Sharjah Murder Case: કર્ણાટકના ઉડુપી જિલ્લાના એક ભારતીય યુવકની યુએઈના શારજાહમાં હત્યાની ચોંકાવનારી ઘટના સામે આવી છે. જુલાઈમાં બનેલી આ ઘટનામાં મૃતક એલ્વિન પ્રકાશ કુંડરનો મૃતદેહ ઓમાન તરફ જતા રસ્તા પર પાર્ક કરેલી એક કારમાંથી મળી આવ્યો હતો. પરિવારના જણાવ્યા મુજબ, મૃતદેહના 9 ટુકડા કરી તેને બે અલગ-અલગ બેગમાં રાખવામાં આવ્યો હતો. જોકે, આ ઘટનાની વિગતો પરિવાર દ્વારા ગુમ થયાની ફરિયાદ નોંધાવ્યા બાદ સામે આવી હતી.
ઓમાન તરફ જતા રસ્તે કારમાંથી મળ્યો મૃતદેહ
પ્રકાશ કુંડર છેલ્લા 14 વર્ષથી શારજાહ એરપોર્ટ પર નોકરી કરતા હતા અને પત્ની તથા પુત્ર સાથે યુએઈમાં રહેતા હતા. જુલાઈમાં તેમની હત્યા બાદ તેમનો મૃતદેહ ઓમાન તરફ જતા રસ્તા પર એક કારમાંથી મળી આવ્યો હતો. મૃતકના ભાઈ અનિલ પ્રશાંતના જણાવ્યા મુજબ, પ્રકાશના શરીરને 9 ટુકડામાં કાપીને બે બેગમાં પેક કરવામાં આવ્યું હતું.
પત્ની અને ધોરણ 10માં ભણતો પુત્ર પણ ગુમ
પ્રકાશની હત્યા બાદ તેમની પત્ની ટીના કુંડર અને ધોરણ 10માં અભ્યાસ કરતો તેમનો કિશોર પુત્ર પણ ગુમ છે. અહેવાલો મુજબ બંને શારજાહ છોડીને ભારત પરત ફર્યા હોવાની શક્યતા વ્યક્ત કરવામાં આવી રહી છે, પરંતુ તેમના હાલના ઠેકાણા અંગે સત્તાવાર પુષ્ટિ થઈ નથી. આ ઉપરાંત, હત્યામાં પત્ની કે પુત્રની કોઈ સંડોવણી હોવાના દાવાની પણ હાલ સત્તાવાર પુષ્ટિ થઈ નથી. ટીના મૂળ ઉડુપીની છે અને યુએઈમાં શિક્ષિકા તરીકે કામ કરતી હતી.
એક મેસેજથી પરિવારને થઈ શંકા
પ્રકાશના ભાઈ અનિલે જુલાઈ દરમિયાન તેમનો સંપર્ક કરવાનો પ્રયાસ કર્યો હતો. ત્યારે પ્રકાશે ફોન પર વાત કરવાને બદલે માત્ર ટેક્સ્ટ મેસેજ કરીને તે મજામાં હોવાની જાણ કરી હતી. પ્રકાશ સામાન્ય રીતે પરિવાર સાથે વોઈસ મેસેજથી વાત કરતા હોવાથી આ મેસેજથી પરિવારને શંકા ગઈ હતી. ત્યારબાદ અઠવાડિયા સુધી પ્રકાશનો સંપર્ક ન થતાં અનિલે શારજાહમાં રહેતા પ્રકાશના સહાધ્યાયી મનોહરનો સંપર્ક કર્યો હતો. કંપની દ્વારા આપવામાં આવેલા ફ્લેટ પર તપાસ કરતાં ચોકીદારે પ્રકાશ ભારત ગયા હોવાનું જણાવ્યું હતું. જોકે, અનિલે સત્તાવાર તપાસની માંગ કરી અને પાસપોર્ટની તપાસ કરાવવામાં આવી ત્યારે પ્રકાશ શારજાહમાં જ હોવાનું સામે આવ્યું હતું. ત્યારબાદ ગુમ થયાની ફરિયાદ નોંધાવવામાં આવી હતી.
હત્યાનું કારણ હજુ રહસ્ય
શોધખોળ દરમિયાન ઓમાન તરફ જતા રસ્તે પાર્ક કરેલી કારમાંથી પ્રકાશનો મૃતદેહ મળી આવ્યો હતો. પરિવારના જણાવ્યા મુજબ, મૃતદેહને 9 ટુકડામાં વહેંચીને બેગમાં રાખવામાં આવ્યો હતો. શારજાહના અધિકારીઓએ હજુ સુધી હત્યાના ચોક્કસ કારણ અથવા કોઈ શંકાસ્પદ વ્યક્તિની સત્તાવાર ઓળખ જાહેર કરી નથી. પત્ની ટીના કુંડરની સંડોવણી અંગે પણ હાલ માત્ર અટકળો છે અને તેની કોઈ સત્તાવાર પુષ્ટિ થઈ નથી. સમગ્ર મામલે તપાસ ચાલુ છે.
પરિવારની મદદની અપીલ
પ્રકાશના ભાઈ અનિલે ઉડુપીના પોલીસ અધિક્ષકને મળીને કેસમાં મદદ માટે રજૂઆત કરી છે. પરિવાર હવે યુએઈમાં ચાલી રહેલી કાનૂની પ્રક્રિયા પૂર્ણ થવાની રાહ જોઈ રહ્યો છે, જેથી પ્રકાશનો પાર્થિવ દેહ ભારત લાવી શકાય. ઉડુપી પોલીસ પણ શારજાહ સત્તાવાળાઓ તરફથી સત્તાવાર માહિતી અને સંદેશાવ્યવહારની રાહ જોઈ રહી છે.
