Raipur Chhattisgarh bus truck Accident: છત્તીસગઢમાં રાયપુર-બિલાસપુર રાષ્ટ્રીય ધોરીમાર્ગ પર પેસેન્જર બસ રસ્તાની બાજુમાં પાર્ક કરેલા ટ્રક સાથે અથડાતાં ગંભીર અકસ્માત સર્જાયો હતો. આ દુર્ઘટનામાં શરૂઆતમાં ત્રણ લોકોનાં ઘટનાસ્થળે જ મોત થયાં હતાં, જ્યારે સારવાર દરમિયાન વધુ બે ઘાયલ મુસાફરોએ દમ તોડ્યો હતો. આ સાથે મૃત્યુઆંક પાંચ પર પહોંચ્યો છે. મૃતકોમાં બસ ડ્રાઇવર અને હેલ્પરનો પણ સમાવેશ થાય છે. અકસ્માતમાં 16 મુસાફરો ઘાયલ થયા હોવાના અહેવાલ છે.
પાર્ક કરેલા ટ્રક સાથે બસની જોરદાર ટક્કર
મળતી માહિતી મુજબ, બસ નંબર CG-04-NM-0859 રાયપુર-બિલાસપુર હાઇવે પરથી પસાર થઈ રહી હતી. આ દરમિયાન રસ્તાની બાજુમાં ઊભેલા ટ્રક નંબર CG-07-BL-4370 સાથે બસ અથડાઈ હતી. ટક્કર એટલી જોરદાર હતી કે બસમાં સવાર અનેક મુસાફરોને ગંભીર ઇજાઓ પહોંચી હતી. અકસ્મત બાદ સ્થળ પર અફરાતફરી મચી ગઈ હતી. સ્થાનિક લોકોની મદદથી ઘાયલોને હોસ્પિટલ પહોંચાડવાની વ્યવસ્થા કરવામાં આવી હતી. ઘટનાની જાણ થતાં બચાવ અને સારવારની કામગીરી હાથ ધરવામાં આવી હતી.
મૃતકોમાં બસ ડ્રાઇવર અને હેલ્પરનો સમાવેશ
અકસ્મતમાં જીવ ગુમાવનારા ત્રણ લોકોની ઓળખ નીચે મુજબ જણાવવામાં આવી છે:
- ભગીરથ યાદવ (37): જશપુર જિલ્લાના ખજરીકલાના રહેવાસી; બસ ડ્રાઇવર.
- પવન દેવાંગન (24): બલરામપુર જિલ્લાના બાલાંગીના રહેવાસી; બસ હેલ્પર.
- સમીમ મોહમ્મદ (39): બલરામપુર જિલ્લાના સરનાના રહેવાસી; બસમાં મુસાફરી કરી રહ્યા હતા.
આ ઉપરાંત, અકસ્માતમાં ઘાયલ થયેલા અતુલ કુમાર અને સુંદરલાલનું સારવાર દરમિયાન મોત થયું હતું. પરિણામે અકસ્માતમાં મૃત્યુ પામનારાઓની કુલ સંખ્યા પાંચ થઈ છે.
16 મુસાફરો ઘાયલ, ગંભીર ઇજાગ્રસ્તોને અન્ય હોસ્પિટલમાં ખસેડાયા
અકસ્મતમાં કુલ 16 મુસાફરો ઘાયલ થયા હોવાના અહેવાલ છે. ઘાયલોને નજીકની હોસ્પિટલમાં લઈ જવામાં આવ્યા હતા. પ્રાથમિક સારવાર બાદ ગંભીર રીતે ઇજાગ્રસ્ત કેટલાક મુસાફરોને વધુ સારી સારવાર માટે અન્ય હોસ્પિટલોમાં રિફર કરવામાં આવ્યા હતા. ઘાયલોમાં વાસુદેવ રાવ, નિર્મલા યાદવ, અમન ગુપ્તા, સતીશ ભગત અને અનિલ યાદર સહિતના મુસાફરોનો સમાવેશ થાય છે. તમામ ઘાયલોની સારવાર કરવામાં આવી રહી હોવાનું જણાવાયું છે.
હાઇવે પર પાર્ક કરેલા ભારે વાહનો સામે ફરી સવાલો
આ અકસ્માત બાદ રાષ્ટ્રીય ધોરીમાર્ગ પર રસ્તાની બાજુમાં પાર્ક કરાયેલા ભારે વાહનોની સલામતી અંગે ફરી સવાલો ઊભા થયા છે. ખાસ કરીને રાત્રિના સમયે ઓછી દૃશ્યતા, પૂરતી લાઇટનો અભાવ અને વાહનો પર રિફ્લેક્ટર ન હોવાને કારણે પાછળથી આવતા વાહનચાલકોને રસ્તા પર ઊભેલા ટ્રક સમયસર દેખાતા નથી. પરિણામે ગંભીર અકસ્માતનું જોખમ વધી શકે છે. આવી દુર્ઘટનાઓ અટકાવવા માટે હાઇવે પર નિયમિત રાત્રિ પેટ્રોલિંગ, ગેરકાયદે પાર્કિંગ સામે કાર્યવાહી, વાહનોમાં રિફ્લેક્ટર અને જરૂરી ચેતવણીનાં ચિહ્નોની ચકાસણી જેવી વ્યવસ્થાઓ અસરકારક રીતે અમલમાં મૂકવી જરૂરી છે.
