Air strikes on Russia: યુક્રેનના રાષ્ટ્રપતિ વોલોદિમિર ઝેલેન્સકીએ રશિયા સાથે અસ્થાયી યુદ્ધવિરામનો પ્રસ્તાવ મૂક્યો છે. અમેરિકી રાષ્ટ્રપતિ ડોનાલ્ડ ટ્રમ્પના વિશેષ દૂતો સ્ટીવ વિટકોફ અને જારેડ કુશનરની મોસ્કો અને કીવ મુલાકાત દરમિયાન શાંતિપૂર્ણ વાતાવરણ જળવાઈ રહે તે હેતુથી યુક્રેન તરફથી આ પહેલ કરવામાં આવી છે. ઝેલેન્સકીએ કહ્યું કે અમેરિકી દૂતોની સુરક્ષાને ધ્યાનમાં રાખીને આ સમયગાળા દરમિયાન યુક્રેન તરફથી રશિયા પર કોઈ હવાઈ હુમલો કરવામાં આવશે નહીં અને રશિયાએ પણ સમાન વલણ અપનાવવું જોઈએ.
સંભવિત શાંતિ કરાર અંગે ચર્ચા થવાની છે
ઝેલેન્સકીના જણાવ્યા અનુસાર, વિટકોફ અને કુશનર શનિવારે મોસ્કો અને ત્યારબાદ રવિવારે કીવની મુલાકાત લેશે. આ મુલાકાત દરમિયાન રશિયા-યુક્રેન યુદ્ધના કાયમી અંત માટે સંભવિત શાંતિ કરાર અંગે ચર્ચા થવાની છે. યુક્રેનના રાજદ્વારીઓએ પણ અમેરિકી દૂતોની કીવ મુલાકાતની તૈયારીઓ માટે બેઠક યોજી હતી. ઝેલેન્સકીએ સ્પષ્ટ કર્યું કે દૂતોની સુરક્ષા અને મંત્રણાની પ્રક્રિયા સરળતાથી આગળ વધે તે માટે રશિયાએ પણ સંપૂર્ણ શાંતિ જાળવવી જરૂરી છે.
અમેરિકી દૂતો કયા પ્રકારના શાંતિ પ્રસ્તાવો લઈને આવે
આ દરમિયાન ઝેલેન્સકીએ કહ્યું કે યુક્રેન આ યુદ્ધનો વાસ્તવિક અને કાયમી ઉકેલ ઈચ્છે છે, જે સાડા ચાર વર્ષથી ચાલી રહ્યું છે. તેમણે જણાવ્યું કે હવે જોવાનું રહેશે કે અમેરિકી દૂતો કયા પ્રકારના શાંતિ પ્રસ્તાવો લઈને આવે છે અને મોસ્કો તરફથી તેના પર શું પ્રતિસાદ મળે છે. યુક્રેન તરફથી યુદ્ધવિરામની જાહેરાત એવા સમયે થઈ છે જ્યારે રશિયા દ્વારા યુક્રેનની ગુપ્તચર સેવાના મુખ્ય મથક પર દિવસ દરમિયાન જોરદાર હવાઈ હુમલો કરવામાં આવ્યો હોવાનો દાવો કરવામાં આવ્યો છે.
યુદ્ધવિરામની પહેલને મહત્વપૂર્ણ રાજદ્વારી પગલા તરીકે જોવામાં આવી
તાજેતરના દિવસોમાં કીવ સહિત યુક્રેનના અન્ય શહેરો પર રશિયન હવાઈ હુમલાઓમાં વધારો થયો છે. આવી સ્થિતિ વચ્ચે યુક્રેનની અસ્થાયી યુદ્ધવિરામની પહેલને મહત્વપૂર્ણ રાજદ્વારી પગલા તરીકે જોવામાં આવી રહી છે. હવે સમગ્ર નજર અમેરિકી દૂતોની મોસ્કો અને કીવ મુલાકાત તથા રશિયા તરફથી આ પ્રસ્તાવ પર મળનારા જવાબ પર રહેશે.
