August 15th india: ભારતની આઝાદીને વૈશ્વિક સ્તરે વધુ એક મહત્વપૂર્ણ માન્યતા મળવાની દિશામાં અમેરિકાના ન્યૂયોર્ક રાજ્યમાંથી એક મોટી પહેલ સામે આવી છે. ન્યૂયોર્ક સ્ટેટ સેનેટે એક વિશેષ પ્રસ્તાવ પસાર કરીને રાજ્યપાલ કેથી હોચુલને 15 ઓગસ્ટ 2026ને સત્તાવાર રીતે “ઈન્ડિયા ઈન્ડિપેન્ડન્સ ડે” તરીકે જાહેર કરવાની અપીલ કરી છે. આ પહેલને ભારત અને અમેરિકા વચ્ચે મજબૂત બની રહેલા સંબંધો તેમજ અમેરિકામાં વસતા ભારતીય મૂળના સમુદાયની વધતી ઓળખ અને પ્રભાવના પ્રતીક તરીકે જોવામાં આવી રહી છે. પ્રસ્તાવ પર થયેલી ચર્ચા દરમિયાન ન્યૂયોર્કના સાંસદોએ ભારતની હજારો વર્ષ જૂની સંસ્કૃતિ, મજબૂત લોકતાંત્રિક પરંપરા અને વૈશ્વિક સ્તરે આપેલા યોગદાનની પ્રશંસા કરી હતી. સાથે જ અમેરિકામાં ભારતીય મૂળના નાગરિકોએ શિક્ષણ, વિજ્ઞાન, ટેક્નોલોજી, વ્યવસાય અને જાહેર જીવનમાં નોંધાવેલી સિદ્ધિઓને પણ વિશેષ રીતે બિરદાવવામાં આવી હતી. આ પ્રસ્તાવ રજૂ કરનાર જેરેમી એ. કુનીએ જણાવ્યું હતું કે ભારતીય સમુદાય વિશ્વભરના સમાજોમાં સકારાત્મક અને ઊંડો પ્રભાવ છોડી રહ્યો છે. તેમણે કહ્યું કે આ પહેલ ભારતના ગૌરવશાળી ઇતિહાસ, સમૃદ્ધ સંસ્કૃતિ અને લોકશાહી મૂલ્યોને સન્માન આપવાનો એક મહત્વપૂર્ણ પ્રયાસ છે.
અમેરિકાના વિકાસમાં મહત્વપૂર્ણ યોગદાન આપ્યું
ચર્ચા દરમિયાન જોસેફ પી. અદાબો જુનિયર. મહાત્મા ગાંધીના વિચારોનો ઉલ્લેખ કરતાં જણાવ્યું કે ગાંધીજીનો અહિંસા અને સત્યનો સંદેશ આજે પણ સમગ્ર વિશ્વમાં પ્રેરણાનું સ્ત્રોત છે. તેમણે ગાંધીજીના પ્રસિદ્ધ વિચારને યાદ કરતાં કહ્યું કે, “ભવિષ્ય એ વાત પર નિર્ભર કરે છે કે આપણે વર્તમાનમાં શું કરીએ છીએ.” તે જ સમયે જોન સી. લિયુએ ભારતને વિશ્વની સૌથી પ્રાચીન અને પ્રેરણાદાયી સભ્યતાઓમાંની એક ગણાવતાં જણાવ્યું કે ભારતની લોકતાંત્રિક પરંપરા સમગ્ર વિશ્વ માટે ઉદાહરણરૂપ છે. તેમણે ભારપૂર્વક કહ્યું કે ભારતીય-અમેરિકનોએ ન્યૂયોર્ક અને સમગ્ર અમેરિકાના વિકાસમાં મહત્વપૂર્ણ યોગદાન આપ્યું છે. અન્ય સાંસદોએ પણ ભારતીય સમુદાયની વધતી ભાગીદારી અને યોગદાનની પ્રશંસા કરી હતી. તેમના જણાવ્યા અનુસાર ભારતીય-અમેરિકનો આજે સ્થાનિક સમુદાયો, વેપાર-ઉદ્યોગ, શિક્ષણ ક્ષેત્ર, સામાજિક સેવા અને નાગરિક નેતૃત્વમાં મહત્વપૂર્ણ સ્થાન ધરાવે છે. અમેરિકાના વિકાસમાં તેમનું યોગદાન સતત વધતું રહ્યું છે.
ભારતીય-અમેરિકન સમુદાયના યોગદાન
આ અવસર પર ન્યૂયોર્ક સ્થિત ભારતના કોન્સ્યુલેટ જનરલ, ન્યુ યોર્કના ડેપ્યુટી કોન્સ્યુલ જનરલ વિશાલ હર્ષ તેમજ ભારતીય સમુદાયના પ્રતિનિધિઓનું પણ સેનેટમાં સ્વાગત કરવામાં આવ્યું હતું. ભારતીય વાણિજ્ય દૂતાવાસે આ પ્રસ્તાવને આવકારતા ન્યૂયોર્ક સેનેટનો આભાર વ્યક્ત કર્યો હતો. દૂતાવાસે જણાવ્યું કે આ પહેલ ભારતના લોકતાંત્રિક મૂલ્યો, સાંસ્કૃતિક વારસા અને ભારતીય-અમેરિકન સમુદાયના યોગદાનને મળેલી એક મહત્વપૂર્ણ આંતરરાષ્ટ્રીય માન્યતા છે. જો રાજ્યપાલ આ પ્રસ્તાવને મંજૂરી આપે તો 15 ઓગસ્ટ 2026નો દિવસ ન્યૂયોર્ક રાજ્યમાં સત્તાવાર રીતે “ઈન્ડિયા ઈન્ડિપેન્ડન્સ ડે” તરીકે ઉજવાશે, જે વિશ્વભરના ભારતીયો માટે ગૌરવની ઐતિહાસિક ક્ષણ સાબિત થઈ શકે છે.
