Ram Mandir trust: અયોધ્યામાં રામલલાના ભવ્ય મંદિર અને શ્રી રામ જન્મભૂમિ તીર્થ ક્ષેત્ર ટ્રસ્ટના સંચાલનને લઈને મહત્વપૂર્ણ સંગઠનાત્મક નિર્ણય લેવામાં આવ્યો છે. મણિરામ દાસજીની છાવણી ખાતે યોજાયેલી ઉચ્ચસ્તરીય બેઠકમાં ટ્રસ્ટમાં ખાલી પડેલી ત્રણ જગ્યાઓ પર નવા ટ્રસ્ટીઓની સર્વાનુમતે વરણી કરવામાં આવી છે. આ નિર્ણયથી મંદિરના આગામી નિર્માણ કાર્યો અને વહીવટી કામગીરીને નવી દિશા મળવાની અપેક્ષા છે.
રામ જન્મભૂમિ કેસ સાથે જોડાયેલી કાનૂની પ્રક્રિયામાં સક્રિય
ટ્રસ્ટમાં અગાઉ મહત્વની જવાબદારી સંભાળનાર ચંપત રાય, અનિલ મિશ્રા અને સ્વર્ગસ્થ વિમલેન્દ્ર મોહન મિશ્રાના સ્થાને ત્રણ નવા ચહેરાઓને સ્થાન આપવામાં આવ્યું છે. અયોધ્યાના જાણીતા વકીલ મદન મોહન પાંડે, દિલ્હીના ઉદ્યોગપતિ મહેશ ભાગચંદકા અને શિકોહાબાદના મહિલા આગેવાન નિર્મળા યાદવની ટ્રસ્ટી તરીકે પસંદગી કરવામાં આવી છે. મદન મોહન પાંડે રામ જન્મભૂમિ કેસ સાથે જોડાયેલી કાનૂની પ્રક્રિયામાં સક્રિય રહ્યા છે અને તેમનો કાનૂની અનુભવ ટ્રસ્ટ માટે મહત્વપૂર્ણ બની શકે છે.
મંદિરના ભૂમિપૂજન કાર્યક્રમમાં તેઓ મુખ્ય યજમાન રહ્યા
મહેશ ભાગચંદકા રામ જન્મભૂમિ આંદોલન સાથે સંકળાયેલા પરિવાર સાથે નજીકનો સંબંધ ધરાવે છે અને સામાજિક ક્ષેત્રે પણ સક્રિય છે. 2020માં વડાપ્રધાન નરેન્દ્ર મોદીના હસ્તે યોજાયેલા રામ મંદિરના ભૂમિપૂજન કાર્યક્રમમાં તેઓ મુખ્ય યજમાન રહ્યા હતા. બીજી તરફ, નિર્મળા યાદવ વિશ્વ હિન્દુ પરિષદ સાથે લાંબા સમયથી જોડાયેલા છે અને રામ મંદિર નિર્માણ માટેના સમર્પણ નિધિ અભિયાનમાં ગ્રાસરૂટ સ્તરે કામગીરી કરી હતી. તેમની પસંદગીથી ટ્રસ્ટમાં મહિલા પ્રતિનિધિત્વને પણ સ્થાન મળ્યું છે.
ટ્રસ્ટના પદાધિકારીઓની હાજરીમાં ત્રણેય નામોને મંજૂરી
મણિરામ દાસ છાવણી ખાતે યોજાયેલી બેઠક દરમિયાન સુરક્ષાના ચુસ્ત બંદોબસ્ત વચ્ચે સંતો-મહંતો અને ટ્રસ્ટના પદાધિકારીઓની હાજરીમાં ત્રણેય નામોને મંજૂરી આપવામાં આવી હતી. બેઠકમાં ટ્રસ્ટના અધ્યક્ષ મહંત નૃત્ય ગોપાલ દાસ મહારાજ, કોષાધ્યક્ષ સ્વામી ગોવિંદદેવ ગિરીજી, અંતરિમ મહાસચિવ કૃષ્ણ મોહન અને મહંત દિનેન્દ્ર દાસજી સહિતના આગેવાનો ઉપસ્થિત રહ્યા હતા.
