Shahbazs damage control: કિર્ગિસ્તાનના બિશ્કેકમાં યોજાયેલી શાંઘાઈ સહયોગ સંગઠન (SCO)ની શિખર પરિષદ દરમિયાન પાકિસ્તાનના વડાપ્રધાન શહબાઝ શરીફનું કાર્યાલય સોશિયલ મીડિયા પર ભારે ટ્રોલિંગનો ભોગ બન્યું હતું. SCO સમિટ દરમિયાન વિવિધ દેશોના નેતાઓ સાથે લેવાયેલી 'ફેમિલી ફોટો'ને પાકિસ્તાની વડાપ્રધાન કાર્યાલયના સત્તાવાર સોશિયલ મીડિયા હેન્ડલ પરથી ક્રોપ કરીને શેર કરવામાં આવી હતી. આ તસવીરમાં ભારતના વડાપ્રધાન નરેન્દ્ર મોદી સહિત કેટલાક અન્ય નેતાઓને હટાવી દેવામાં આવ્યા હતા.
અનેક દેશોના નેતાઓ હાજર રહ્યા
સમિટમાં વડાપ્રધાન નરેન્દ્ર મોદી, રશિયાના રાષ્ટ્રપતિ વ્લાદિમીર પુતિન, ચીનના રાષ્ટ્રપતિ શી જિનપિંગ સહિત અનેક દેશોના નેતાઓ હાજર રહ્યા હતા. ફોટો સેશન બાદ તમામ નેતાઓ સાથે લેવામાં આવેલી મૂળ તસવીરમાં તમામ દેશોના વડાઓ જોવા મળતા હતા. જોકે, પાકિસ્તાન PMO દ્વારા શેર કરાયેલી તસવીરમાં માત્ર ચીન, કઝાકિસ્તાન, રશિયા, તાજિકિસ્તાન અને ઉઝબેકિસ્તાનના નેતાઓ સાથે શહબાઝ શરીફ દેખાતા હતા. આ બાબત સોશિયલ મીડિયા યુઝર્સના ધ્યાનમાં આવતાં પાકિસ્તાનની ભારે ટીકા શરૂ થઈ હતી.
સોશિયલ મીડિયા પર ચર્ચા વધુ તેજ બની
ભારતીય વડાપ્રધાન નરેન્દ્ર મોદીએ જ્યારે સંપૂર્ણ 'ફેમિલી ફોટો' શેર કર્યો, ત્યારબાદ પાકિસ્તાન PMOની ક્રોપ કરેલી તસવીર અંગે સોશિયલ મીડિયા પર ચર્ચા વધુ તેજ બની હતી. યુઝર્સે પાકિસ્તાની વડાપ્રધાન કાર્યાલયની આ કાર્યવાહી પર સવાલો ઉઠાવ્યા હતા અને તેને સંકુચિત માનસિકતા સાથે જોડીને ટ્રોલિંગ શરૂ કર્યું હતું. થોડા સમય બાદ મામલો વધુ ચર્ચામાં આવતા પાકિસ્તાની વડાપ્રધાન કાર્યાલયને ડેમેજ કંટ્રોલ કરવાની સ્થિતિ સર્જાઈ હતી.
મૂળ સંપૂર્ણ તસવીર ફરીથી શેર કરી
આ પછી શહબાઝ શરીફે પોતાના સત્તાવાર હેન્ડલ પરથી તમામ નેતાઓ હાજર હોય તેવી મૂળ સંપૂર્ણ તસવીર ફરીથી શેર કરી હતી. આ તસવીરમાં નરેન્દ્ર મોદી ઉપરાંત કિર્ગિસ્તાનના રાષ્ટ્રપતિ સદિર જાપારોવ, બેલારૂસના રાષ્ટ્રપતિ એલેક્ઝેન્ડર લુકાશેન્કો અને ઈરાનના રાષ્ટ્રપતિ મસૂદ પેઝેશકિયાન સહિત અન્ય નેતાઓ પણ સ્પષ્ટપણે જોવા મળ્યા હતા. આમ, એક તસવીરને ક્રોપ કરીને શેર કરવાની ઘટનાએ પાકિસ્તાન PMOને સોશિયલ મીડિયા પર ભારે ટીકા અને ટ્રોલિંગનો સામનો કરાવ્યો હતો.
