Rajasthan Local Body Election Results 2026: રાજસ્થાન સ્થાનિક સ્વરાજ્ય ચૂંટણી 2026ના પરિણામોએ રાજ્યના રાજકીય દિગ્ગજો માટે મિશ્ર સંકેતો આપ્યા છે. રાજ્યની કુલ 309 શહેરી નિકાયોના વોર્ડ કાઉન્સિલર ચૂંટણીમાં ભાજપે સમગ્ર રાજ્ય સ્તરે 10માંથી મોટા ભાગના નગર નિગમો, 47 નગર પરિષદો અને 252 નગર પાલિકાઓમાં સારું પ્રદર્શન કરીને પોતાના બોર્ડ બનાવ્યા છે. ભાજપે 4179 વોર્ડમાં જીત મેળવી છે, જ્યારે કોંગ્રેસે 3613 વોર્ડ પર જીત નોંધાવીને ભાજપને કડી ટક્કર આપી છે. આ ચૂંટણીમાં 2273 અપક્ષ ઉમેદવારો જીત્યા છે, જે અનેક નગર પાલિકાઓમાં કિંગમેકરની ભૂમિકામાં આવ્યા છે. દિલ્હીમાં વડાપ્રધાન નરેન્દ્ર મોદીએ આ જીતને ડબલ એન્જિન સરકારના સુશાસન પર જનતાની મહોર ગણાવી છે.
મુખ્યમંત્રી ભજનલાલ શર્મા અને ડેપ્યુટી સીએમ દીયા કુમારીનું રિપોર્ટ કાર્ડ
રાજ્ય સ્તરે જયપુર, ઉદયપુર, કોટા અને ભીલવાડા જેવા મોટા નગર નિગમોમાં ભાજપની જીતે મુખ્યમંત્રી ભજનલાલ શર્માનું કદ મજબૂત કર્યું છે. જયપુરમાં વિદ્યાધર નગર વિધાનસભા સીટ પરથી ધારાસભ્ય અને ડેપ્યુટી સીએમ દીયા કુમારીના ક્ષેત્રમાં ભાજપે શાનદાર પ્રદર્શન કર્યું હોવાથી તેઓ આ ચૂંટણીમાં સ્પષ્ટ 'ગેનર' બનીને ઉભર્યા છે. જોકે, મુખ્યમંત્રી ભજનલાલ શર્મા માટે તેમના ગૃહ જિલ્લા ભરતપુરમાં મોટો આંચકો લાગ્યો છે. ભરતપુર નગર નિગમના 65 વોર્ડમાંથી 36 બેઠકો પર અપક્ષોનો કબ્જો થયો છે અને ભાજપ માત્ર 20 બેઠકો પર સમેટાઈ ગઈ છે, જેના લીધે રાજ્યમાં જીત છતાં CM માટે હોમ ગ્રાઉન્ડ પર મોટું નુકસાન થયું છે.
કોંગ્રેસના દિગ્ગજો: દોટાસરા, પાયલટ અને અશોક ગહેલોતની સ્થિતિ
કોંગ્રેસ પ્રદેશ અધ્યક્ષ ગોવિંદ સિંહ દોટાસરાના ગૃહ જિલ્લા સીકરમાં કોંગ્રેસે 65માંથી 38 બેઠકો જીતીને સ્પષ્ટ બહુમતી સાથે પોતાનો બોર્ડ બનાવ્યો છે. સચિન પાયલટના પ્રભાવ વાળા ક્ષેત્રો જેવા કે ટોંક, દૌસા અને અજમેરમાં પણ કોંગ્રેસ સૌથી મોટી પાર્ટી બનીને ઉભરી છે, જેનાથી ગુર્જર બેલ્ટમાં તેમનો દબદબો ફરી સાબિત થયો છે. બીજી તરફ, પૂર્વ મુખ્યમંત્રી અશોક ગહેલોતના ગૃહ નગર જોધપુર નગર નિગમમાં ભાજપ અને કોંગ્રેસ બંને 44-44 બેઠકો પર બરાબરી પર અટકી ગયા છે. ગહેલોતે ભાજપને બહુમતી મેળવતા રોકી તો લીધી, પરંતુ તેમના પોતાના બૂથ પર કોંગ્રેસની હાર થતા તેમના માટે પરિણામો 'બરાબરીની ટક્કર' વાળા રહ્યા છે.
વસુંધરા રાજે, મદન રાઠોડ અને હનુમાન બેનીવાલ માટે ઝટકો
આ ચૂંટણીમાં સૌથી મોટો આંચકો ભાજપના પ્રદેશ અધ્યક્ષ મદન રાઠોડ અને પૂર્વ સીએમ વસુંધરા રાજેને લાગ્યો છે. મદન રાઠોડના ગૃહ ક્ષેત્ર પાલીમાં કોંગ્રેસ ૨૯ બેઠકો જીતીને સૌથી મોટી પાર્ટી બની ગઈ છે. ત્યાં જ વસુંધરા રાજે અને તેમના સાંસદ પુત્ર દુષ્યંત સિંહના રાજકીય ગઢ ગણાતા ઝાલાવાડ નગર પરિષદમાં કોંગ્રેસે 29 બેઠકો જીતીને ભાજપના વર્ષો જૂના વર્ચસ્વને બુરી રીતે તોડી પાડ્યું છે. બીજી તરફ RLPના હનુમાન બેનીવાલ અને AIMIMના અસદુદ્દીન ઓવૈસીનું ગઠબંધન શહેરી વિસ્તારોમાં કોઈ મોટો ચમત્કાર બતાવી શક્યું નથી અને તેમના ઉમેદવારો માત્ર અમુક જ જગ્યાએ મર્યાદિત રહ્યા છે.
સ્થાનિક રાજકારણમાં અપક્ષો અને સ્થાનિક મુદ્દાઓનો પ્રભાવ
રાજસ્થાન નિકાય ચૂંટણીમાં રસ્તા, પાણી અને સ્થાનિક વહીવટ જેવા મુદ્દાઓ પર જનતાએ વોટ આપ્યા છે. નીટ પેપર લીક અને શૈક્ષણિક વિવાદો છતાં ભાજપે શહેરી વિસ્તારોમાં પકડ જાળવી રાખી છે પરંતુ, 2200થી વધુ અપક્ષ ઉમેદવારોની જીત એ દર્શાવે છે કે સ્થાનિક સ્તરે બંને મુખ્ય પક્ષો સામે કાર્યકરોમાં ભારે અસંતોષ હતો. જોધપુર, પાલી અને કેકડી જેવા વિસ્તારોમાં હવે બોર્ડ બનાવવા માટે અપક્ષ કાઉન્સિલરોની ભૂમિકા નિર્ણાયક બનશે.
