US Child Passport New Rules: અમેરિકામાં બાળકોના પાસપોર્ટને લઈને નિયમોમાં ફેરફાર કરવાની તૈયારી ચાલી રહી છે. અમેરિકન વિદેશ મંત્રાલયે એક નવો પ્રસ્તાવ તૈયાર કર્યો છે, જેમાં બાળકનો પાસપોર્ટ બનાવતી વખતે માતા-પિતા અથવા કાનૂની વાલીઓએ પોતાની અમેરિકન નાગરિકતા અથવા અમેરિકામાં કાયદેસર રહેવાની સ્થિતિનો પુરાવો રજૂ કરવો પડી શકે છે. આ પ્રસ્તાવ રાષ્ટ્રપતિ ડોનાલ્ડ ટ્રમ્પના અમેરિકામાં જન્મજાત નાગરિકત્વ (Birthright Citizenship) અંગેના નિયમોમાં ફેરફાર કરવાના પ્રયાસો સાથે જોડાયેલો છે. જોકે, આ ફેરફાર હાલ પ્રસ્તાવના તબક્કામાં છે અને તેનો અંતિમ અમલ કોર્ટના નિર્ણય તથા સરકારની આગળની પ્રક્રિયા પર નિર્ભર રહેશે.
હાલ બાળકના પાસપોર્ટ માટે શું જરૂરી છે?
હાલના નિયમો અનુસાર અમેરિકામાં જન્મેલા બાળકનો પાસપોર્ટ બનાવતી વખતે માતા-પિતાએ બાળક સાથેના પોતાના સંબંધનો પુરાવો અને પોતાની ઓળખ દર્શાવતા દસ્તાવેજો રજૂ કરવા પડે છે. જો નવા પ્રસ્તાવને મંજૂરી મળે તો માતા-પિતાની નાગરિકતા અથવા અમેરિકામાં કાયદેસર રહેઠાણની સ્થિતિ અંગેના દસ્તાવેજો પણ જરૂરી બની શકે છે.
માતા-પિતાએ કયા પુરાવા આપવા પડી શકે?
પ્રસ્તાવિત વ્યવસ્થા હેઠળ અમેરિકન નાગરિક માતા-પિતા અમેરિકન પાસપોર્ટ અથવા જન્મ પ્રમાણપત્ર જેવા દસ્તાવેજોથી પોતાની નાગરિકતા સાબિત કરી શકે છે. અમેરિકન નાગરિક ન હોય તેવા માતા-પિતાએ અમેરિકામાં કાયદેસર રીતે રહેતા હોવાનો પુરાવો રજૂ કરવો પડી શકે છે. આ માહિતીના આધારે સરકાર બાળકની નાગરિકતાની પાત્રતા અંગે તપાસ કરી શકે છે.
ટ્રમ્પ સરકારના જન્મજાત નાગરિકત્વના પ્રયાસ સાથે જોડાણ
ડોનાલ્ડ ટ્રમ્પ વહીવટીતંત્ર અમેરિકામાં જન્મજાત નાગરિકત્વના નિયમોમાં ફેરફાર કરવાનો પ્રયાસ કરી રહ્યું છે. આ પ્રયાસોમાં ખાસ કરીને એવા કિસ્સાઓને રોકવાનો ઉલ્લેખ કરવામાં આવ્યો છે, જેમાં મહિલાઓ માત્ર અમેરિકામાં બાળકને જન્મ આપવા માટે પ્રવાસ કરે છે. આ પ્રથાને સામાન્ય રીતે Birth Tourism કહેવામાં આવે છે.
શરૂઆતના આદેશમાં શું હતું?
ટ્રમ્પના શરૂઆતના આદેશમાં એવી જોગવાઈ કરવાનો પ્રયાસ કરવામાં આવ્યો હતો કે અમેરિકામાં જન્મેલા બાળકને આપમેળે નાગરિકતા ત્યારે જ મળે જ્યારે માતા-પિતામાંથી ઓછામાં ઓછો એક વ્યક્તિ અમેરિકન નાગરિક અથવા ગ્રીન કાર્ડ ધારક હોય. જો, કે આ નીતિને કોર્ટમાં પડકારવામાં આવી છે અને જન્મજાત નાગરિકત્વ સાથે જોડાયેલા બંધારણીય મુદ્દાઓને લઈને કાનૂની લડાઈ ચાલી રહી છે.
નવા પગલાને પણ કોર્ટમાં પડકાર
ટ્રમ્પ વહીવટીતંત્રના આ નવા પ્રયાસ સામે પણ કાનૂની પડકાર આપવામાં આવ્યો છે. જે બાળકોની નાગરિકતા પ્રભાવિત થઈ શકે છે તેમના વતી અરજી દાખલ કરવામાં આવી છે અને વકીલોએ આ નીતિના અમલ પર રોક લગાવવાની માગ કરી છે. મેરીલેન્ડની ફેડરલ કોર્ટમાં પણ આ મામલે કાર્યવાહી ચાલી રહી છે. ન્યાયાધીશ ડેબોરા બોર્ડમેને કેસને આગળ વધવાની મંજૂરી આપી છે, જેથી આ નીતિના અમલીકરણને રોકી શકાય કે નહીં તે અંગે નિર્ણય થઈ શકે.
સરકારનું કહેવું શું છે?
અમેરિકન સરકારનું કહેવું છે, કે નવા નિયમના અમલીકરણની પ્રક્રિયા હજુ પૂર્ણ થઈ નથી. ન્યાય વિભાગે કોર્ટમાં એવી દલીલ પણ કરી છે કે નિયમને સંપૂર્ણ રીતે અમલમાં મૂકવામાં આવે તે પહેલાં જ તેને પડકારવો ઉતાવળભર્યો અભિગમ છે. જો આ પ્રસ્તાવ અંતિમ સ્વરૂપમાં લાગુ થાય છે, તો અમેરિકામાં જન્મેલા બાળકોના પાસપોર્ટ માટેની પ્રક્રિયા વધુ કડક બની શકે છે. ખાસ કરીને માતા-પિતાની નાગરિકતા અથવા અમેરિકામાં કાયદેસર રહેઠાણની સ્થિતિના પુરાવા અંગે વધારાની તપાસ થઈ શકે છે.
