US Ends 540-Day EAD Auto-Extension Rule: યુએસ ડિપાર્ટમેન્ટ ઓફ હોમલેન્ડ સિક્યોરિટી (DHS) દ્વારા ઇમિગ્રન્ટ્સ અને વિદેશી કામદારો માટેના વર્ક પરમિટ (EAD) રિન્યુઅલ નિયમોમાં મોટો અને મહત્વપૂર્ણ ફેરફાર કરવામાં આવ્યો છે. આ નવા અંતિમ નિયમ અનુસાર, હવે વર્ક પરમિટ રિન્યુઅલની અરજી પેન્ડિંગ હોય તે દરમિયાન મળતું 540 દિવસનું ઓટોમેટિક એક્સટેન્શન કાયમી ધોરણે રદ કરી દેવામાં આવ્યું છે. આ ફેરફાર લાગુ થતાંની સાથે જ, જો વર્ક પરમિટની મુદત પૂરી થઈ જશે તો અરજી પેન્ડિંગ હોવા છતાં કામ કરવાનો કાનૂની અધિકાર તુરંત જ સમાપ્ત થઈ જશે. આ ઉપરાંત, વિદેશી કામદારો પરમિટ એક્સપાયર થવાના 180 દિવસ અગાઉથી રિન્યુઅલ માટે અરજી કરી શકશે નહીં.
ઓટોમેટિક એક્સટેન્શન નીતિ શા માટે શરૂ કરાઈ હતી?
યુએસ સિટિઝનશિપ એન્ડ ઇમિગ્રેશન સર્વિસિસ (USCIS)માં એપ્લિકેશન પ્રોસેસિંગમાં થતા ભારે વિલંબ અને બેકલોગને કારણે વિદેશી કામદારોને નોકરીમાંથી હાથ ન ધોવા પડે તે હેતુથી અગાઉ 540 દિવસ સુધી કામ ચાલુ રાખવાની ઓટોમેટિક એક્સટેન્શન સગવડ આપવામાં આવી હતી. જો કે, વર્તમાન વહીવટીતંત્રનું માનવું છે કે ટૂંકા કે નિયમિત એક્સટેન્શનથી અરજદારોની પાત્રતા અને સુરક્ષા ચકાસણી (Vetting) વધુ કડક અને ઝીણવટભરી રીતે કરી શકાય છે.
કોના પર પડશે સૌથી મોટી અસર અને USCISની વર્તમાન સ્થિતિ?
આ નવા નિર્ણાયક નિર્ણયથી એમ્પ્લોયમેન્ટ ઓથોરાઇઝેશન ડોક્યુમેન્ટ્સ (EAD) પર નિર્ભર રહેતા હજારો ઇમિગ્રન્ટ્સ અને ભારતીય સમુદાયને સીધી અસર થશે. આમાં મુખ્યત્વે H-1B વિઝા ધારકોના જીવનસાથી (H-4 વિઝા ધારકો), શરણાર્થીઓ (Asylum seekers) અને ગ્રીન કાર્ડ મેળવવાની પ્રક્રિયામાં રહેલા કામદારોનો સમાવેશ થાય છે. જો કે, USCIS હજુ પણ એપ્લિકેશન્સના ભારે બેકલોગનો સામનો કરી રહ્યું છે. ડેટા અનુસાર, 4,32,000થી વધુ રિન્યુઅલ અરજીઓ 6 મહિનાથી વધુ સમયથી પેન્ડિંગ છે, જ્યારે 91,000થી વધુ અરજીઓ 18 મહિના કરતાં પણ વધુ સમયથી મંજૂરીની રાહ જોઈ રહી છે.
કોર્ટ કેસ અને કાનૂની વિવાદોની વર્તમાન સ્થિતિ
આ કડક નીતિ સામે અગાઉથી જ અમેરિકી અદાલતોમાં કાનૂની પડકારો શરૂ થઈ ગયા છે. જાન્યુઆરીમાં H-4 વિઝા ધારકોના એક જૂથે DHS સામે એડમિનિસ્ટ્રેટિવ પ્રોસિજર એક્ટના ઉલ્લંઘનનો આરોપ મૂકીને કેસ દાખલ કર્યો હતો. કેલિફોર્નિયાની એક ફેડરલ કોર્ટે નોંધ્યું હતું કે એજન્સીએ નિયમ બનાવતી વખતે યોગ્ય પ્રક્રિયા અનુસરી ન હતી અને અરજદારોના હિતો ધ્યાને લીધા ન હતા, જેથી તે કેસના અરજદારો પૂરતો મર્યાદિત સ્ટે આપ્યો હતો. તેમ છતાં, DHS દ્વારા આ અંતિમ ફેડરલ રજિસ્ટર નોટિફિકેશન સાથે નવા નિયમની અમલવારી શરૂ કરી દેવામાં આવી છે.
ભારતીય આઈટી વ્યાવસાયિકો અને H-4 પરિવારો માટે ચિંતાનો વિષય
અમેરિકામાં વસતા મોટી સંખ્યામાં ભારતીય આઈટી પ્રોફેસનલ્સ અને તેમના પરિવારો માટે આ નિર્ણય ભારે ચિંતા ઉપજાવનારો છે. USCISમાં ચાલતા વિલંબને કારણે H-4 વિઝા ધારકો માટે વર્ક પરમિટ લેપ્સ થવાનું જોખમ વધી ગયું છે, જેનાથી તેમની રોજગારી, કંપનીઓના સંચાલન અને તેમના પારિવારિક આર્થિક સ્થિરતા પર સીધી અસર પડી શકે તેમ છે. ઇમિગ્રેશન નિષ્ણાતો હવે સલાહ આપી રહ્યા છે કે વર્ક પરમિટ ધારકોએ 180 દિવસની વિન્ડો ખૂલતાની સાથે જ પોતાની રિન્યુઅલ અરજી દાખલ કરી દેવી જોઈએ.
