Nita Ambani 15 Crore Dragonfly Brooch: રિલાયન્સ ફાઉન્ડેશનનાં ચેરપર્સન નીતા અંબાણી તેમના રોયલ અંદાજ અને અનોખા જ્વેલરી કલેક્શન માટે હંમેશાં ચર્ચામાં રહે છે. તાજેતરમાં મુંબઈના NMACC (નીતા મુકેશ અંબાણી કલ્ચરલ સેન્ટર) ખાતે નવી લાઇબ્રેરીના લોન્ચિંગ પ્રસંગે તેમણે પહેરેલા એક ખાસ ડ્રેગનફ્લાઈ બ્રોચે સૌનું ધ્યાન ખેંચ્યું હતું. સોશિયલ મીડિયા પર આ ઇવેન્ટનો એક વીડિયો વાયરલ થઈ રહ્યો છે, જેમાં બોલિવૂડ અભિનેત્રી કરીના કપૂર ખાન પણ આ અનોખા બ્રોચને નજીકથી નિહાળતી જોવા મળે છે. અંદાજે ₹12થી ₹15 કરોડની કિંમત ધરાવતા આ બ્રોચને તૈયાર કરવામાં 10 વર્ષનો સમય લાગ્યો હોવાનું કહેવાય છે.
શું છે નીતા અંબાણીના બ્રોચની ખાસિયત?
નીતા અંબાણીએ પોતાના બ્લેઝર પર ડ્રેગનફ્લાઈ એટલે કે પતંગિયાની ડિઝાઇન જેવું દેખાતું એક આકર્ષક બ્રોચ પહેર્યું હતું. વિશ્વપ્રસિદ્ધ ચીની જ્વેલરી આર્ટિસ્ટ વાલેસ ચાન દ્વારા તૈયાર કરવામાં આવેલા આ બ્રોચનું નામ ‘સોઅરિંગ સ્પિરિટ’ છે. આ બ્રોચની સૌથી ખાસ વાત તેની જટિલ કારીગરી અને તેમાં વપરાયેલી કિંમતી સામગ્રી છે. તેની ડિઝાઇન તૈયાર કરવામાં એક દાયકા એટલે કે 10 વર્ષનો સમય લાગ્યો હતો. બ્રોચમાં 17.67 કેરેટના ત્સવોરાઇટ ગાર્નેટ ઉપરાંત ડિમેન્ટોઇડ ગાર્નેટ, યલો ડાયમંડ, વ્હાઇટ ડાયમંડ, કલર્ડ ડાયમંડ, રૂબી, પિંક સૅફાયર અને ખાસ પ્રકારના ટાઇટેનિયમનો ઉપયોગ કરવામાં આવ્યો છે.
હલનચલન સાથે પાંખો પણ કરે છે હલનચલન
‘સોઅરિંગ સ્પિરિટ’ બ્રોચની ડિઝાઇનમાં ખાસ ફ્લેક્સિબલ ટાઇટેનિયમનો ઉપયોગ કરવામાં આવ્યો છે. તેના કારણે બ્રોચ પહેરનાર વ્યક્તિની હલનચલન સાથે ડ્રેગનફ્લાઈની પાંખો પણ કુદરતી રીતે હલતી જોવા મળે છે. તેની પાંખોની રચના ‘એબેકસ’થી પ્રેરિત છે. આ અનોખી ટેક્નિક અને બારીક કારીગરી તેને સામાન્ય જ્વેલરીથી અલગ બનાવે છે. કિંમતી રત્નો અને હલનચલન કરતી પાંખોનું સંયોજન આ બ્રોચને વિશેષ બનાવે છે.
કેટલી છે આ બ્રોચની કિંમત?
આંતરરાષ્ટ્રીય બજાર અને સોશિયલ મીડિયા પર ઉપલબ્ધ માહિતી મુજબ, ‘સોઅરિંગ સ્પિરિટ’ બ્રોચની અંદાજિત કિંમત 1.5થી 1.8 મિલિયન અમેરિકન ડોલર છે. ભારતીય ચલણમાં તેની કિંમત આશરે ₹12 કરોડથી ₹15 કરોડની વચ્ચે થાય છે. જોકે, આ કિંમત અંદાજિત છે અને બ્રોચની સત્તાવાર વેચાણ કિંમત જાહેર કરવામાં આવી હોવાની માહિતી નથી.
ડ્રેગનફ્લાઈની ડિઝાઇન પાછળ છુપાયેલો ખાસ સંદેશ
ડ્રેગનફ્લાઈને સપનાં, સ્વતંત્રતા, પરિવર્તન અને અનંત શક્યતાઓનું પ્રતીક માનવામાં આવે છે. NMACCની નવી લાઇબ્રેરીના લોન્ચિંગ પ્રસંગે નીતા અંબાણીએ આ ડિઝાઇન પસંદ કરીને જ્ઞાન, વાંચન અને વિચારોની આઝાદી સાથે જોડાયેલો સંદેશ આપ્યો હોવાનું માનવામાં આવે છે. આ રીતે આ બ્રોચ માત્ર કિંમતી જ્વેલરી પૂરતું મર્યાદિત નથી, પરંતુ તેની પાછળ એક પ્રતીકાત્મક વિચાર પણ જોડાયેલો છે.
નીતા અંબાણીનો ઓવરઓલ લુક પણ રહ્યો ચર્ચામાં
લાઇબ્રેરીના લોન્ચિંગ ઇવેન્ટ માટે નીતા અંબાણીએ ક્લાસી અને સોબર પાવર ડ્રેસિંગ લુક પસંદ કર્યો હતો. તેમણે બેજ રંગનું લિનન પેન્ટસૂટ પહેર્યું હતું. બ્લેઝરની અંદર સમાન રંગના શેડમાં ડેલિકેટ લેસ ટોપ પહેર્યો હતો. જ્વેલરીમાં તેમણે હાથમાં મોટી ડાયમંડ સ્ટેટમેન્ટ રિંગ, લેધર સ્ટ્રેપવાળી લક્ઝરી વોચ અને સાદાં ડાયમંડ ઇયરરિંગ્સ પહેર્યાં હતાં. ન્યુટ્રલ રંગનાં કપડાં સાથે તેમણે ડ્રેગનફ્લાઈ બ્રોચને ખાસ હાઇલાઇટ કર્યું હતું. બીજી તરફ, કરીના કપૂર ખાન પણ આ બ્રોચને નજીકથી નિહાળતી જોવા મળી હતી.
