Rahul Gandhi Questions SDM: દિલ્હીમાં ચાલી રહેલી મતદાર યાદીના સ્પેશિયલ ઇન્ટેન્સિવ રિવિઝન (SIR) પ્રક્રિયાને લઈને રાજકીય ગરમાવો વધી ગયો છે. લોકસભામાં વિરોધ પક્ષના નેતા અને કોંગ્રેસના સાસંદ રાહુલ ગાંધીએ સોમવારે દિલ્હીમાં યમુના નદીના કાંઠે આવેલા બેલા એસ્ટેટ નામના ઝૂંપડપટ્ટી વિસ્તારની અચાનક મુલાકાત લીધી હતી. ત્યાંના સ્થાનિક રહીશો સાથે વાતચીત કરીને તેમણે મતદાર યાદીમાં થયેલી મોટી ગડબડ અંગે ગંભીર સવાલો ઉઠાવ્યા હતા. રાહુલ ગાંધીએ પોતાના સોશિયલ મીડિયા એકાઉન્ટ પર એક વીડિયો શેર કરીને આરોપ લગાવ્યો હતો કે, આ વિસ્તારમાં વર્ષોથી રહેતા નિર્દોષ નાગરિકોના મત આપવાના બંધારણીય અધિકાર છીનવી લેવાનો પ્રયાસ થઈ રહ્યો છે.
728માંથી 727 નામ ગાયબ
રાહુલ ગાંધીએ આંકડાકીય વિગતો આપતા દાવો કર્યો હતો કે બેલા એસ્ટેટના આ ચોક્કસ વિસ્તારમાં પહેલા 728 માન્ય મતદારો નોંધાયેલા હતા. પરંતુ તાજેતરમાં SIR પ્રક્રિયા પૂર્ણ થયા બાદ બહાર આવેલી યાદીમાં માત્ર એક જ વ્યક્તિનું નામ બાકી બચ્યું છે, જ્યારે 727 લોકોના નામ મતદાર યાદીમાંથી કાયમ માટે કાઢી નાખવામાં આવ્યા છે. તેમણે ભારપૂર્વક જણાવ્યું કે, આ લોકો છેલ્લા ઘણા વર્ષોથી અહીં જ વસવાટ કરે છે અને તેમણે 2024ની લોકસભા ચૂંટણી તેમજ 2025ની દિલ્હી વિધાનસભા ચૂંટણીમાં પણ સક્રિય રીતે પોતાના મતાધિકારનો ઉપયોગ કર્યો હતો. વર્ષ 2023માં તેમના મકાનો તોડી પાડવામાં આવ્યા હોવા છતાં તેઓ આ વિસ્તાર છોડીને ક્યાંય ગયા નથી અને હજુ પણ ત્યાં જ જીવન વિતાવી રહ્યા છે.
ઘટનાસ્થળેથી જ SDMને ફોન કરી ક્લાસ લીધો
મુલાકાત દરમિયાન સ્થાનિક રહીશોએ પોતાની આપવીતી જણાવતા રાહુલ ગાંધીએ કોઈ પણ વિલંબ વગર સીધા જ જવાબદાર સબ-ડિવિઝનલ મેજિસ્ટ્રેટ (SDM)ને ફોન જોડ્યો હતો. રાહુલ ગાંધીએ અધિકારી સમક્ષ સવાલ ઉઠાવ્યો હતો કે, મકાન અથવા ઘર હોવા અને મત આપવાના અધિકાર વચ્ચે શો સંબંધ છે? જો આ લોકો અહીં જ રહે છે તો પછી તેમના નામ કયા આધારે રદ કરવામાં આવ્યા? વાતચીત દરમિયાન અધિકારીના ગોળ-ગોળ જવાબોથી નારાજ થઈને રાહુલ ગાંધીએ કડક વલણ અપનાવ્યું હતું અને અધિકારીને સ્પષ્ટ શબ્દોમાં ચેતવણી આપતા જણાવ્યું હતું કે, "જો ગરીબ નાગરિકોના મતાધિકાર સાથે આવી અન્યાયી રમત રમાશે, તો તમને બીજી રીતે જોઈ લેવામાં આવશે."
દિલ્હીમાં 47 લાખથી વધુ નામો ડ્રાફ્ટ યાદીમાંથી ગાયબ થવાનો દાવો
માત્ર એક વિસ્તાર પૂરતો આ મુદ્દો સીમિત નથી, પરંતુ કોંગ્રેસ પક્ષ દ્વારા એવો પણ દાવો કરવામાં આવ્યો છે કે સમગ્ર દિલ્હીમાં SIR પ્રક્રિયા દરમિયાન ડ્રાફ્ટ મતદાર યાદીમાંથી આશરે 47 લાખથી વધુ મતદારોના નામ ગાયબ કરી દેવાયા છે. વિપક્ષનો આરોપ છે કે આ રીતે વહીવટીતંત્ર દ્વારા ગરીબ, મધ્યમ વર્ગ અને ઝૂંપડપટ્ટીમાં રહેતા લોકોના નામ યાદીમાંથી હટાવીને તેમને લોકશાહી પ્રક્રિયાથી વંચિત રાખવાનો પ્રયાસ કરવામાં આવી રહ્યો છે.
લોકશાહી અને બંધારણીય હક્કોની રક્ષા માટે લડત તેજ કરવાનો સંકલ્પ
પોતાની મુલાકાતના અંતે રાહુલ ગાંધીએ સ્થાનિક લોકોને આશ્વાસન આપ્યું હતું કે કોંગ્રેસ પક્ષ તેમના અધિકારો માટે સડકથી લઈને સંસદ સુધી અવાજ ઉઠાવશે. તેમણે ભારપૂર્વક કહ્યું કે, દેશના દરેક નાગરિકને યોગ્ય રીતે મત આપવાનો અધિકાર છે અને વહીવટી ગેરરીતિઓ ચલાવી લેવામાં નહીં આવે. આ ઘટના બાદ દિલ્હીના રાજકારણમાં અને ચૂંટણી પંચની કામગીરી સામે ફરી એકવાર અનેક પ્રશ્નાર્થચિહ્નો ઊભા થયા છે.
