Pakistan put a brake: સાઉદી અરેબિયા પર હૂતી વિદ્રોહીઓના હુમલા વધતા પાકિસ્તાનના વલણમાં અચાનક ફેરફાર જોવા મળ્યો છે. થોડા દિવસો પહેલાં સુધી ઈસ્લામાબાદ સાઉદી પર હુમલો થશે તો હૂતીઓ સામે કડક કાર્યવાહી કરવાની ચેતવણી આપી રહ્યું હતું, પરંતુ હવે પાકિસ્તાને સ્પષ્ટ કર્યું છે કે હાલ હૂતી વિદ્રોહીઓ સામે કોઈ લશ્કરી કાર્યવાહી અંગે ચર્ચા ચાલી રહી નથી. પાકિસ્તાનના વિદેશ મંત્રાલયના પ્રવક્તા સજ્જાદ હૈદર ખાને જણાવ્યું કે યોગ્ય સમય આવવા પર સંરક્ષણ કરાર મુજબ પગલાં લેવામાં આવશે.
એક દેશ પર હુમલો ત્રણેય દેશો પર હુમલો ગણાય
પાકિસ્તાન, સાઉદી અરેબિયા અને તુર્કી વચ્ચે થયેલા મક્કા ડિફેન્સ પેક્ટ મુજબ કોઈ એક દેશ પર હુમલો ત્રણેય દેશો પર હુમલો ગણાય છે. પાકિસ્તાનના સંરક્ષણ મંત્રી ખ્વાજા આસિફે અગાઉ સાઉદી પર જોખમ વધે તો કરાર સક્રિય થવાના સંકેત આપ્યા હતા. જોકે, ઈસ્લામાબાદ હાલમાં અમેરિકા અને ઈરાન વચ્ચે મધ્યસ્થીની ભૂમિકા ભજવી રહ્યું છે અને હૂતી વિદ્રોહીઓને ઈરાનનું સમર્થન મળતું હોવાના કારણે સીધી લશ્કરી કાર્યવાહીથી પાકિસ્તાન ઈરાન સાથેના સંબંધોમાં તણાવ વધવાની શક્યતાને ટાળવા માંગે છે.
એરબેઝ અને ક્રૂડ ઓઈલ સંબંધિત સ્થળોને નિશાન બનાવી હુમલા
હૂતી હુમલાઓને કારણે સાઉદી અરેબિયામાં પણ તણાવ વધ્યો છે. યમનના હૂતી વિદ્રોહીઓએ સાઉદીના દક્ષિણ વિસ્તારમાં આવેલા એરબેઝ અને ક્રૂડ ઓઈલ સંબંધિત સ્થળોને નિશાન બનાવી હુમલા કર્યા હતા, જેમાં 73 લોકો ઘાયલ થયા હતા. તેના જવાબમાં સાઉદી અરેબિયાએ યમનમાં હૂતી ઠેકાણાઓ પર લગભગ 40 હવાઈ હુમલા કર્યા હતા. સ્થિતિ વધુ ગંભીર બનતા પાકિસ્તાને ઈરાનને હૂતીઓને નિયંત્રણમાં રાખવા અપીલ કરી હતી, પરંતુ તેહરાને આ મામલે સીધી જવાબદારી સ્વીકારવાથી ઇનકાર કર્યો હતો.
મોખા બંદર સુધી પહોંચ બનાવ્યાનો દાવો કરવામાં આવ્યો
દરમિયાન, હૂતી વિદ્રોહીઓએ યમનના પશ્ચિમી પ્રાંત તાઈઝના વ્યૂહાત્મક વિસ્તારો પર નિયંત્રણ મેળવી લાલ સમુદ્રના મહત્વપૂર્ણ મોખા બંદર સુધી પહોંચ બનાવ્યાનો દાવો કરવામાં આવ્યો છે. વર્ષ 2014થી ચાલી રહેલા યમન ગૃહયુદ્ધમાં 2022ના યુદ્ધવિરામ બાદ ફરી સંઘર્ષ ભડક્યો છે. મોખા બંદર અને લાલ સમુદ્રનો વિસ્તાર આંતરરાષ્ટ્રીય શિપિંગ તથા જીવનજરૂરી ચીજવસ્તુઓની સપ્લાય માટે મહત્વપૂર્ણ હોવાથી હૂતી પ્રવૃત્તિઓ વધવાથી વૈશ્વિક વેપાર અને દરિયાઈ પરિવહન સામે પણ ચિંતા વધી છે.
