Supreme Court slams Election Commission: કર્ણાટકની શૃંગેરી વિધાનસભા બેઠકની 2023ની ચૂંટણીની મતગણતરીના વીડિયો રેકોર્ડિંગ ઉપલબ્ધ ન હોવાના મામલે સુપ્રીમ કોર્ટે ચૂંટણી પંચ પાસે જવાબ માગ્યો છે. જસ્ટિસ સંજય કુમાર અને જસ્ટિસ સંજીવ સચદેવાની પીઠે મહત્ત્વપૂર્ણ ચૂંટણી રેકોર્ડ રજૂ ન થઈ શકવા અંગે નારાજગી વ્યક્ત કરી હતી. કોર્ટે ચેતવણી આપી છે કે આગામી સુનાવણી સુધી ઉપલબ્ધ રેકોર્ડ રજૂ કરવામાં નહીં આવે તો ચૂંટણી પંચ સામે પ્રતિકૂળ કાનૂની કાર્યવાહી થઈ શકે છે.
‘નકામા બહાના સ્વીકારવામાં નહીં આવે’
સુનાવણી દરમિયાન ચૂંટણી પંચ તરફથી રજૂ થયેલા વકીલે જણાવ્યું હતું કે 2023ની મૂળ મતગણતરીનું વીડિયો રેકોર્ડિંગ મળી રહ્યું નથી અને તેને શોધવાના પ્રયાસો ચાલુ છે. આ જવાબ સામે સુપ્રીમ કોર્ટે સવાલ ઉઠાવ્યો હતો કે ચૂંટણી પ્રક્રિયા સાથે જોડાયેલા મહત્ત્વપૂર્ણ રેકોર્ડ ઉપલબ્ધ કેમ નથી. અદાલતે પંચને આગામી સુનાવણીમાં તેની પાસે ઉપલબ્ધ તમામ સંબંધિત વિગતો રજૂ કરવાનો નિર્દેશ આપ્યો છે. આ મામલાની આગામી સુનાવણી 15 ફેબ્રુઆરી, 2027ના રોજ નક્કી કરવામાં આવી છે.
માત્ર 201 મતની સરસાઈથી શરૂ થયો વિવાદ
આ સમગ્ર વિવાદ કર્ણાટકની શૃંગેરી વિધાનસભા બેઠકની 2023ની ચૂંટણી સાથે જોડાયેલો છે. આ બેઠક પર કોંગ્રેસના ઉમેદવાર ટી.ડી. રાજેગૌડા માત્ર 201 મતની સરસાઈથી વિજેતા જાહેર થયા હતા. પરિણામ સામે ભાજપના ઉમેદવાર ડી.એન. જીવરાજે કર્ણાટક હાઈકોર્ટમાં અરજી કરી હતી. અહેવાલમાં જણાવ્યા મુજબ, હાઈકોર્ટે એપ્રિલ 2026માં ટપાલ મતપત્રોની પુનઃગણતરીનો આદેશ આપ્યો હતો. ત્યારબાદ 3 મે, 2026ના રોજ જાહેર કરાયેલા સુધારેલા પરિણામમાં રાજેગૌડાના મત ઘટ્યા હતા અને જીવરાજને વિજેતા જાહેર કરવામાં આવ્યા હતા.
હાઈકોર્ટના નિર્ણય સામે સુપ્રીમ કોર્ટમાં પડકાર
હાઈકોર્ટના ચુકાદાને ટી.ડી. રાજેગૌડાએ સુપ્રીમ કોર્ટમાં પડકાર્યો હતો. તેમને વચગાળાની રાહત મળતાં તેઓ હાલ ધારાસભ્ય તરીકે યથાવત્ છે. રાજેગૌડાની દલીલ છે કે હાઈકોર્ટે માત્ર 279 રદ થયેલા ટપાલ મતપત્રોની ફરી તપાસ કરવાનો આદેશ આપ્યો હતો, પરંતુ ચૂંટણી અધિકારીએ પોતાના અધિકારક્ષેત્રની બહાર જઈને 562 માન્ય મતપત્રોનું પણ મૂલ્યાંકન કર્યું હતું.
ચૂંટણી ઓબ્ઝર્વરનો રિપોર્ટ અને વીડિયો રેકોર્ડિંગની માગ
રાજેગૌડાએ સમગ્ર મતગણતરી પ્રક્રિયાની નિષ્પક્ષતા ચકાસવા માટે ચૂંટણી ઓબ્ઝર્વરનો રિપોર્ટ તેમજ 2023ની મૂળ મતગણતરી અને પુનઃગણતરીનાં વીડિયો રેકોર્ડિંગ રજૂ કરવાની માગ કરી છે. જોકે, આ રેકોર્ડિંગ ઉપલબ્ધ ન હોવાની વાત સામે આવતાં મામલો વધુ ગંભીર બન્યો છે. હવે આગામી સુનાવણીમાં ચૂંટણી પંચ કયા દસ્તાવેજો રજૂ કરે છે અને સુપ્રીમ કોર્ટ આ મામલે શું વલણ અપનાવે છે તેના પર સૌની નજર રહેશે.
