Sergio Gor On PM Modi-Trump Meet: વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચેની એક હાઇ-પ્રોફાઇલ બેઠકને લઈને અમેરિકામાં ભારતના રાજદૂત સર્જિયો ગોરે મોટો દાવો કર્યો છે. તેમના જણાવ્યા અનુસાર, ફ્રાન્સના એવિયાન-લેસ-બેન્સમાં યોજાયેલી G7 સમિટ દરમિયાન બંને નેતાઓની બેઠકમાં ભારતીય પક્ષ સંપૂર્ણ પ્રેસ કોન્ફરન્સ અથવા પ્રશ્નોત્તરી યોજવા ઇચ્છતો નહોતો.
ભારતીય પક્ષે માત્ર ફોટો-ઓપની મંજૂરી આપી હતી?
એક ફોરમ દરમિયાન બેઠકના પડદા પાછળની વાતો જણાવતાં સર્જિયો ગોરે દાવો કર્યો કે બેઠક પહેલાં તેઓ અને ટ્રમ્પ બેકસ્ટેજમાં હતા. તે સમયે ભારતીય પક્ષની પ્રાથમિકતાઓ અંગે ચર્ચા થઈ હતી. ગોરના જણાવ્યા પ્રમાણે, ભારતીય વિદેશ મંત્રાલય તરફથી એવી અપેક્ષા વ્યક્ત કરવામાં આવી હતી કે મીડિયાને માત્ર ફોટો-ઓપ માટે બોલાવવામાં આવે, પરંતુ સંપૂર્ણ પ્રેસ કોન્ફરન્સ કે પ્રશ્નોત્તરી ન યોજાય. તેમણે દાવો કર્યો કે ભારતીય પક્ષને પ્રશ્નોત્તરી પસંદ નહોતી અને ટ્રમ્પ શરૂઆતમાં આ વ્યવસ્થા માટે સહમત પણ થઈ ગયા હતા.
કેમેરા સામે બેઠા અને ટ્રમ્પે પૂછ્યું—'કોઈ સવાલ?'
સર્જિયો ગોરના જણાવ્યા પ્રમાણે, જ્યારે મોદી અને ટ્રમ્પ મીડિયા તથા કેમેરાની સામે બેઠા ત્યારે વાતાવરણ સામાન્ય હતું. બેઠક દરમિયાન આશરે 50 જેટલા કેમેરા હાજર હતા. પરંતુ બંને નેતાઓની પ્રારંભિક વાતચીત પૂર્ણ થયા બાદ ટ્રમ્પ અચાનક પત્રકારો તરફ વળ્યા અને પૂછ્યું—“Any questions?” એટલે કે ‘કોઈ સવાલ?’ ગોરના દાવા પ્રમાણે, ટ્રમ્પના આ એક સવાલ બાદ સમગ્ર કાર્યક્રમનું સ્વરૂપ બદલાઈ ગયું.
45 મિનિટ સુધી ચાલી પ્રશ્નોત્તરી
અમેરિકી રાજદૂતના જણાવ્યા અનુસાર, શરૂઆતમાં માત્ર ટૂંકા ફોટો-ઓપ માટેની વ્યવસ્થા હતી, પરંતુ ટ્રમ્પે પત્રકારોને સવાલ કરવાની તક આપતાં વાતચીત લાંબી બની ગઈ. ત્યારબાદ બંને નેતાઓને પત્રકારોના અનેક પ્રશ્નોના જવાબ આપવા પડ્યા અને સમગ્ર મીડિયા ઇન્ટરેક્શન આશરે 45 મિનિટ સુધી ચાલ્યું. આ દરમિયાન દ્વિપક્ષીય સંબંધો ઉપરાંત વિવિધ આંતરરાષ્ટ્રીય અને વૈશ્વિક મુદ્દાઓ પર પણ સવાલો પૂછવામાં આવ્યા હતા.
ભારત તરફથી હજુ સત્તાવાર પ્રતિક્રિયા નથી
17 જૂને ફ્રાન્સમાં યોજાયેલી મોદી-ટ્રમ્પની આ બેઠક અંગે સર્જિયો ગોરે કરેલા દાવાથી રાજકીય વર્તુળોમાં ચર્ચા શરૂ થઈ છે. જો, કે આ દાવા અંગે ભારત સરકાર અથવા વિદેશ મંત્રાલય તરફથી હજુ સુધી કોઈ સત્તાવાર પ્રતિક્રિયા કે સ્પષ્ટતા સામે આવી નથી. તેથી ગોરના નિવેદનને હાલ તેમના પોતાના દાવા તરીકે જ જોવામાં આવી રહ્યું છે.
