The government bowed down: ઈન્ડિયા ગેટથી શરૂ થનારા વિરોધ પ્રદર્શન માર્ચ પહેલા જ કેન્દ્ર સરકાર કોકરોચ જનતા પાર્ટી (CJP)ની એક મોટી માંગ પૂરી કરવા તરફ આગળ વધી રહી હોય તેવું લાગી રહ્યું છે. NEET પેપર લીક વિરુદ્ધ થયેલા આંદોલન દરમિયાન નોંધાયેલા કેસો રદ કરાવવા માટે કેન્દ્ર સરકારે સુપ્રીમ કોર્ટમાં અરજી કરી છે. સરકારના આ પગલાથી CJPના નેતાઓ પણ આશ્ચર્યમાં છે અને તેમણે કોઈ નિવેદન આપ્યા વગર ખાસ અંદાજમાં પોતાની પ્રતિક્રિયા આપી છે.
સુપ્રીમ કોર્ટમાં કેન્દ્ર સરકારની અરજી
અહેવાલ મુજબ, કેન્દ્ર સરકારે NEET વિરોધ પ્રદર્શન અને 20 જુલાઈના રોજ યોજાયેલા 'સંસદ ચલો' માર્ચ દરમિયાન નોંધાયેલી FIR રદ કરાવવા માટે સુપ્રીમ કોર્ટનો દરવાજો ખખડાવ્યો છે. કેન્દ્ર સરકાર દ્વારા બંધારણની કલમ 142નો ઉપયોગ કરીને આ કેસો રદ કરવાની માંગ કરવામાં આવી છે. સોલિસિટર જનરલે આ મામલાની તાત્કાલિક સુનાવણી માટે કેસને લિસ્ટ કરવાની માંગ કરી હતી. ત્યારબાદ ચીફ જસ્ટિસ ઓફ ઈન્ડિયા સૂર્યકાંતે મંગળવારે આ મામલાને લિસ્ટ કરવા જણાવ્યું હોવાનું અહેવાલમાં જણાવાયું છે. કેન્દ્ર સરકારનું આ પગલું એવા સમયે આવ્યું છે જ્યારે CJP દ્વારા 5 સપ્ટેમ્બરના રોજ દિલ્હીમાં મોટા વિરોધ પ્રદર્શનની જાહેરાત કરવામાં આવી છે.
ઈન્ડિયા ગેટથી પોલીસ હેડક્વાર્ટર સુધી માર્ચ
CJPએ 5 સપ્ટેમ્બરના રોજ ઈન્ડિયા ગેટથી દિલ્હી પોલીસ હેડક્વાર્ટર સુધી વિરોધ માર્ચ કાઢવાની જાહેરાત કરી છે. પાર્ટીના રાષ્ટ્રીય સંયોજક અભિજીત દીપકેએ સંકેત આપ્યો છે કે માંગણીઓ પૂરી ન થાય ત્યાં સુધી વિરોધ પ્રદર્શન ચાલુ રાખવામાં આવી શકે છે. હવે કેન્દ્ર સરકાર દ્વારા કેસો રદ કરવા માટે સુપ્રીમ કોર્ટમાં અરજી કરવામાં આવતા આ માર્ચ પહેલાં જ CJPની એક મહત્વની માંગ પર કાર્યવાહી શરૂ થઈ છે.
CJP નેતાઓએ તસવીરો દ્વારા આપી પ્રતિક્રિયા
કેન્દ્ર સરકારની અરજીના સમાચાર સામે આવ્યા બાદ CJPના નેતાઓએ અનોખી રીતે પોતાની પ્રતિક્રિયા આપી છે. CJPના રાષ્ટ્રીય સંયોજક અભિજીત દીપકેએ બી. આર. આંબેડકરની તસવીર ધરાવતું પુસ્તક પોતાના ચહેરા સામે રાખીને તસવીર શેર કરી હતી. તેમણે કોઈ શબ્દો લખ્યા વગર આ તસવીર દ્વારા પોતાની પ્રતિક્રિયા આપી હતી અને આ ઘટનાને બાબા સાહેબ આંબેડકરની જીત સાથે જોડવાનો પ્રયાસ કર્યો હતો. બીજી તરફ CJPના સહ-સંયોજક સૌરભ દાસે ચશ્માની ઉપરથી જોતા આશ્ચર્ય વ્યક્ત કરતો હોય તેવી તસવીર શેર કરી હતી. જ્યારે આશુતોષ રાંકાએ પણ તસવીર દ્વારા પ્રતિક્રિયા આપી હતી. રત્ના સિંહે હળવા સ્મિત સાથેની તસવીર શેર કરીને પોતાનો પ્રતિભાવ આપ્યો હતો.
CJPની બે મુખ્ય માંગણીઓ શું છે?
CJPએ પોતાના આંદોલન દરમિયાન સરકાર સમક્ષ બે મુખ્ય માંગણીઓ મૂકી હતી.
- પહેલી માંગ હતી કે NEET પેપર લીક વિરુદ્ધ થયેલા વિરોધ પ્રદર્શન દરમિયાન નોંધાયેલા તમામ કેસ અને FIR રદ કરવામાં આવે.
- બીજી માંગ હતી કે પેપર લીક અને તેની સાથે જોડાયેલી ઘટનાઓના કારણે જીવ ગુમાવનારા વિદ્યાર્થીઓના પરિવારોને 1-1 કરોડ રૂપિયાનું વળતર આપવામાં આવે.
કેન્દ્રીય શિક્ષણ મંત્રીના રાજીનામા બાદ CJPએ પોતાનું આંદોલન સમેટ્યું હતું. હવે કેન્દ્ર સરકાર દ્વારા વિરોધ દરમિયાન નોંધાયેલા કેસો રદ કરવા માટે સુપ્રીમ કોર્ટમાં અરજી કરવામાં આવતા CJPની આ માંગ પર આગળ શું નિર્ણય આવે છે તેના પર સૌની નજર રહેશે.
