Spain train crash collision: સ્પેનમાં બે હાઇસ્પીડ ટ્રેનો વચ્ચે થયેલા ભયાનક અકસ્માતમાં ઓછામાં ઓછા 10 લોકોનાં મોત થયાં છે, જ્યારે અનેક મુસાફરો ઘાયલ થયા હોવાના અહેવાલ છે. મધ્ય સ્પેનના ટોલેડો પ્રાંતમાં બુધવારે સવારે આ અકસ્માત સર્જાયો હતો. ઘટનાને પગલે મેડ્રિડ, સિઉદાદ રીઅલ અને એન્ડાલુસિયા વચ્ચેની રેલવે સેવા સ્થગિત કરવામાં આવી છે. અકસ્માત બાદ બચાવ અને રાહત કામગીરી હાથ ધરવામાં આવી હતી.
એક જ દિશામાં જતી બે ટ્રેનો અથડાઈ
સ્પેનિશ જાહેર પ્રસારણકર્તા TVEના અહેવાલ અનુસાર, એક જ દિશામાં જઈ રહેલી બે હાઇસ્પીડ ટ્રેનો વચ્ચે આ અકસ્માત થયો હતો. એક ટ્રેન બીજી ટ્રેનના પાછળના ભાગ સાથે અથડાતાં તેના બે ડબ્બા પાટા પરથી ઉતરી ગયા હતા. અકસ્માતની ગંભીરતાને ધ્યાનમાં રાખીને સંબંધિત વિસ્તારોમાં રેલવે વ્યવહાર અટકાવવામાં આવ્યો હતો. સ્પેનના રેલવે ઇન્ફ્રાસ્ટ્રક્ચર ઓપરેટર ADIFએ પણ અકસ્માતની જાણકારી આપી હતી. જોકે, અકસ્માત કયા કારણોસર થયો તેની સંપૂર્ણ વિગતો હજુ સ્પષ્ટ થઈ નથી.
ઘાયલો માટે ટાઉન હોલમાં વ્યવસ્થા
નજીકના ઉર્ડા શહેરના મેયર મેન્યુઅલ ગાલાનના જણાવ્યા અનુસાર, અકસ્માતમાં અનેક મુસાફરો ઘાયલ થયા છે. ઘાયલોને મદદ પૂરી પાડવા માટે નાગરિક સુરક્ષા અધિકારીઓને સ્થાનિક ટાઉન હોલમાં આવેલા રમતગમતના મંડપને તૈયાર રાખવા જણાવાયું હતું, જેથી જરૂર પડ્યે ત્યાં સારવાર અને અન્ય જરૂરી સુવિધાઓ પૂરી પાડી શકાય.
સ્થાનિક વહીવટીતંત્ર ઘટનાસ્થળે પહોંચ્યું
નજીકના લોસ યેબેનેસ ગામના મેયર જીસસ પેરેઝે TVE સાથેની વાતચીતમાં અકસ્માતને અત્યંત ગંભીર ગણાવ્યો હતો. બીજી તરફ, કેસ્ટિલા-લા માન્ચા પ્રદેશના પ્રમુખ એમિલિયાનો ગાર્સિયા-પેજેએ સોશિયલ મીડિયા પર જણાવ્યું હતું કે તેઓ અકસ્માતસ્થળની મુલાકાત લઈ રહ્યા છે.
રેલવે સેવા ખોરવાઈ, તપાસની રાહ
અકસ્મિક અથડામણને કારણે મેડ્રિડ, સિઉદાદ રીઅલ અને એન્ડાલુસિયા વચ્ચેની ટ્રેનોની અવરજવર પર અસર પડી છે. અકસ્માતનું ચોક્કસ કારણ, તમામ ઘાયલોની સ્થિતિ અને નુકસાનની સંપૂર્ણ વિગતો અંગે વધુ સત્તાવાર માહિતીની રાહ જોવાઈ રહી છે.
