Nithya Raman Los Angeles Mayor Election: અમેરિકાના બીજા સૌથી મોટા અને વસ્તી ધરાવતા શહેર લોસ એન્જલસના રાજકારણમાં એક નવો ઐતિહાસિક અધ્યાય લખાયો છે. ભારતીય મૂળના પ્રગતિશીલ નેતા નિત્યા રમણે લોસ એન્જલસના મેયરપદની ચૂંટણીમાં વર્તમાન મેયર કેરેન બાસ સામે મોટી રાજકીય જીત મેળવી છે. આ જીત સાથે જ નિત્યા રમન લોસ એન્જલસના પ્રથમ એશિયન-અમેરિકન મેયર બનવાનું ગૌરવ ધરાવે છે. 1981માં કેરળમાં જન્મેલા નિત્યા રમન માત્ર છ વર્ષની ઉંમરે પરિવાર સાથે અમેરિકા ગયાં હતાં અને 22 વર્ષની વયે અમેરિકી નાગરિકત્વ મેળવ્યું હતું. અમેરિકાના રાજકારણમાં ગ્લોબલ સ્તરે ભારતીય મૂળની વ્યક્તિનું આ કદાવર નેતૃત્વ તરીકે ઉભરી આવવું સમગ્ર ભારત અને વિશેષ કરીને એશિયાઈ સમુદાય માટે ગૌરવની વાત છે.
રાજકીય ગરમાવો અને ચૂંટણીનો રોમાંચક તબક્કો: કેરેન બાસ સામે કડી ટક્કર
મેયરપદની આ ચૂંટણી લોસ એન્જલસના ઈતિહાસની સૌથી ચર્ચિત અને રોમાંચક ટક્કરમાંથી એક બની રહી હતી. નિત્યા રમન વર્ષ 2020માં પ્રથમ વખત લોસ એન્જલસ સિટી કાઉન્સિલમાં ચૂંટાઈને આવ્યા હતા. શરૂઆતમાં તેમણે વર્તમાન મેયર કેરેન બાસને જાહેર સમર્થન આપ્યું હતું, પરંતુ બાદમાં શહેરી નીતિઓ અને સમસ્યાઓના મુદ્દે બંને વચ્ચે વૈચારિક અને રાજકીય મતભેદો સર્જાયા હતા. પ્રાથમિક ચૂંટણીઓમાં વર્તમાન મેયર બાસને મળેલા નબળા સમર્થન બાદ ચૂંટણી પ્રચાર બે પેઢીઓ અને રાજકીય વિચારધારાઓ વચ્ચેની સીધી ટક્કરમાં ફેરવાઈ ગયો હતો. ચૂંટણીના અંતિમ દિવસો સુધી બંને પક્ષો વચ્ચે જોરદાર પ્રચાર જંગ ખેલાયો હતો.
લોસ એન્જલસના મુખ્ય મુદ્દા: ઘરવિહોણા લોકો, જાહેર સુરક્ષા અને સસ્તાં મકાનો
લોસ એન્જલસ મેયરપદની ચૂંટણીમાં ઘરવિહોણા (હોમલેસ) લોકોની સમસ્યા, શહેરી સુરક્ષા અને મોંઘા મકાનો મુખ્ય મુદ્દા રહ્યા હતા. ચૂંટણી દરમિયાન કેરેન બાસને ડેમોક્રેટિક પાર્ટીના પ્રભાવશાળી જૂથો અને લેબર ફેડરેશનનું સમર્થન પ્રાપ્ત હતું. સામે પક્ષે નિત્યા રમનને ડેમોક્રેટિક સોશિયલિસ્ટ્સ ઓફ અમેરિકા અને યુવા પરિવહન સંગઠનો જેવા પ્રગતિશીલ જૂથોનો મજબૂત ટેકો મળ્યો હતો. કેરેન બાસે વૃદ્ધ મતદારોને રિઝવવા પર ધ્યાન આપ્યું હતું, જ્યારે નિત્યા રમણે બાર, કોલેજ કેમ્પસ અને નાઈટ ક્લબમાં યુવા વર્ગ વચ્ચે જઈને વહીવટમાં અમૂલ્ય પરિવર્તન લાવવાનો સંદેશ વહેતો કર્યો હતો.
પેલિસેડ્સ આગ દુર્ઘટના અને બાસની લોકપ્રિયતામાં કડાકો
વર્તમાન મેયર કેરેન બાસ અગાઉ અમેરિકી કોંગ્રેસ અને કેલિફોર્નિયા વિધાનસભાના સભ્ય રહી ચૂક્યા છે, પરંતુ તેમના કાર્યકાળ દરમિયાન બનેલી ઘટનાઓએ વિરોધીઓને મોકો આપ્યો હતો. વર્ષ 2025માં પેલિસેડ્સ વિસ્તારમાં લાગેલી ભીષણ આગ વખતે કેરેન બાસ દેશની બહાર રાજદ્વારી મિશન પર હતાં, જેને કારણે તેમની લોકપ્રિયતામાં ભારે ઘટાડો નોંધાયો હતો. નિત્યા રમણે આ નીતિઓની આકરા શબ્દોમાં ટીકા કરી તેને ખર્ચાળ અને અસફળ ગણાવી હતી. રમણે પોતાના કાઉન્સિલ વિસ્તાર હોલિવૂડ હિલ્સમાં હોમલેસ કેમ્પ ઘટાડીને બતાવેલા સફળ મોડેલના આધારે આગામી વર્ષોમાં રસ્તા પર રહેતા લોકોની સંખ્યા અડધી કરવાનો મજબૂત વાયદો આપ્યો હતો.
કેરળથી MIT અને હાર્વર્ડ સુધી: જાણો કોણ છે નિત્યા રમન?
નિત્યા રમનની શૈક્ષણિક અને સામાજિક પૃષ્ઠભૂમિ અત્યંત પ્રભાવશાળી રહી છે. તેમણે વિશ્વપ્રસિદ્ધ હાર્વર્ડ યુનિવર્સિટીમાંથી ગ્રેજ્યુએશન અને મેસેચ્યુસેટ્સ ઈન્સ્ટિટ્યૂટ ઓફ ટેક્નોલોજી (MIT) માંથી અર્બન પ્લાનિંગમાં માસ્ટર્સની ડિગ્રી મેળવી છે. રાજકારણમાં સક્રિય થતાં પહેલાં તેમણે ભારતમાં 'ટ્રાન્સપરન્ટ ચેન્નાઈ' નામની સંસ્થાગત પહેલ કરી હતી, જે શહેરી સંશોધન અને સ્વચ્છતા ક્ષેત્રે કાર્યરત હતી. લોસ એન્જલસમાં સ્થાયી થયા બાદ તેમણે SELAH નેબરહૂડ હોમલેસ કોએલિશનની સ્થાપના કરી અને મહિલા સશક્તિકરણ માટે કામ કરતી 'ટાઈમ્સ અપ એન્ટરટેઈનમેન્ટ'ના એક્ઝિક્યુટિવ ડિરેક્ટર તરીકે પણ સેવાઓ આપી હતી.
વિજયી સંબોધન અને સમર્થકોમાં ઉત્સાહ: "આશાવાદી છું પરંતુ સંયમ જરૂરી"
ચૂંટણી પરિણામોના સંકેત મળતાં જ ગ્રીક થિયેટર પ્લાઝા ખાતે એકત્રિત થયેલા હજારો સમર્થકોને સંબોધતી વખતે પણ નિત્યા રમણે અત્યંત નમ્રતા અને સાવધાની દાખવી હતી. તેમણે સમર્થકોને સંબોધતા કહ્યું હતું કે, "હું ખૂબ જ આશાવાદી છું, પરંતુ આપણે શાંત રહીને આગળ વધવાની જરૂર છે". તેમણે ઉમેર્યું કે લોસ એન્જલસના લોકોએ નિરાશાના સ્થાને આશા અને સકારાત્મક પરિવર્તનને પસંદ કર્યું છે. લોસ એન્જલસના રાજકારણમાં થયેલો આ મોટો ફેરફાર અમેરિકી રાજકારણમાં પ્રગતિશીલ ભારતીય નેતૃત્વની નવી ઓળખ ઊભી કરી રહ્યો છે.
