Religious conversion law India SC verdict: સુપ્રીમ કોર્ટે હાઈકોર્ટના નિર્ણયને યથાવત રાખતા જણાવ્યું છે કે, જો કોઈ વ્યક્તિ હિંદુ, બૌદ્ધ અથવા શીખ ધર્મ સિવાય કોઈ અન્ય ધર્મ અપનાવે છે અને તેનું પાલન કરે છે, તો તે અનુસૂચિત જાતિ સમુદાયનો સભ્ય રહી શકતો નથી.
સુપ્રીમ કોર્ટે આંધ્ર પ્રદેશ હાઈકોર્ટના આદેશને યથાવત રાખ્યો
સુપ્રીમ કોર્ટે આજે મંગળવારે આંધ્ર પ્રદેશ હાઈકોર્ટના તે આદેશને યથાવત રાખ્યો, જેમાં કહેવામાં આવ્યું હતું કે જો કોઈ વ્યક્તિ ખ્રિસ્તી ધર્મ અપનાવે છે અને સક્રિય રીતે તેનું પાલન કરે છે, તો તે અનુસૂચિત જાતિનો સભ્ય રહી શકતો નથી. સુપ્રીમ કોર્ટે કહ્યું કે હિંદુ, શીખ અથવા બૌદ્ધ સિવાય અન્ય કોઈ ધર્મનું પાલન કરનાર વ્યક્તિને અનુસૂચિત જાતિનો સભ્ય માનવામાં આવી શકતો નથી.
ધર્મપરિવર્તન પર અનુસૂચિત જાતિનો દરજ્જો તરત જ સમાપ્ત
સુપ્રીમ કોર્ટે કહ્યું કે Constitution (Scheduled Caste) Order, 1950માં આ બાબત સ્પષ્ટ રીતે જણાવવામાં આવી છે અને આ આદેશ હેઠળનો પ્રતિબંધ સંપૂર્ણ રીતે લાગુ પડે છે. 1950ના આદેશના કલમ 3 મુજબ, તેમાં દર્શાવેલા ધર્મો સિવાય અન્ય કોઈ ધર્મમાં પરિવર્તન કરવાથી, વ્યક્તિનો જન્મ ભલે અનુસૂચિત જાતિમાં થયો હોય, તેમ છતાં તેનો અનુસૂચિત જાતિનો દરજ્જો તરત જ સમાપ્ત થઈ જાય છે. કોર્ટે વધુમાં કહ્યું કે સંવિધાન અથવા સંસદ અથવા રાજ્યના કાયદા હેઠળ મળતા કોઈ પણ સુરક્ષા, અનામત, અધિકાર અથવા કાનૂની લાભનો દાવો તે વ્યક્તિ કરી શકશે નહીં અને તેને આપવામાં પણ નહીં આવે, જેને કલમ 3 મુજબ અનુસૂચિત જાતિનો સભ્ય માનવામાં આવતો નથી.
ખ્રિસ્તી બનેલા વ્યક્તિએ SC/ST એક્ટ હેઠળ કેસ દાખલ કર્યો હતો
સુપ્રીમ કોર્ટે કહ્યું કે, આ પ્રતિબંધ સંપૂર્ણ રીતે લાગુ પડે છે અને તેમાં કોઈ પણ પ્રકારનો અપવાદ નથી. કોઈ પણ વ્યક્તિ એક સાથે કલમ 3માં સમાવિષ્ટ ધર્મ સિવાયનો અન્ય ધર્મ સ્વીકારી અને તેનું પાલન કરી શકતો નથી અને સાથે સાથે અનુસૂચિત જાતિનો દરજ્જો પણ માંગી શકતો નથી. નોંધનીય છે કે આ આદેશ એક એવા વ્યક્તિના કેસમાં આપવામાં આવ્યો હતો, જેણે ખ્રિસ્તી ધર્મ અપનાવ્યો હતો અને પાદરી તરીકે કામ કરતો હતો. તેમ છતાં તેણે SC/ST એક્ટ હેઠળ તેમના વિરુદ્ધ કેસ નોંધાવ્યો હતો, જેમણે તેની પર હુમલો કર્યો હોવાનો આરોપ હતો.
આરોપીઓએ પાદરીના કેસને પડકાર્યો હતો
તે વ્યક્તિએ SC/ST એક્ટ હેઠળ સુરક્ષાનો દાવો કર્યો હતો, પરંતુ આરોપીઓએ તેને કાયદા વિરુદ્ધ ગણાવીને પડકાર્યો, કારણ કે પાદરીએ ધર્મ પરિવર્તન કરી લીધું હતું અને સક્રિય રીતે ખ્રિસ્તી ધર્મનું પાલન કરતો હતો.
