Donald Trump New Mexico Name Change News: અમેરિકાના રાજકારણમાં પોતાના અનોખા અને ચર્ચાસ્પદ નિવેદનો માટે જાણીતા નેતા ડોનાલ્ડ ટ્રમ્પે તાજેતરમાં એક નવો વિવાદ ઊભો કર્યો છે. ટ્રમ્પે સોશિયલ મીડિયા પ્લેટફોર્મ ટ્રુથ સોશિયલ (Truth Social) પર પોસ્ટ કરીને દાવો કર્યો હતો કે અમેરિકાના જાણીતા રાજ્ય 'ન્યૂ મેક્સિકો' (New Mexico)નું નામ તાત્કાલિક અસરથી બદલીને 'ન્યૂ અમેરિકા' (New America) કરી દેવું જોઈએ. ટ્રમ્પના આ નિવેદન બાદ અમેરિકાના રાજકીય વર્તુળોમાં ભારે ચર્ચા જાગી છે અને સોશિયલ મીડિયા પર લોકો તેમના આ સૂચનની ટીકા અને મજાક ઉડાવી રહ્યા છે.
'આ રાજ્ય મેક્સિકો નથી પણ અમેરિકા છે' – ટ્રમ્પની દલીલ
પોતાની સોશિયલ મીડિયા પોસ્ટમાં ટ્રમ્પે આ સૂચન પાછળની તર્કસંગત દલીલો રજૂ કરવાનો પ્રયાસ કર્યો હતો. તેમણે લખ્યું હતું કે ન્યૂ મેક્સિકો રાજ્ય એ કોઈ મેક્સિકો દેશનો ભાગ નથી પરંતુ તે યુનાઇટેડ સ્ટેટ્સ ઓફ અમેરિકાનું અભિન્ન અંગ છે. તેમના મતે, રાજ્યનું નામ બદલીને 'ન્યૂ અમેરિકા' રાખવાથી તેની પ્રતિષ્ઠા વધશે, રિયલ એસ્ટેટના ભાવ અને લોકોની આવકમાં વધારો થશે તેમજ સ્થાનિક નાગરિકોમાં રાષ્ટ્રધ્વજ અને દેશ પ્રત્યે ગૌરવની લાગણી વધુ પ્રબળ બનશે.
‘અમે ન્યૂ મેક્સિકન છીએ અને અમને અમારી ઓળખ પર ગર્વ છે’: ડેમોક્રેટિક સેનેટર
ટ્રમ્પના આ નિવેદન સામે ડેમોક્રેટિક પાર્ટીના નેતાઓએ કડક વિરોધ નોંધાવ્યો છે. ન્યૂ મેક્સિકોના સેનેટર બેન રે લુજાને (Ben Ray Luján) પલટવાર કરતાં જણાવ્યું હતું કે આ રાજ્યનું નામ અમેરિકાની સ્થાપના થઈ તેના સદીઓ પહેલાંનું છે અને તે સદીઓ જૂના ઇતિહાસ, સંસ્કૃતિ તથા સમૃદ્ધ વિરાસત સાથે જોડાયેલું છે. તેમણે સ્પષ્ટ કર્યું કે રાજ્યના લોકો પોતાની ઓળખ માટે ગૌરવ અનુભવે છે અને ડોનાલ્ડ ટ્રમ્પના કાર્યકાળ પછી પણ આ રાજ્યનું નામ 'ન્યૂ મેક્સિકો' જ રહેશે. આ ઉપરાંત અન્ય નેતાઓએ પણ મોંઘવારી, પેટ્રોલ-ડીઝલના વધતા ભાવ અને યુદ્ધ જેવા ગંભીર મુદ્દાઓ પરથી ધ્યાન હટાવવાનો પ્રયાસ ગણાવી ટ્રમ્પની ટીકા કરી હતી.
ભૂતકાળમાં પણ ભૂગોળના નામો બદલવાના સૂચનોથી ઘેરાયા હતા ટ્રમ્પ
આ પહેલીવાર નથી જ્યારે ટ્રમ્પે કોઈ ભૌગોલિક સ્થળ કે રાજ્યનું નામ બદલવાની વાત કરી હોય. આ પહેલાં પણ તેઓ 'ગલ્ફ ઓફ મેક્સિકો'નું નામ બદલીને 'ગલ્ફ ઓફ અમેરિકા' રાખવાના સૂચનને કારણે ચર્ચામાં રહ્યા હતા. આ ઉપરાંત, કૅનેડા સાથેના સરહદી સંબંધો વખતે તેમણે 'લેક ઓન્ટારિયો'નું નામ બદલીને 'લેક અમેરિકા' કરવાની વાત પણ કરી હતી. તેમના આવા વિચિત્ર સૂચનોને કારણે સોશિયલ મીડિયા પર લોકોએ તેમની મજાક ઉડાવતા કહ્યું કે, જો આમ જ ચાલતું રહ્યું તો ભવિષ્યમાં ટ્રમ્પ આખા અમેરિકાનું નામ બદલીને 'ન્યૂ ઇન્ડિયા' પણ રાખી દેશે!
શું ખરેખર ન્યૂ મેક્સિકોનું નામ બદલાઈ શકે? જાણો કાયદાકીય પ્રક્રિયા
અમેરિકી બંધારણ અને કાયદાકીય પ્રક્રિયા મુજબ માત્ર કોઈ નેતા કે પ્રમુખની સોશિયલ મીડિયા પોસ્ટથી કોઈ રાજ્યનું નામ બદલાઈ શકતું નથી. કોઈપણ રાજ્યનું નામ બદલવા માટે રાજ્યની પોતાની બંધારણીય અને ધારાસભીય મંજૂરી મેળવવી પડે છે તેમજ યુ.એસ. કોંગ્રેસ (સંસદ)ની પણ મંજૂરી જરૂરી હોય છે. ન્યૂ મેક્સિકોના બંધારણમાં જ રાજ્યનું નામ સુરક્ષિત કરવામાં આવ્યું છે. આથી, ટ્રમ્પનું આ નિવેદન માત્ર એક સોશિયલ મીડિયા ચર્ચા પૂરતું જ મર્યાદિત રહેવાની શક્યતા છે.
