Aishwarya Rai Paris Fashion Week 2026: ઐશ્વર્યા રાય બચ્ચન પેરિસ ફેશન વીકમાં રેમ્પ વૉક કરવા માટે ઉતર્યા કે હાજર સૌ કોઈની નજર માત્ર અને માત્ર તેમના પર જ ટકી રહી. એફિલ ટાવરના બેકગ્રાઉન્ડમાં યોજાયેલા આ શાનદાર ઇવેન્ટમાં પોતાના શાહી અને આકર્ષક અંદાજમાં રેમ્પ પર ચાલતા બોલિવૂડ એક્ટ્રેસે સૌનું ધ્યાન પોતાની તરફ ખેંચ્યું હતું. આ જાણીતા બ્યુટી બ્રાન્ડના લાંબા સમયથી એમ્બેસેડર રહેલા એક્ટ્રેસે યારા શૂમેકર દ્વારા ડિઝાઇન કરાયેલી સુંદર વેલવેટ ડ્રેસમાં ઈવેન્ટમાં પોતાનો ગ્લેમર પાથર્યો હતો. તેમણે પોતાના બોલ્ડ હેર કલરથી આ લુકમાં એક અલગ જ નિખાર ઉમેર્યો હતો, જેને સોશિયલ મીડિયા પર ફેન્સ દ્વારા ખૂબ જ પસંદ કરવામાં આવી રહ્યો છે.
બ્લેક વેલવેટ ગાઉન અને 3D એમ્બ્રોઇડરીથી બનાવ્યો ખાસ લુક
ઐશ્વર્યા રાયે 'લોરિયલ પેરિસ લે ડેફિલે' માટે રેમ્પ વૉક કર્યું હતું. તેમણે યારા શૂમેકરના 'ફૉલ/વિન્ટર' કલેક્શનનો એક અદભુત આઉટફિટ પહેર્યો હતો, જેને મોહિત રાય, તરંગ અગ્રવાલ અને ચિંતન શાહ દ્વારા સ્ટાઇલ કરવામાં આવ્યો હતો. આ આઉટફિટનો બેઝ કાળા રંગનો ફિટેડ વેલવેટ હતો, જેના પર ખાસ ડિઝાઇન અને 3D ફ્રિંજ એમ્બ્રોઇડરી કરવામાં આવી હતી. તેની ઉપર ક્રિસ્ટલથી સજાવેલો કેપ પણ ઉમેરવામાં આવ્યો હતો, જે આ લુકનું મુખ્ય આકર્ષણ બન્યું હતું. આ સાથે ઐશ્વર્યા એ ક્રાઉન-સ્ટાઇલ હેડપીસ પહેર્યો હતો, જેણે તેમના લુકમાં ચાર ચાંદ લગાવી દીધા હતા.
ઇન્ટરનેશનલ સ્ટાર્સ સાથે મસ્તી અને સિલિન ડિઓન સાથે ડાન્સ
આ ફેશન ઇવેન્ટમાં બચ્ચન પરિવારની વહુ ઐશ્વર્યા સિવાય અનેક ઇન્ટરનેશનલ સ્ટાર્સ અને લોરિયલ પેરિસના એમ્બેસેડર્સ પણ સામેલ થયા હતા, જેમાં સિમોન એશલી, સિલિન ડિઓન, ઇવા લોંગોરિયા અને કેન્ડલ જેનર જેવા મોટા નામો સામેલ છે. આ ઇવેન્ટ દરમિયાન તમામ સ્ટાર્સને રેમ્પ પર મસ્તી કરતા જોઈ શકાતા હતા. આ શો દરમિયાનનો એક ક્ષણ સોશિયલ મીડિયા પર ખૂબ જ વાયરલ થઈ રહ્યો છે, જેમાં ઐશ્વર્યા ફેમસ સિંગર સિલિન ડિઓનને ગળે લગાવતી અને કિસ કરતી નજરે પડે છે. બંનેએ સ્ટેજ પર એકબીજાનો હાથ પકડીને મસ્તી અને ડાન્સ પણ કર્યો હતો, જે ફેન્સને ખૂબ જ ગમ્યો છે.
ફેશન જગતમાં ભારતીય કલાકારોનો વધતો દબદબો
તાજેતરના વર્ષોમાં વૈશ્વિક ફેશન મંચો પર ભારતીય કલાકારોની ઉપસ્થિતિ સતત વધી રહી છે અને તેઓ વૈશ્વિક સ્તરે ભારતનું પ્રતિનિધિત્વ કરી રહ્યા છે. ઐશ્વર્યા લાંબા સમયથી પેરિસ ફેશન વીક અને કાન્સ ફિલ્મ ફેસ્ટિવલ જેવા મોટા પ્લેટફોર્મ પર ભારતીય ફેશન અને સુંદરતાનું પ્રતીક બન્યા છે. તેમનો આત્મવિશ્વાસ અને યુનિક ફેશન સેન્સ યુવા પેઢી માટે હંમેશા પ્રેરણારૂપ સાબિત થાય છે. આંતરરાષ્ટ્રીય બ્રાન્ડ્સ સાથે તેમનું જોડાણ વૈશ્વિક સ્તરે ભારતીય સિનેમા અને સ્ટાર્સની મજબૂત પકડ દર્શાવે છે.
