Fire Breaks Out at Savannah River National Laboratory in US: અમેરિકાના દક્ષિણ કેરોલિના રાજ્યમાં આવેલા મહત્વપૂર્ણ પરમાણુ મથક સવાન્ના રિવર સાઇટ (SRS) ખાતે અચાનક આગ લાગવાની ઘટના સામે આવતા તંત્રમાં દોડધામ મચી ગઈ હતી. એકેન શહેર નજીક આવેલા આ અત્યંત સંવેદનશીલ સવાન્ના રિવર નેશનલ લેબોરેટરી સંકુલમાં સાંજે અંદાજે 5:39 વાગ્યે એક રૂમમાં આગ ભડકી ઉઠી હતી. ન્યુક્લિયર સુવિધા હોવાને કારણે ઘટનાની ગંભીરતા જોઈને તુરંત જ સાઇટ એરિયા ઇમરજન્સી (કટોકટી) જાહેર કરી દેવામાં આવી હતી. ઘટનાની જાણ થતાં જ ફાયર ફાઇટરો અને કટોકટી વ્યવસ્થાપન ટીમો સ્થળ પર પહોંચી ગઈ હતી અને પરિસ્થિતિ પર કાબૂ મેળવવા કાર્યવાહી હાથ ધરી હતી.
બે કલાકની ભારે મથામણ બાદ આગ પર પૂર્ણ કાબૂ
ન્યુક્લિયર લેબમાં લાગેલી આગને બુઝાવવા માટે સુરક્ષાકર્મીઓ અને ફાયરબ્રિગેડ જવાનોએ તાત્કાલિક મોરચો સંભાળ્યો હતો. અંદાજે બે થી ચાર કલાકની ભારે જહેમત અને ચોક્કસ સુરક્ષા પ્રોટોકોલના પાલન બાદ આગ પર પૂર્ણપણે કાબૂ મેળવી લેવાયો હતો. સ્થિતિ સામાન્ય થતાં તંત્ર દ્વારા ઇમરજન્સી પાછી ખેંચી લેવામાં આવી હતી. આ ઘટના દરમિયાન કોઈ મોટી જાનહાનિના અહેવાલ મળ્યા નથી, જે અત્યંત રાહતના સમાચાર છે.
રેડિયોએક્ટિવ લીકેજનો શું છે ખતરો? તંત્રએ આપી સ્પષ્ટતા
ન્યુક્લિયર ફેસિલીટીમાં આગ લાગતાની સાથે જ આસપાસના વિસ્તારોમાં કિરણોત્સર્ગી પદાર્થો (રેડિયોએક્ટિવ મટીરિયલ) ફેલાવાનો મોટો ડર ઊભો થયો હતો. જોકે, ઘટના બાદ હાથ ધરવામાં આવેલા રક્ષણાત્મક સરવે અને પ્રાથમિક તપાસમાં રાહતજનક માહિતી સામે આવી છે. અધિકારીઓએ સ્પષ્ટતા કરી છે કે આ ઘટનામાં અસરગ્રસ્ત વિસ્તારની બહાર કોઈ પણ પ્રકારનું કિરણોત્સર્ગી લીકેજ કે પ્રદૂષણ નોંધાયું નથી. આમ છતાં, પરમાણુ કેન્દ્ર હોવાને કારણે તજજ્ઞોની ટીમ દ્વારા સમગ્ર વિસ્તારનું ઝીણવટભર્યું નિરીક્ષણ કરવામાં આવી રહ્યું છે.
સુરક્ષાના ભાગરૂપે જમીની, જળ અને વાયુ વાહનવ્યવહાર પર રોક
આગ લાગ્યાની ક્ષણોમાં જ સુરક્ષાના તમામ કડક પગલાં લાગુ કરી દેવામાં આવ્યા હતા. સાવચેતી રૂપે લેબોરેટરીના તમામ મુખ્ય પ્રવેશદ્વારો બંધ કરી દેવાયા હતા અને માત્ર ઇમરજન્સી વાહનોને જ પ્રવેશ આપવામાં આવ્યો હતો. આ ઉપરાંત, આસપાસના રેલવે માર્ગ, નજીકની નદીનો જળમાર્ગ અને નો-ફ્લાય ઝોન બનાવીને હવાઈ ટ્રાફિક પર પણ થોડા સમય માટે પ્રતિબંધ લાદવામાં આવ્યો હતો. લેબમાં કામ કરતા બિન-જરૂરી કર્મચારીઓને સલામત સ્થળે 'શેલ્ટર-ઇન-પ્લેસ' (પોતાની જગ્યા પર જ સુરક્ષિત રહેવાની) સૂચના આપવામાં આવી હતી.
શા માટે ખાસ છે આ સવાન્ના રિવર સાઇટ?
અમેરિકાના પરમાણુ સુરક્ષા ક્ષેત્રે સવાન્ના રિવર સાઇટનું સ્થાન ખૂબ જ મહત્વપૂર્ણ છે. 1950ના દાયકામાં સ્થપાયેલું આ મથક અમેરિકાના રાષ્ટ્રીય સુરક્ષા અને ઊર્જા વિભાગ હેઠળ કામ કરે છે. ભૂતકાળમાં અહીં પરમાણુ શસ્ત્રો માટે ઉપયોગી પ્લુટોનિયમ અને ટ્રિટિયમ જેવા સંવેદનશીલ પદાર્થોનું ઉત્પાદન કરવામાં આવતું હતું. હાલના સમયે આ સંકુલમાં પરમાણુ કચરાનો નિકાલ, પર્યાવરણ સુરક્ષા અને ન્યુક્લિયર વિજ્ઞાનને લગતા અત્યાધુનિક સંશોધનો કરવામાં આવે છે.
ઘટનાના મૂળ કારણો શોધવા ઉચ્ચ સ્તરીય તપાસ શરૂ
આગની આ ગંભીર ઘટના બાદ હવે કારણો શોધવા માટે ઉચ્ચ સ્તરીય તપાસના આદેશ આપવામાં આવ્યા છે. પરમાણુ સંકુલની અંદર આગ કયા ક્ષતિના કારણે લાગી, શોર્ટ સરકિટ હતું કે કોઈ ટેકનિકલ ખામી, તે દિશામાં નિષ્ણાતોની ટીમ તપાસ કરી રહી છે. સ્થાનિક નાગરિકોને અફવાઓથી દૂર રહેવા અને માત્ર સત્તાવાર રેડિયો તથા સરકારી માધ્યમોથી મળતી વિગતો પર વિશ્વાસ રાખવા અપીલ કરવામાં આવી છે.
