત્વ ગૌરવભેર કરી રહી છે.
બિગ સ્ક્રીન પર વાપસીની આતુરતા
વર્કફ્રન્ટની વાત કરીએ તો ઐશ્વર્યા છેલ્લે ડિરેક્ટર મણિરત્નમની બ્લોકબસ્ટર ફિલ્મ 'પોન્નિયિન સેલ્વન: II'માં જોવા મળી હતી. ફિલ્મમાં તેના 'નંદિની'ના રોલને દર્શકો અને વિવેચકો તરફથી ખૂબ સરાહના મળી હતી. આ ફિલ્મ બાદ હવે ચાહકો ઐશ્વર્યાને ફરી એકવાર મોટા પડદા પર મુખ્ય ભૂમિકામાં જોવા માટે આતુરતાપૂર્વક રાહ જોઈ રહ્યા છે.
