Will Canada Split?: કેનેડાના રાજકારણમાં હાલ અલ્બર્ટા પ્રાંતને અલગ દેશ બનાવવાની ચર્ચાએ જોર પકડ્યું છે. અલ્બર્ટામાં યોજાનારા સંભવિત જનમત સંગ્રહ (Referendum) પહેલાં જાગતિક કક્ષાની સંસ્થા ‘ઇપ્સોસ’ (Ipsos) અને ‘ગ્લોબલ ન્યૂઝ’ દ્વારા એક ખાસ સરવે હાથ ધરવામાં આવ્યો હતો. આ સરવેના પરિણામો સામે આવ્યા બાદ કેનેડાની રાજધાની ઓટાવા તેમજ પડોશી દેશ અમેરિકાના વોશિંગ્ટન સુધી રાજકીય ગરમાવો આવી ગયો છે. સરવેના આંકડા દર્શાવે છે કે અલ્બર્ટાના બહુમતી નાગરિકો કેનેડા સાથે જ રહેવા માંગે છે, જેનાથી દેશના વિભાજનનો ખતરો હાલ પૂરતો ટળતો દેખાઈ રહ્યો છે.
સરવેના પરિણામો: 70 ટકા લોકો અખંડ કેનેડાના પક્ષમાં
ઇપ્સોસના નવા સરવે મુજબ, દર 10 માંથી 7 નાગરિકો (એટલે કે 70% લોકો) કેનેડાને વિભાજિત થતું અટકાવવા માંગે છે. તેઓનું માનવું છે કે અલ્બર્ટાએ કેનેડાનો એક હિસ્સો બનીને જ રહેવું જોઈએ. બીજી તરફ, માત્ર 30 ટકા લોકો જ અલ્બર્ટાને કેનેડાથી અલગ કરીને એક નવો સ્વતંત્ર દેશ બનાવવાની તરફેણ કરી રહ્યા છે. આ પરિણામોથી સ્પષ્ટ થાય છે કે કેનેડાના નાગરિકો દેશની એકતા અને અખંડિતતાને પ્રાથમિકતા આપી રહ્યા છે.
શહેરોનું વલણ અને યુવા વર્ગમાં અલગ દેશની માગ
અલ્બર્ટાના બે સૌથી મોટા અને મહત્વના શહેરો - કેલગરી અને એડમન્ટન - માં અલગ દેશ બનાવવાની માંગને બહુ ઓછો પ્રતિસાદ મળ્યો છે. આ બંને મહાનગરોના માત્ર 31 ટકા લોકો જ અલગ દેશ માટેના જનમત સંગ્રહને સમર્થન આપી રહ્યા છે. જોકે, સરવેમાં એક ચોંકાવનારી બાબત એ સામે આવી છે કે 27 થી 35 વર્ષની વયજૂથ ધરાવતા યુવાનોમાં અલગ થવાની ઈચ્છા સૌથી વધુ જોવા મળી છે. આ ઉપરાંત, અલ્બર્ટાના મોટાભાગના રહેવાસીઓએ વર્તમાન કેનેડા સરકારની ઇમિગ્રેશન નીતિઓ પ્રત્યે ભારે નારાજગી વ્યક્ત કરી હતી.
પ્રીમિયર ડેનિયલ સ્મિથનું વલણ અને આગળની પ્રક્રિયા
અલ્બર્ટા પ્રાંતના પ્રીમિયર ડેનિયલ સ્મિથે આ મુદ્દે સ્થિતિ સ્પષ્ટ કરતા જણાવ્યું છે કે, કોઈ પણ આખરી નિર્ણય લેતા પહેલાં નાગરિકો પાસે એ વાત પર મતદાન કરાવવામાં આવશે કે શું જનમત સંગ્રહ યોજવો જરૂરી છે કે નહીં. જો પ્રાંતની જનતા આ પ્રક્રિયા આગળ વધારવાની તરફેણમાં મતદાન કરશે, તો જ અલગ દેશ માટેના જનમત સંગ્રહનું આયોજન કરવામાં આવશે. આ જાહેરાત બાદ મંગળવારે પ્રારંભિક પ્રક્રિયા અંગે મતદાન થવાની શક્યતાઓ સેવાઈ રહી છે.
વડાપ્રધાનનો ભારતીય સમુદાય સાથે સંપર્ક અને વિભાજન રોકવાના પ્રયાસો
કેનેડાના વડાપ્રધાન માર્ક કાર્ની અલ્બર્ટાને દેશથી અલગ થતું અટકાવવા માટે તમામ રાજકીય અને સામાજિક પ્રયાસો કરી રહ્યા છે. અલ્બર્ટા પ્રાંતમાં ભારતીય મૂળના લોકોની વસ્તી નોંધપાત્ર છે. આ પરિસ્થિતિને ધ્યાનમાં રાખીને વડાપ્રધાને અલ્બર્ટામાં રહેતા 30 હજારથી પણ વધુ ભારતીય સમુદાયના લોકો સાથે સીધો સંપર્ક સાધ્યો છે, જેથી તેઓ દેશની એકતા જાળવી રાખવા માટે અખંડ કેનેડાના પક્ષમાં પોતાનો અવાજ બુલંદ કરી શકે.
