મક્કા નજીક ડ્રોન મુદ્દે સાઉદીની રેડ લાઇન, પાકિસ્તાને દુઃખ વ્યક્ત કરવાનો ઢોંગ કર્યો

Saudi Arabia shows red line: પવિત્ર શહેર મક્કા નજીક શંકાસ્પદ ડ્રોનને તોડી પાડવાના સાઉદી અરેબિયાના દાવા બાદ પશ્ચિમ એશિયામાં તણાવ વધુ ચર્ચામાં આવ્યો છે. સાઉદી સત્તાવાળાઓના જણાવ્યા મુજબ, યમનના હૂથી વિદ્રોહીઓ તરફથી આવતું ડ્રોન મક્કાની પ્રતિબંધિત હવાઈ સીમામાં પ્રવેશે તે પહેલાં જ નષ્ટ કરવામાં આવ્યું હતું. આ ઘટનાને પગલે સાઉદીએ મક્કા-મદીનાની પવિત્ર મસ્જિદો અને યાત્રાળુઓની સુરક્ષાને પોતાની ‘રેડ લાઇન’ ગણાવી છે. બીજી તરફ, હૂથી જૂથે મક્કા તરફ કોઈ ડ્રોન મોકલ્યું હોવાના આરોપને નકારી કાઢ્યો છે.

શાહબાઝ શરીફે ઘટનાની કરી આકરી નિંદા
પાકિસ્તાનના વડાપ્રધાન શાહબાઝ શરીફે મક્કાના પવિત્ર સ્થળને નિશાન બનાવવાના કથિત પ્રયાસની સખત નિંદા કરી છે. તેમણે કહ્યું કે આવા સમાચારથી પાકિસ્તાનના લોકો દુઃખી અને ચિંતિત છે તથા આ ઘટનાને અત્યંત ગંભીર ગણાવી. શાહબાઝ શરીફે પવિત્ર સ્થળોની સુરક્ષા માટે ઝડપથી કાર્યવાહી કરવા બદલ સાઉદીની સશસ્ત્ર દળોની પ્રશંસા પણ કરી હતી. તેમણે પોતાના નિવેદનમાં સાઉદી અરેબિયા સાથે પાકિસ્તાનની એકતાનો પણ પુનરોચ્ચાર કર્યો હતો.

સાઉદીની સાર્વભૌમત્વ અને હરમૈન શરીફૈનની સુરક્ષાની ખાતરી
શાહબાઝ શરીફે જણાવ્યું હતું કે પાકિસ્તાન સાઉદી અરેબિયાની સાર્વભૌમત્વ અને પ્રાદેશિક અખંડિતતાની રક્ષા માટે તેની સાથે ઊભું છે. તેમણે હરમૈન શરીફૈન એટલે કે મક્કાની મસ્જિદ અલ-હરમ અને મદીનાની મસ્જિદ-એ-નબવીની સુરક્ષા તથા પવિત્રતા જાળવવા માટે પણ પાકિસ્તાનની પ્રતિબદ્ધતા વ્યક્ત કરી હતી. આ સાથે તેમણે વિસ્તારના તમામ પક્ષોને સંયમ જાળવવા અને તણાવ વધુ ન વધારવા માટે અપીલ કરી હતી.

મક્કાની સુરક્ષાને લઈને સાઉદીની સ્પષ્ટ ચેતવણી
સાઉદી નેતૃત્વ હેઠળના ગઠબંધનના જણાવ્યા અનુસાર, હૂથી તરફથી છોડવામાં આવેલું શંકાસ્પદ ડ્રોન મક્કાની પ્રતિબંધિત હવાઈ સીમા સુધી પહોંચે તે પહેલાં જ હવામાં તોડી પાડવામાં આવ્યું હતું. સાઉદી સૈન્ય પ્રવક્તા તુર્કી અલ-મલિકીએ કહ્યું હતું કે બંને પવિત્ર મસ્જિદો અને યાત્રાળુઓની સુરક્ષા સાઉદી અરેબિયા માટે ‘રેડ લાઇન’ સમાન છે. સત્તાવાળાઓના જણાવ્યા મુજબ, મંગળવારે સાંજે લગભગ 6:50 વાગ્યે ડ્રોનને ટ્રેક કર્યા બાદ નષ્ટ કરવામાં આવ્યું હતું અને તેનો કાટમાળ શહેરની દક્ષિણ તરફ પડ્યો હતો.

તણાવ ઘટાડવા માટે સંયમ અને વાતચીતની અપીલ
આ ઘટનાને લઈને શાહબાઝ શરીફે તમામ પક્ષોને સંઘર્ષ ટાળવા માટે સંયમ રાખવાની અપીલ કરી હતી. તેમના જણાવ્યા મુજબ, પશ્ચિમ એશિયા પહેલેથી જ અનેક સંઘર્ષોમાંથી પસાર થઈ રહ્યું છે અને આવી સ્થિતિમાં વધુ તણાવ ટાળવો જરૂરી છે. તેમણે કાયમી શાંતિ માટે સંવાદ અને રાજદ્વારી પ્રયાસોને મહત્વ આપ્યું હતું. બીજી તરફ, હૂથીઓ દ્વારા ડ્રોન હુમલાના દાવાને નકારવામાં આવતા ઘટનાને લઈને બંને પક્ષના નિવેદનોમાં વિરોધાભાસ જોવા મળી રહ્યો છે.