Karnataka Voter List 2026: કર્ણાટકમાં ચૂંટણી પંચ દ્વારા સ્પેશિયલ ઈન્ટેન્સિવ રિવિઝન (SIR) ની કામગીરી સફળતાપૂર્વક પૂર્ણ કરી દેવામાં આવી છે અને રાજ્યની આખરી મતદાર યાદી સત્તાવાર રીતે જાહેર કરવામાં આવી છે. આ સમગ્ર પ્રક્રિયા દરમિયાન હાથ ધરવામાં આવેલા ગહન વેરિફિકેશન અને એન્યુમરેશન બાદ કુલ 4.46 કરોડ પાત્ર મતદારોને આ આખરી લિસ્ટમાં સ્થાન મળ્યું છે. જોકે, આ રિવિઝન દરમિયાન 1.08 કરોડ જેટલા મતદારોના નામ ફાઇનલ લિસ્ટમાંથી કમી કરવામાં આવ્યા છે, જે રાજ્યના કુલ નોંધાયેલા મતદારોના લગભગ 19.48 ટકા જેટલા થાય છે. પંચના જણાવ્યા મુજબ યોગ્ય દસ્તાવેજો અથવા એન્યુમરેશન ફોર્મ ન મળવાને કારણે અને કડક તપાસ બાદ આ કાર્યવાહી કરવામાં આવી છે.
ASDD કેટેગરી હેઠળ 4 અલગ-અલગ વિભાગોમાં કરાઈ મતદારોની સઘન ચકાસણી
ચૂંટણી પ્રક્રિયાને સંપૂર્ણ રીતે સુચારો, સચોટ અને પારદર્શક બનાવવા માટે પંચે ખાસ ASDD મોડેલ હેઠળ તપાસ હાથ ધરી હતી. આ મોડેલ અંતર્ગત ગેરહાજર (Absent), કાયમી સ્થળાંતરિત (Shifted), મૃત્યુ પામેલા (Deceased) અને ડુપ્લિકેટ (Duplicate) મતદારોની ઓળખ કરવામાં આવી છે. આંકડા અનુસાર, 65.45 લાખથી વધુ મતદારો (11.81%) કાયમી ધોરણે અન્ય સ્થળે રહેવા જતા રહ્યા છે, જ્યારે 19 લાખથી વધુ મતદારો (3.43%) પોતાના સરનામે મળી આવ્યા નહોતા. આ ઉપરાંત 16.39 લાખ મતદારો (2.96%) મૃત્યુ પામ્યા હોવાનું અને 7.09 લાખથી વધુ મતદારો (1.28%) ના નામ એકથી વધુ જગ્યાએ નોંધાયેલા હોવાનું સામે આવ્યું છે.
43.82 લાખથી વધુ કેસોમાં રૂબરૂ સુનાવણી અને પારદર્શક પ્રક્રિયા
નાગરિકોના મનમાં કોઈ શંકા ન રહે અને કોઈ પણ પાત્ર મતદાર પોતાના અધિકારથી વંચિત ન રહી જાય તે માટે પંચે પૂર્ણ પારદર્શિતા જાળવી છે. આ પ્રક્રિયા દરમિયાન કુલ 43.82 લાખથી વધુ નોટિસ પાઠવીને સંબંધિત લોકોની રૂબરૂ સુનાવણી કરવામાં આવી હતી. આ સુનાવણીના અંતે 43.20 લાખથી વધુ કેસોને સુધારીને અંતિમ યાદીમાં સુરક્ષિત રાખવામાં આવ્યા છે. તેની સાથે અન્ય 4.02 કરોડથી વધુ યોગ્ય મતદારોને પણ લિસ્ટમાં યથાવત રાખવામાં આવ્યા છે. જોકે, નોટિસ અને તપાસ બાદ 61,867 લોકો ગેરલાયક અથવા અયોગ્ય ઠરતાં તેમને ફાઇનલ લિસ્ટમાંથી કાયમ માટે બહાર કરી દેવાયા છે.
મુખ્ય ચૂંટણી કમિશનરે ડ્રાફ્ટ રોલ અને ડુપ્લિકેટ નામો અંગે આપી વિગતો
આ અંગે કર્ણાટકના મુખ્ય ચૂંટણી કમિશનર અંબુ કુમારે વિગતો આપતાં જણાવ્યું હતું કે, જૂન 2026 સુધીમાં રાજ્યમાં આશરે 5.54 કરોડ નોંધાયેલા મતદારો હતા, જેમાંથી અંદાજે 1.08 કરોડ નામ ડ્રાફ્ટ રોલમાં સામેલ થઈ શક્યા નહોતા. આ બહાર રહી ગયેલા નામોમાંથી લગભગ 18 લાખ લોકો મૃત્યુ પામ્યા હતા અને 7 લાખ જેટલા નામો ડુપ્લિકેટ હતા. આમ, આશરે 25 લાખ જેટલા નામો કાં તો મૃતકોના હતા અથવા તો બેવડા નોંધાયેલા હતા. તેમણે વધુમાં ઉમેર્યું કે છેલ્લા અઢી મહિનામાં ચલાવવામાં આવેલા વિશેષ અભિયાનના કારણે 8.19 લાખથી વધુ નવા પાત્ર મતદારોનું સફળતાપૂર્વક રજિસ્ટ્રેશન પણ કરવામાં આવ્યું છે.
નામ રહી ગયું હોય તો ગભરાશો નહીં: Form 6 ભરીને ફરી કરી શકાશે અરજી
ચૂંટણી પંચે સ્પષ્ટ કર્યું છે કે જે યોગ્ય અને પાત્ર નાગરિકોના નામ આ યાદીમાં રહી ગયા હોય તેઓએ ચિંતા કરવાની જરૂર નથી. ચૂંટણી કમિશનરના જણાવ્યા અનુસાર, પંચ દ્વારા વ્યાપક જાગૃતિ અભિયાન ચલાવવામાં આવ્યું છે અને તમામ રાજકીય પક્ષોનો પણ સહયોગ લેવાયો છે. જો કોઈ પાત્ર નાગરિકનું નામ યાદીમાંથી છૂટી ગયું હોય, તો તેઓ Form 6 ભરીને ઓનલાઈન અથવા ઓફલાઈન અરજી કરી શકે છે. સુનાવણી અને જરૂરી ચકાસણી પૂર્ણ થયા બાદ યોગ્ય જણાશે તો તેમનું નામ નવી યાદીમાં તરત જ ઉમેરી દેવામાં આવશે.
