72nd National Film Awards Gujarat: નર્મદા જિલ્લાના એકતાનગર (કેવડિયા) ખાતે 72મા નેશનલ ફિલ્મ એવોર્ડ્સને લઈને દેશભરના ફિલ્મી સિતારાઓનું આગમન શરૂ થઈ ગયું છે. કાર્તિક આર્યન, રણદીપ હુડા, યામી ગૌતમ અને સાઉથ ફિલ્મ ઈન્ડસ્ટ્રીના સુપરસ્ટાર મમ્મૂટી સહિત અનેક જાણીતી હસ્તીઓ કેવડિયા પહોંચી રહી છે. 22 સપ્ટેમ્બરે યોજાનારા આ સમારોહમાં રાષ્ટ્રપતિ દ્રૌપદી મુર્મુ વિજેતાઓને પુરસ્કાર એનાયત કરશે.
ફિલ્મી સિતારાઓનું પરંપરાગત સ્વાગત
કેવડિયા પહોંચેલા ફિલ્મ જગતના મહેમાનોનું હોટલ ખાતે પરંપરાગત રીતે ભવ્ય સ્વાગત કરવામાં આવી રહ્યું છે. મહેમાનોનું પુષ્પહાર, આરતી અને તિલક કરીને સ્વાગત કરવામાં આવ્યું હતું. રાષ્ટ્રીય કક્ષાના આ સમારોહને કારણે એકતાનગરમાં ફિલ્મી હસ્તીઓની હાજરીથી ઉત્સાહનો માહોલ જોવા મળી રહ્યો છે.
વહીવટી તંત્ર અને સુરક્ષા વ્યવસ્થા સજ્જ
સમારોહને ધ્યાનમાં રાખીને એકતાનગરમાં સુરક્ષા અને કાયદો-વ્યવસ્થાની વ્યવસ્થા ચુસ્ત કરવામાં આવી છે. નર્મદા જિલ્લા વહીવટી તંત્ર દ્વારા મહેમાનોની સુરક્ષા, ટ્રાફિક અને રહેઠાણ સહિતની વ્યવસ્થાઓ પર ખાસ ધ્યાન આપવામાં આવી રહ્યું છે. પોલીસ અને સુરક્ષા એજન્સીઓ દ્વારા સતત મોનિટરિંગ કરવામાં આવી રહ્યું છે.
પહેલીવાર દિલ્હીની બહાર નેશનલ ફિલ્મ એવોર્ડ્સ
72મા નેશનલ ફિલ્મ એવોર્ડ્સનું આયોજન દિલ્હીની બહાર એકતાનગરમાં થઈ રહ્યું છે, જે આ સમારોહની પરંપરામાં મહત્વપૂર્ણ બદલાવ છે. એવોર્ડ્સમાં વર્ષ 2024ની ભારતીય ફિલ્મસૃષ્ટિની શ્રેષ્ઠ સિનેમેટિક સિદ્ધિઓનું સન્માન કરવામાં આવશે. આ વર્ષે ‘આર્ટિકલ 370’ને બેસ્ટ ફીચર ફિલ્મનો એવોર્ડ મળ્યો છે, જ્યારે યામી ગૌતમને બેસ્ટ એક્ટ્રેસનો પુરસ્કાર મળ્યો છે. કાર્તિક આર્યન અને મમ્મૂટીને ‘ચંદુ ચેમ્પિયન’ અને ‘બ્રહ્મયુગમ’ માટે બેસ્ટ એક્ટરનો એવોર્ડ સંયુક્ત રીતે મળ્યો છે. રણદીપ હુડાને ‘સ્વાતંત્ર્ય વીર સાવરકર’ માટે બેસ્ટ ડેબ્યૂ ડિરેક્ટરનો એવોર્ડ મળ્યો છે.
