Thailand Cambodia border air strike 2025: થાઈલેન્ડ - કંબોડિયા વચ્ચેની સરહદ ફરી એકવાર તણાવથી સળગી ઉઠી છે. આજે વહેલી સવારે થાઈલેન્ડની રોયલ એરફોર્સે બોર્ડર પર F-16 લડાકુ વિમાનો સાથે એરસ્ટ્રાઈક કરી છે. શનિવાર–રવિવારથી બંને દેશો વચ્ચે અથડામણની સરખામણીય ખબર આવી રહી હતી. આ હુમલામાં અત્યાર સુધી એક થાઈ સૈનિકનું મોત થયું છે અને ચાર ઘાયલ થયા છે.
સીઝફાયર સમજૂતીનો ભંગ
થાઈલેન્ડ અને કંબોડિયા વચ્ચે ફરી યુદ્ધ જેવી સ્થિતિ સર્જાઈ ગઈ છે. અમેરિકન રાષ્ટ્રપતિ ડોનાલ્ડ ટ્રમ્પની મધ્યસ્થતા હેઠળ થયેલા સીઝફાયર છતાં થાઈલેન્ડે ફરી કંબોડિયાની સરહદ પર એરસ્ટ્રાઈક કરી છે. થાઈ સેનાના પ્રવક્તા મેજર જનરલ વિન્થાઈ સુવારીએ સોમવારે કહ્યું કે, થાઈલેન્ડે કંબોડિયા સાથેની વિવાદિત સરહદ પર હવાઈ હુમલા કર્યા છે. તેના પહેલાં બંને દેશોએ એકબીજા પર સીઝફાયર સમજૂતીનો ભંગ કરવાનો આરોપ લગાવ્યો હતો.
બોર્ડર પર F-16 વિમાનો તૈનાત
થાઈ સેનાએ કંબોડિયા બોર્ડર પર F-16 વિમાનો તૈનાત કર્યા છે અને કંબોડિયાની સરહદ પર હુમલો કરી રહી છે. થાઈ સેનાએ એક નિવેદનમાં જણાવ્યું કે, ઉબોન રત્ચાથાનીની પ્રાંતના પૂર્વ વિસ્તારમાં બે સ્થળોએ થયેલી નવી અથડામણોમાં ઓછામાં ઓછા એક થાઈ સૈનિકનું મોત થયું છે અને ચાર ઘાયલ થયા છે. આ સરહદી વિવાદ જુલાઈમાં પાંચ દિવસના યુદ્ધમાં બદલાયો હતો, જેના પછી અમેરિકન રાષ્ટ્રપતિ ડોનાલ્ડ ટ્રમ્પ અને મલેશિયાના પ્રધાનમંત્રી અનવર ઇબ્રાહિમે સીઝફાયર કરાવ્યું હતું. ટ્રમ્પ ઓક્ટોબરમાં કુઆલાલંપુરમાં બંને દેશો વચ્ચે થયેલી મોટી સીઝફાયર સમજૂતીના સાક્ષી બન્યા હતા, પરંતુ આ સીઝફાયર બે મહિના પણ ચાલ્યું નહીં.
કંબોડિયા પર ઉશ્કેરણીજનક પગલા ભરવાનો આરોપ
થાઈલેન્ડે કંબોડિયા પર ઉશ્કેરણીજનક પગલા ભરવાનો આરોપ લગાવ્યો છે. થાઈલેન્ડના મુખ્ય અખબાર ધ નેશન અનુસાર, રોયલ થાઈ આર્મીના કમાંડરોને થાઈ–કંબોડિયા બોર્ડર પર અનેક વિસ્તારોમાં વધતા તણાવની જાણ મળી છે. થાઈ સેનાએ નિયમ મુજબ પ્રતિસાદ આપ્યો અને નાગરિકોને બહાર કાઢવા માટે ઝડપી પગલાં લીધાં. રવિવારે સતત ફાયરિંગ બાદ કંબોડિયાઈ સૈનિકોએ સી સાકેટ પ્રાંતના કંથરાલાક જિલ્લામાં આવેલા ફૂ ફા લેક–પ્લાન હિન પૈટ કોન વિસ્તારમાં હુમલો કર્યો.
આજે વહેલી સવારે ગોળીબારી, ફાયરિંગ અને એરસ્ટ્રાઈક શરૂ
થાઈ સેનાના પ્રવક્તા મેજર જનરલ વિન્થાઈએ કહ્યું કે, સોમવારે વહેલી સવારે ઉબોન રત્ચાથાની પ્રાંતના નામે યૂએન જિલ્લાના ચોંગ એન મા વિસ્તારમાં અથડામણો થઈ. કંબોડિયાઈ સૈનિકોએ સવારે લગભગ 5:05 વાગ્યે નાના હથિયારો અને આ ઈંડાયરેક્ટ ફાયર હથિયારો વડે ગોળીબાર શરૂ કર્યો અને ફાયરિંગ ચાલુ રહ્યું. રોયલ થાઈ એરફોર્સના પ્રવક્તા એર માર્શલ જેકરીટ થમ્માવિચાઈએ જણાવ્યું કે, "આ ઓપરેશન સુરાનારી ટાસ્ક ફોર્સ સાથે મળીને કરવામાં આવ્યું હતું. આ કમ્બોડિઝ સૈન્યની તે કાર્યવાહીનો જવાબ હતો જેના કારણે થાઈલેન્ડની રાષ્ટ્રીય સુરક્ષાને, સરહદી વિસ્તારમાં રહેતા લોકોને અને ત્યાં કામ કરતાં થાઈ કર્મચારીઓને સીધું જોખમ હતું.
થાઈ સેનાનો દાવો
થાઈ સેનાનો દાવો છે કે કંબોડિયાએ ભારે હથિયારો સરહદ પર પહોંચાડી દીધા હતા અને લડાકુ દળોને બોર્ડર પર મૂકી દીધા હતા. થાઈલેન્ડનું કહેવું છે કે, આ એવી પ્રવૃત્તિઓ હતી જેઓ સૈન્ય ઓપરેશન્સને વધારી શકે અને થાઈ બોર્ડર વિસ્તારમાં જોખમ ઉભું કરી શકે. આ તમામ પરિસ્થિતિને કારણે હવાઈ શક્તિનો ઉપયોગ જરૂરી બન્યો છે. જેથી કંબોડિયાની સૈન્ય ક્ષમતાને અટકાવી શકાય.
કંબોડિયાનો દાવો
કંબોડિયાના રાષ્ટ્રીય રક્ષા મંત્રાલયે સોમવારે આરોપ લગાવ્યો કે, થાઈ સૈનિકોએ પ્રેહ વિહિયાર પ્રાંતમાં સરહદ પર આવેલા કંબોડિયાઈ સૈનિકો પર 'ક્રૂર અને અમાનવીય' હુમલાઓની શ્રેણી શરૂ કરી. કંબોડિયાએ આ ઘટનાને છ અઠવાડિયા પહેલાં કરવામાં આવેલ શાંતિ સમજૂતીનો ગંભીર ભંગ ગણાવ્યો.
પ્રીહ વિહિયાર મંદિર પર હુમલો
કંબોડિયાઈ સેનાના પ્રવક્તા લેફ્ટિનન્ટ જનરલ માઇલી સોચિઅટાએ કહ્યું કે, હુમલો 8 ડિસેમ્બરના રોજ સવારે લગભગ 5:04 વાગ્યે આાન સેસ વિસ્તારમાં શરૂ થયો, જ્યાં કહેવાય છે કે થાઈ સૈનિકોએ કંબોડિયાઈ પોસ્ટો પર ગોળીબારી કર્યો. નિવેદન મુજબ થાઈ સેનાએ ત્યારબાદ ટમોન થોમ મંદિર, પ્રીહ વિહિયાર મંદિર નજીક 5 મકારા વિસ્તાર અને ચોમ્કા ચેક તરફ ટેંક શેલ ફાયર કર્યા, જેને કંબોડિયાએ કેટલાય દિવસોમાં થયેલી ઉશ્કેરણી બાદ કરાયેલા સંકલિત હુમલા તરીકે વર્ણવ્યું. મંત્રાલયે કહ્યું કે, આ હુમલો થાઈ સેનાના "ઘણા ઉશ્કેરણીજનક પગલાં" બાદ આવ્યો, જેમાં અગાઉના દિવસે પ્રોલિન થમાર વિસ્તારમાં થયેલી ઘટના પણ સામેલ છે, જેને ફ્નોમ પેન્હ ઉશ્કેરવાની કોશિશ તરીકે જોતું હતું. બે અલગ–અલગ હુમલા હોવા છતાં કંબોડિયાએ કહ્યું કે તેની સેનાએ અત્યંત સંયમ રાખ્યો, કોઈ જાતનું જવાબી ફાયરિંગ કર્યું નહીં, અને શાંતિપૂર્ણ ઉકેલ અને આંતરરાષ્ટ્રીય સમજૂતીઓનું પાલન કરવાનો પોતાનો નિશ્ચય ફરી વ્યક્ત કર્યો. કંબોડિયાઈ ક0 માન્ડરો સ્થિતિ પર પૂરી સતર્કતા અને અતિ સાવચેતી સાથે નજર રાખી રહ્યા છે.
ટ્રમ્પે 45 દિવસ પહેલાં કરાવ્યું હતું સીઝફાયર
અમેરિકાના રાષ્ટ્રપતિ ડોનાલ્ડ ટ્રમ્પે માત્ર 45 દિવસ પહેલાં જ થાઈલેન્ડ અને કંબોડિયા વચ્ચે ચાલતા સરહદી વિવાદમાં સીઝફાયર કરાવવામાં મહત્વપૂર્ણ ભૂમિકા ભજવી હતી. આ ઘટના 2025માં બની હતી. જુલાઈના અંતમાં બોર્ડર પર અથડામણો થયા બાદ ટ્રમ્પે 26 જુલાઈ 2025ના રોજ બંને દેશોના નેતાઓ સાથે વાત કરી અને વેપાર સંબંધિત દબાણ મુકવાની ચેતવણી આપીને તાત્કાલિક યુદ્ધવિરામ માટે રાજી કર્યા. ત્યારબાદ 28 જુલાઈ 2025થી યુદ્ધવિરામ અમલમાં આવ્યું. તેની અધિકૃત જાહેરાત અને વિસ્તૃત સમજૂતી 26 ઓક્ટોબર 2025ના રોજ મલેશિયાના કુઆલાલંપુરમાં ASEAN સમિટ દરમિયાન થઈ, જ્યાં ટ્રમ્પ પણ હાજર હતા.
