Russia Ukraine peace talks: રશિયા અને યુક્રેન વચ્ચે ચાલી રહેલા સૈન્ય સંઘર્ષનો અંત લાવવા અમેરિકાએ ફરી રાજદ્વારી પ્રયાસો તેજ કર્યા છે. અમેરિકાના પ્રમુખ ડોનાલ્ડ ટ્રમ્પના ખાસ દૂત સ્ટીવ વિટકોફ અને જેરેડ કુશનર શનિવારે મોસ્કો પહોંચ્યા છે. બંને રશિયન અધિકારીઓ સાથે મહત્વપૂર્ણ ચર્ચા કરશે અને ત્યારબાદ રવિવારે યુક્રેનની રાજધાની કિવ પહોંચવાના છે. બંને દેશો વચ્ચે ચાલી રહેલા મડાગાંઠને દૂર કરીને યુદ્ધ સમાપ્ત કરવા માટે વ્યવહારુ સમાધાન શોધવાનો પ્રયાસ આ મુલાકાતનો મુખ્ય હેતુ છે.
વાટાઘાટકાર ગણાવીને સમજૂતીની શક્યતા વ્યક્ત કરી
ડોનાલ્ડ ટ્રમ્પે જણાવ્યું કે બંને દૂતો રશિયા અને યુક્રેન વચ્ચે શાંતિ સ્થાપવા માટે ચોક્કસ પ્રસ્તાવ લઈને ગયા છે. ટ્રમ્પે વિટકોફ અને કુશનરને ઉત્તમ વાટાઘાટકાર ગણાવીને સમજૂતીની શક્યતા વ્યક્ત કરી છે. જોકે, પ્રસ્તાવમાં યુક્રેન દ્વારા રશિયાને પોતાની જમીન સોંપવાનો મુદ્દો સામેલ છે કે નહીં, તે અંગે ટ્રમ્પે કોઈ સ્પષ્ટતા કરી નથી. આ દરમિયાન ઝેલેન્સકીએ રશિયાને અસ્થાયી યુદ્ધવિરામની દરખાસ્ત કરી છે અને દૂતોની મુલાકાત દરમિયાન હવાઈ હુમલા રોકવાની તૈયારી દર્શાવી છે.
રાષ્ટ્રપતિ વોલોદિમિર ઝેલેન્સકીએ દાવો કર્યો
એક તરફ શાંતિ માટે વાટાઘાટો ચાલી રહી છે, ત્યારે બીજી તરફ રશિયા દ્વારા હુમલા ચાલુ હોવાનો યુક્રેનનો આરોપ છે. રાષ્ટ્રપતિ વોલોદિમિર ઝેલેન્સકીએ દાવો કર્યો છે કે કિવના બે એરપોર્ટને રાતોરાત નિશાન બનાવવામાં આવ્યા હતા. ડ્નિપ્રો વિસ્તારમાં થયેલા હુમલામાં પાંચ લોકોના મોત થયા હોવાનું પણ જણાવાયું છે. આ ઉપરાંત, દૂતોની મોસ્કો રવાના થવાના એક દિવસ પહેલાં સેન્ટ્રલ કિવમાં યુક્રેનની SBU સિક્યોરિટી સર્વિસના હેડક્વાર્ટર પર ડ્રોન હુમલો થયો હતો.
મોસ્કોની ગુપ્ત મુલાકાત લીધી હોવાનું અમેરિકન મીડિયા અહેવાલો
અમેરિકાના આ નવા રાજદ્વારી પ્રયાસ પહેલાં CIA ડિરેક્ટર જોન રેટક્લિફે પણ મોસ્કોની ગુપ્ત મુલાકાત લીધી હોવાનું અમેરિકન મીડિયા અહેવાલોમાં જણાવાયું છે. વિટકોફ અને કુશનર અગાઉ ગાઝા તથા ઈરાનમાં યુદ્ધવિરામની વાટાઘાટોમાં પણ સામેલ રહી ચૂક્યા છે. હવે બંનેની મોસ્કો અને કિવ મુલાકાતથી લાંબા સમયથી ચાલી રહેલા રશિયા-યુક્રેન યુદ્ધમાં શાંતિનો કોઈ રસ્તો ખુલે છે કે નહીં, તેના પર સમગ્ર વિશ્વની નજર છે.
