'મોદીજી, હિંમત બતાવો, UPI ટેક્સ પાછો ખેંચો...' રાહુલ ગાંધીનો કેન્દ્ર સરકાર પર સીધો પ્રહાર

UPI MDR Charge: 15 ઓક્ટોબર 2026થી ₹2,000થી વધુના કેટલાક UPI પર્સન-ટુ-મર્ચન્ટ (P2M) વ્યવહારો પર 0.4 ટકા મર્ચન્ટ ડિસ્કાઉન્ટ રેટ (MDR) લાગુ થવાનો છે. આ ચાર્જ ગ્રાહક પાસેથી સીધો લેવામાં નહીં આવે, પરંતુ વેપારી અથવા મર્ચન્ટ દ્વારા ચૂકવવાનો રહેશે. ₹75,000 કે તેથી વધુના વ્યવહારો માટે MDRની મહત્તમ મર્યાદા ₹300 રહેશે.

રાહુલ ગાંધીએ UPI ચાર્જ પાછો ખેંચવાની માગ કરી
કોંગ્રેસ નેતા રાહુલ ગાંધીએ UPI પર લાગનારા પ્રસ્તાવિત MDRને લઈને કેન્દ્ર સરકાર પર પ્રહાર કર્યો છે. તેમણે સરકારને આ નિર્ણય પાછો ખેંચવાની માગ કરી છે. રાહુલ ગાંધીએ સરકાર પર અમેરિકાના દબાણ સામે ઝૂકવાનો આરોપ લગાવ્યો અને UPI ચાર્જને લઈને કેન્દ્રની નીતિ પર સવાલ ઉઠાવ્યા છે. તેમના નિવેદનોમાં આ મુદ્દાને અમેરિકા અને અમેરિકન પેમેન્ટ કંપનીઓ સાથે પણ જોડવામાં આવ્યો છે.

ઇન્દિરા ગાંધીનો ઉલ્લેખ કરી PM મોદી પર નિશાન
રાહુલ ગાંધીએ ઇન્દિરા ગાંધીના એક જૂના પ્રસંગનો ઉલ્લેખ કરતા વડાપ્રધાન નરેન્દ્ર મોદી પર કટાક્ષ કર્યો હતો. તેમણે કહ્યું કે ઇન્દિરા ગાંધીને એક વખત પૂછવામાં આવ્યું હતું કે તેઓ ડાબી તરફ ઝૂકે છે કે જમણી તરફ, જેના જવાબમાં તેમણે પોતાને “ટટ્ટાર” ગણાવ્યા હતા. રાહુલે આ સંદર્ભમાં મોદી પર કટાક્ષ કરતા કહ્યું કે તેઓ ડાબે કે જમણે નહીં, પરંતુ ડોનાલ્ડ ટ્રમ્પની સામે “સીધા સૂવાનું” નક્કી કરી ચૂક્યા છે.

“UPI પર ચાર્જ એટલે દરેક ભારતીય પર ટેક્સ” : રાહુલ
રાહુલ ગાંધીએ દાવો કર્યો કે UPI પર MDR લાદવાથી તેની અસર આખરે સામાન્ય ગ્રાહકો સુધી પહોંચી શકે છે. તેમણે સવાલ ઉઠાવ્યો કે સરકાર ભલે ગ્રાહકો પાસેથી સીધી ફી ન લેવાનું કહી રહી હોય, પરંતુ વેપારીઓ પર પડનારો ખર્ચ તેઓ કિંમતોમાં સામેલ કરી શકે છે. રાહુલે વડાપ્રધાનને અમેરિકા સામે “જૂઠું બોલવાનું બંધ” કરીને UPI MDR પાછો ખેંચવાની માગ કરી છે.

₹2,000થી ઉપરના UPI વ્યવહારો પર શું બદલાશે?
અગાઉ રાહુલ ગાંધીએ પણ UPI પર MDR લાગુ કરવાની શક્યતા અંગે સરકાર પર સવાલો ઉઠાવ્યા હતા. હાલની વ્યવસ્થા મુજબ ₹2,000થી વધુના પાત્ર P2M UPI વ્યવહારો પર 0.4 ટકા MDR લાગશે, જ્યારે વ્યક્તિથી વ્યક્તિ (P2P) ટ્રાન્સફર અને ₹2,000 સુધીના વ્યવહારો પર આ MDR લાગુ નહીં થાય. સરકારનું કહેવું છે કે ગ્રાહકો પાસેથી સીધો MDR વસૂલવામાં આવશે નહીં.

સરકાર અને કોંગ્રેસના દાવામાં તફાવત
કેન્દ્ર સરકાર અને UPI ઇકોસિસ્ટમ તરફથી જણાવાયું છે કે MDRનો હેતુ UPI માળખા, સાયબર સુરક્ષા અને પેમેન્ટ ઇકોસિસ્ટમની લાંબા ગાળાની જાળવણીને ટેકો આપવાનો છે. બીજી તરફ, કોંગ્રેસ આ નિર્ણયનો વિરોધ કરી રહી છે અને દાવો કરે છે કે વેપારીઓ પર પડનારો વધારાનો ખર્ચ અંતે ગ્રાહકો પર આવી શકે છે. આ મુદ્દે બંને પક્ષોના અભિપ્રાય અલગ છે.