Uproar erupts in Parliament: સંસદની ગૃહ બાબતોની સમિતિની મંગળવારે, 25 ઓગસ્ટ 2026ના રોજ મળેલી બેઠકમાં પેલેટ ગનના ઉપયોગ અને જંતર-મંતર ખાતે થયેલા લાઠીચાર્જના મુદ્દે ભારે હોબાળો થયો હતો. સૂત્રોના જણાવ્યા અનુસાર, વિપક્ષી સભ્યોએ આ બંને મુદ્દાઓ પર ચર્ચા કરવાની માંગ કરી હતી. જોકે, સમિતિના અધ્યક્ષ અને ભાજપના સાંસદ રાધામોહન દાસે આ મુદ્દાઓને બેઠકના એજન્ડામાં ચર્ચા માટે સ્વીકારવાનો ઇનકાર કર્યો હોવાનો દાવો કરવામાં આવ્યો છે.
રાહુલ ગાંધીના ધરણાં બાદ નોંધાઈ FIR
દિલ્હીમાં વિદ્યાર્થી આંદોલન દરમિયાન પેલેટ ગનથી ઘવાયેલા સાહિલના કેસમાં FIR નોંધવાની માંગ સાથે લોકસભામાં વિપક્ષના નેતા રાહુલ ગાંધી સંસદ માર્ગ પોલીસ સ્ટેશનની બહાર ધરણાં પર બેઠા હતા. રાહુલ ગાંધી લગભગ પાંચ કલાક સુધી ધરણાં પર રહ્યા બાદ પોલીસે આખરે અજાણ્યા શખ્સો સામે કેસ નોંધ્યો હતો. આ ઘટનાને લઈને રાજકીય માહોલ વધુ ગરમાયો છે.
ગૃહમંત્રી સામે રાહુલ ગાંધીના ગંભીર સવાલો
રાહુલ ગાંધીએ લોકસભામાં દાવો કર્યો હતો કે સાહિલના શરીરમાં 200થી વધુ છરા અને આંખમાં ત્રણ છરા વાગ્યા છે. તેમણે સવાલ ઉઠાવ્યો હતો કે વિદ્યાર્થીઓ સામે ખીલી લગાવેલી લાકડીઓનો ઉપયોગ કરવાનો આદેશ કોણે આપ્યો હતો. રાહુલ ગાંધીએ વધુમાં પ્રશ્ન કર્યો હતો કે આ કાર્યવાહીનો આદેશ કેન્દ્રીય ગૃહમંત્રી અમિત શાહે આપ્યો હતો કે અન્ય કોઈ અધિકારીએ. જો આવો આદેશ ગૃહમંત્રી તરફથી આપવામાં આવ્યો હોય તો હુમલાની જવાબદારી પણ નક્કી થવી જોઈએ તેવી માંગ તેમણે કરી હતી.
સુપ્રીમ કોર્ટની પાંચ સભ્યોની કમિટી, 5 સપ્ટેમ્બરે વિરોધ માર્ચ
જંતર-મંતર સહિત દેશના અન્ય વિસ્તારોમાં થયેલી હિંસા તેમજ પોલીસ અને સુરક્ષા દળોની કાર્યવાહી અંગે તપાસ માટે સુપ્રીમ કોર્ટે પાંચ સભ્યોની હાઈ પાવર એક્સપર્ટ કમિટી રચી છે. પૂર્વ મુખ્ય ન્યાયાધીશ આર. સુભાષ રેડ્ડીને સમિતિના અધ્યક્ષ બનાવવામાં આવ્યા છે. બીજી તરફ, કોકરોચ જનતા પાર્ટી (CJP)એ 5 સપ્ટેમ્બરે દિલ્હીમાં શાંતિપૂર્ણ વિરોધ માર્ચ યોજવાની જાહેરાત કરી છે. પક્ષનો આરોપ છે કે કેન્દ્ર સરકારે 25 જુલાઈએ યુવાનોને આપેલા વચનો હજુ સુધી પૂરા કર્યા નથી અને અમલમાં વિલંબ માટે ટેકનિકલ કારણો આગળ ધરવામાં આવી રહ્યા છે.
