Neena Gupta Slams Pregnancy Rumors at 67: બોલિવૂડની બોલ્ડ એક્ટ્રેસ નીના ગુપ્તા પોતાના બિન્દાસ્ત અંદાજ માટે જાણીતી છે પરંતુ, તાજેતરમાં ઇન્ટરનેટ પર ચાલેલી એક અફવાએ સોશિયલ મીડિયાની માનસિકતા પર ગંભીર સવાલો ઊભા કર્યા છે. હૈદરાબાદમાં એક હાઈ-પ્રોફાઈલ વેડિંગ રિસેપ્શનમાં હાજરી આપ્યા બાદ 67 વર્ષીય નીના ગુપ્તા ગર્ભવતી હોવાની વાતો વાયરલ થવા લાગી હતી. આ સમગ્ર મામલો સામાન્ય ગપશપ કરતાં વધુ ચિંતાજનક એટલા માટે છે કારણ કે, તે દર્શાવે છે કે આજના ડિજિટલ યુગમાં વધતી ઉંમરની મહિલાઓના સ્વાભાવિક શરીર, કપડાંની ફિટિંગ કે સામાન્ય પાચનક્રિયાને પણ સેન્સેશનલ હેડલાઇન્સમાં ફેરવી દેવામાં સંકોચ નથી રખાતો.
‘કંટાળીને કહી દીધું હા હું પ્રેગ્નેન્ટ છું’
આ ચર્ચાઓ પર પોતાનો આક્રોશ ઠાલવતા નીના ગુપ્તાએ સમગ્ર હકીકત સામે મૂકી છે. તેમણે સ્પષ્ટતા કરી કે, રિસેપ્શનમાં તેમણે પહેરેલી સાડીનું ફેબ્રિક પ્રમાણમાં જાડું હતું અને તેની પ્લીટ્સ (પાટલી) એવી રીતે હતી જેના કારણે પેટના ભાગે થોડો સામાન્ય ઉભાર દેખાતો હતો. માત્ર આટલી બાબત પરથી લોકોએ અટકળો શરૂ કરી દીધી કે, તેઓ 60થી વધુની ઉંમરે માતા બનવા જઈ રહ્યા છે. સતત સવાલોથી પરેશાન થઈને અભિનેત્રીએ આખરે કટાક્ષનો સહારો લેવો પડ્યો હતો. તેમણે વ્યંગાત્મક લહેકામાં જવાબ આપવાનું શરૂ કર્યું કે હા, હું પ્રેગ્નેન્ટ છું અને જો 70 વર્ષે પણ મહિલા જોડિયા બાળકોને જન્મ આપી શકતી હોય તો મારો ચાન્સ પણ બાકી છે.
સ્ત્રીની ઓળખ માત્ર માતૃત્વ કે શરીર પૂરતી સીમિત કેમ?
નીના ગુપ્તાનું આખું જીવન સામાજિક સ્ટીરિયોટાઇપ્સને પડકારવામાં વીત્યું છે. 80ના દાયકામાં વેસ્ટ ઈન્ડિઝના દિગ્ગજ ક્રિકેટર વિવ રિચર્ડ્સ સાથેના સંબંધ બાદ તેમણે લગ્ન વગર દીકરી મસાબા ગુપ્તાને એકલા હાથે ઉછેરીને ઉદાહરણ પૂરું પાડ્યું હતું. એ જમાનામાં એક સિંગલ મધર તરીકે સમાજના આકરા મહેણાં-ટોણાં સહન કરનાર નીના ગુપ્તાને આજે પણ, જ્યારે તેમની ઉંમર 67 વર્ષ છે અને તેમની દીકરી સફળ કારકિર્દી બનાવી ચૂકી છે, ત્યારે પણ માત્ર તેમના શરીર અને ગર્ભવતી હોવા જેવા પાયાવિહોણા સવાલોનો સામનો કરવો પડે છે, જે સામાજિક માનસિકતાની પછાતતા છતી કરે છે.
પરફોર્મન્સ પરથી ધ્યાન ભટકાવવાનો પ્રયાસ
ઉંમરના આ પડાવે પણ નીના ગુપ્તા ફિલ્મો અને ઓટીટી પ્લેટફોર્મ્સ પર શાનદાર કામ કરી રહ્યા છે. તાજેતરમાં જ નેટફ્લિક્સની કૉમેડી શ્રેણી 'ચુંબક'માં તેમણે સુમિત રાઘવન, અર્જુન બિજલાની અને દેવેન ભોજાણી જેવા દિગ્ગજ કલાકારો સાથે કામ કર્યું છે, જેનું નિર્દેશન 'સારાભાઈ વર્સિસ સારાભાઈ' ફેમ આતિશ કાપડિયાએ કર્યું છે. તેમ છતાં, આવા કલાકારોના ઉત્કૃષ્ટ અભિનય અને પ્રોજેક્ટ્સની ચર્ચા કરવાને બદલે સોશિયલ મીડિયા પર તેમની સાડીની સિલવટ કે વજન વધવા પર ગર્ભાવસ્થાની કહાણીઓ ઘડવી એ સસ્તી લોકપ્રિયતા મેળવવાનો પ્રયાસ માત્ર છે, જેને નીના ગુપ્તાએ પોતાની આગવી રમૂજથી જડબાતોડ જવાબ આપીને ફગાવી દીધો છે.
